38
Dule-isgusad Bab-Dummadse-gornaid
Ibmar-ukleged-ebinsalegega, David we-namaked narmaksad.
1 Bab-Jehováʼye, mer be anse urwe.
Be sae-itogedgi, mer be sabsur an-imake.
2 Be sabsur-angi-uludedba an naibigunonikid,
be angi sabsur-gwisgunonikid.
3 An-isgusad-ular, be anse uludedbali, an-san bar nuedsulid,
an-garmar bar nuedsulid.
4 An-isgued bela an-nonogagas naid,
ibmar-aidikidyob angi signonikid.
5 An binsaedsuli gudigusad-ulale, an-sanse-bakale, nunusar yapangusad,
bela sibudik-sibudikgusad.
6 Nue-ibitos itoleged,
bela-bela an oitolesad,
nue-wiles itoleged.
7 Bela-bela an uedik itoged,
an-san bela ibitosad.
8 Nue geggus itoleged, nunumakesar itolegusad.
An gwage-nunmaked-dummad nue-itonaid.
9 Bab-Dummad, an-ibmar-abeged bela be wisid,
an-ibmarbina-gudiid begi dukunaisulid.
10 An-gwage sabesur dik-dik-naid,
an-niga argwated,
nue an ataksurgusad.
11 An bonigan-nikadba, an-aimar, an-sordamar, angi bangudmalad.
An-gwenadgan angi deyob bangudmarmogad.
12 An-oburgwebi-gudimaladi, an-yardakega angi arbananaid.
An-oitomaloye-sogdimaladi, an-yardakega arbakee bane-bane igar-aminanaid.
13 Degi-inigwele, uayasuliyob an imaksad,
yamo amar-itonaisuliyob an imaksad.
Amar-abin an sunmaksasulid,
wissur-sunmakeyob an imaksad.
14 Degisoggu, dule-uayasulidyob an gued,
wissur-emar-abinsaedyob an gued.
15 Bab-Jehová, unnila an beginbi ibmar-edarbediid.
An-Bab-Dummad-Jehová, bebi unnila wemar-abin-imakoed.
16 Unnila ibmar-soggwen an egised:
An ailanonikile, mer anga allemalaga be imako,
mer angi burgumalaga be sao.
17 Nue an galakue itoged,
ibmar-nunmaked gwen-an-indakbisulid.
18 Degisoggu, an-isgusad an na barsogergebed,
an isgusadba nue-wiles an itoged.
19 An-isdarmaladdina nue baligannosmalad,
yogasaar-isdar-an-dakdimaladi nue mergusmalad.
20 An ibmar-nued-imaked-ular, dulemar angi yolenanaid.
An ibmar-nued-imaked-ular, dulemar angi gwisgunanaid.
21 Bab-Jehováʼye, mer be an-barmete,
an-Bab-Dummadye, mer be angi bangue.
22 Gwae be an-bendakdage,
Bab-Dummad, be an-abonogedid.