2
Dule, dule-wileged-mesagwar-imakdiid, duledar-wiles
1 Dule, igar-isgana-imakedgi-binsamalad, duledar-wilesmar.
Ar megidele, igar-isgana-imakedgi, binsamaidamalad.
Neg-oibosale, igar-isgana imakdedamalad,
ar ade, e-ibmar-imakbiedba imakdamalad.
2 We-dulemar, emar-nainubina sokalile, e-ibe susdamalad, egadga imakdedamalad.
Emar-ibe negmar susdamalad, egadga imakdedamalad.
E-neg-ibed-mesagwar imakdedamalad,
degi, e-neg-ibed-mimmigan-mesagwar imakdedamarbalid.
E-nainu-ibed-mesagwar imakdedamalad,
degi, e-nainu e-ibe susdamarbalid.
3 Degisoggu, Bab-Jehová weyob soged:
“Emigine, ani, an we-dulemar-isganagi bonigan barmidamogoed,
we-bonigangi gwen wakinnosurmalad.
Bar san-dummarbaa na itogosurmalad,
ar ade, e-sabsur-odurdakleged-wachimar omosad.
4 A-ibagan-omosale, dule-bamalad egi dododmaloed,
ega we-naibi-itoleged-namakleged weyob egi dodoar namakmaloed:
‘Anmar bela bergusmala.
An-dulamar-ibe nainumar miminanaid,
ibiyobi anmar-ibe nainumar sunanai.
Dule-isganamar, anmar-nainumar miminanaid.’ ”
5 A-ulale, Bab-Jehová-sordagan-onmakbukwad-abargi,
we-dulemarga napa-mimilegedgi ega napa uklegosulid.
Bab-Dummad-gayaburba-barsoged-napiragwadsurmalad
6 We-gayaburba-barsoged-napiragwadsurmalad anga soged:
“Mer bar be anmarga ee-gordii samala.
Mer be anmarga soge, be wilemaloye.”
7 Jacob-wagan weyob sogmalad:
“¿Bab-Jehová e-san-bargaagwar-imaked bergussi? E-daedde, ¿weyobsi?
¿Ar dule-inniki-nanadiidga Bab-Dummad-gayaburba ibnuedga gusursi?”
8 Bab-Jehová soged: “Ar bemar an-dulamarga gumalanad,
degi-inigwele, emi-ibagi be an-isdarmaladga gudmalad.
Dulemar-igarba-baisurbinsa-nadapdamalad-ibe sordamar-be-isdarmaladyobi, e-ibe be mor-nuegan atursasdamalad.
9 An-dulamar-omegan e-neg-nuegangi be ononnosmalad.
A-omegan-e-mimmigan-ibe, be e-wergued osulosmalad.
10 ”¡Ogusmar! ¡Be namar!
We-nega, obunnoged-negsulid.
Bela nue-isgus naid,
bela oitoles siid.
11 Ar dule-gwensak yogasaar-gakansaedgi
weyob sognonikile:
‘An bemarga-sunmakega, vino be anga udamaloye,
sisa be anga udamaloye.’
We-neggwebur Bab-Dummad-gayaburba-barsogedyobi, we-dule-dakdoed.”
Gales-bukwadgi onolemaloye soglesad
12 Bab-Jehová sogdebalid:
“Jacob-wagan, an bemarga nue-napira-soged,
bela be-dulemar gannar nuekwa an urboed.
Israel-wagan, an bemarga nue-napira-soged,
bemar-napi-besmaladi, an gannar danar urboed.
Igi sibad-wawaad galu-yaba danale-bukwadae,
deyobi, an bemar-urboed.
Degi, igi sibad-wawaad gagan-araramaladgi bukwadae,
deyobi, an bemar-urboed,
degine, binnasuli dule-bukidarayob oimakdemaloed.”
13 Ega igar-mayedi, emar-idumai guoed,
deginbali, emarmoga, igar-egamai gumarmogoed.
Amar, igar-bulegangi ollorgumaloed, degi, namaloed.
E-reydi, amar-idumai guoed.
Bab-Jehová, na e-sunnagwadi emar-idumai guoed.