139
Tɑcɑɑ, n nyəmɑ-m teu
1 Tɑfiiti yontu nti tə wɛ yonyoolɑɑ
nyʋɣʋ tʋ yontunɑɑ tɑɑ tɔɣɔlɔ.
Tɑcɑɑ, n nyənəɣɩ too mɑ tɑɑ kɛ́ nɑ ń nyəmɑ-m.
2 Ye mɑ cɑɣɑɑ, n nyəmɑ́,
yɑɑ mɑ kʋlɑɑ, n nyəmɑ́.
N nɑɑkɩ too pooluŋ kɛ
mɑ hʋwɛɛ kɛ́ nɑ ń nyəmɑ-yɛ.
3 N nyəmɑ́ wɑɑtʋ wei mɑ tɔŋ yɑɑ mɑ həntɑɑ tɔ,
n nyəmɑ́ mɑ mpɑɑŋ tənɑ tətetete.
4 Pɑɑ mɑ tɑ kulitɑ nɔɣɔ n tɛmɑ nti
mɑ cɑɑ yɔɣɔtʋɣʋ tɔɣɔ nyəm təcɛɩcɛɩ.
5 N wɛ mɑ wɑɑlɩ nɑ mɑ lɔlɔ kɛ́,
nɑ ń tənəɣɩ nyɑ́ niŋ kɛ mɑ tɔɔ.
6 N nyəmɑ-m nɑ pə tɛɛ cɑɑsɑ.
Mɑ lɑŋlɛ hʋlʋmɑ kɑtɑtəlɑɣɑ.
Mɑɑ cɛkəɣənɑ pə tənɑɣɑ.
7 Leɣe mɑɑ polo nɑ mɑ́ hɑtələnɑ nyɑ́ ləmɑɣɑsɛɛ
yɑɑ leɣe mɑɑ se nɑ mɑ́ tɛɛ nɑ ń kɑɑ nɑ-m?
8 Ye mɑ kpɑ ɩsɔtɑɑ n wɛ tənɑ,
ye mɑ həntɑ ɑtɛtəlɛ tɑɑ,
nyɑ́ tɑɑ nyɑ́ tike.
9 Pɑɑ mɑ kʋlɑ hʋntʋ nɑ mɑ polo ilim təlɩɩlɛ,
yɑɑ mɑ tɛsɑ teŋku nɑ mɑ cɑɣɑ tənɑ.
10 Nyɑ́ niŋ kɛ n kɑ́ tiikinɑ-m tənɑ,
nɑ ń kpɑ-m nɑ nyɑ́ ntɔɣɔŋ.
11 Pɑɑ mɑ tɔmɑ sɩ: Səkpɛtʋɣʋ tɑkɩ-m.
Ahoo nɑ́ pəsəɣɩ nyɑɑləm kɛ́, nɑ pə́ cɔɔnɑ-m.
12 Səkpɛtʋɣʋ mɑɣɑmɑɣɑ tɑ kɛ-ŋ pʋlʋ.
Ahoo nɑɑkɩ-ŋ kɛ́ ɩsɩɩ ilim,
nɑ səkpɛtʋɣʋ nɑ́ɑ́ wɛɛ-ŋ ɩsɩɩ nyɑɑləm.
13 Nyɑ́ lɑpənɑ mɑ yʋlʋ pilimile
nɑ ń lʋʋ-m mɑ too lotu tɑɑ.
14 Mɑ sɛɛ-ŋ, mpi tɔ, mɑ kɛ́
kʋŋmɑŋmɑm mpi pə tewɑ tɔɣɔ.
Nyɑ́ kʋlɑpʋtʋ wɛ teu,
mɑ nyəmɑ́ ḿpʋɣʋ teu.
15 Wɑɑtʋ wei n ŋmɑɑkɑɣɑ-m ɩŋmɛlɑʋ tɑɑ
nɑ ń lʋʋkɩ-m mɑ too lotu tɑɑ tɔ,
mɑ tɔnʋɣʋ tɑ kɛ-ŋ pʋlʋ kʋŋmɛsəm.
16 Wɑɑtʋ wei pə tɑɑ ŋmɑɣɑtɑ-m tɔ n nɑɑkɑɣɑ-m,
hɑlɩ n ŋmɑɑ nyɑ́ tɑkəlɑɣɑ tɑɑ kɛ́ kʋyɛɛŋ wei n hɑ-m tɔ
nɑ ɩ́ tɑ cɑɑlətɑ.
17 Hɑɩ, Ɩsɔ, mɑɑ cɛkəɣənɑ nyɑ́ ləmɑɣɑsɛɛ.
A tɔɔwɑɣɑ pə tɩɩ fɛɩ.
18 Pɑɑ mɑ kɑləɣɩ-yɛ ɑ kəlɑ pɑɣɑlɛ kɛ kɑnyəŋɑ pee.
Pɑɑ mɑ kɑlɑɑ nɑ mɑ kʋkɑlətʋ tɛ, mɑ kɑɑ tɛ-ŋ cɛkənɑʋ.
19 Hɑɩ, Ɩsɔ, mɑ kooliɣi sɩ ń kʋ ɑsɑɣɑɑ.
Hɑtələnɑ-m yʋlʋkʋlɑɑ mpɛ.
20 Tɔm ɩsɑɣɑtʋ kɛ nyɑ́ kolontunɑɑ yɔɣɔtəɣɩ nyɑ́ tɔɔ,
nɑ pɑ́ kpɑkəɣɩ nyɑ́ hətɛ nɑ pɑ́ looliɣinɑ.
21 Tɑcɑɑ mɑ tɑɑ kpɑɑnɑ mpɑ pɑ tɑɑ kpɑɑnɑ-ŋ tɔɣɔ.
Mɑɑ cɑɑkɩ mpɑ pɑ kʋləɣɩ nyɑ́ tɔɔ tɔ.
22 Mɑ tɑɑ kpɑnɑ-wɛɣɛ nɑ pə́ tɛɛ mpəle.
Mɑ nyənəɣɩ-wɛɣɛ mɑ kolontunɑɑ kɛ́.
23 Hɑɩ, Ɩsɔ, nyənɩ mɑ tɑɑ nɑ ń cɛkənɑ mɑ lotu.
Mɑɣɑsɩ-m nɑ ń cɛkənɑ mɑ hʋwɛɛ.
24 Nyənɩ, yɑɑ mɑ wɛ mpɑɑʋ ɩsɑɣɑʋ tɑɑ?
Tiiki-m nyɑ́ mpɑɑʋ tɑm tɔɔ nyəŋkʋ tɑɑ.