38
Kʋtɔntʋ wei ɩ nyəmɑ ɩ təwɑkəllɛ tɔ ɩ sələmʋɣʋ
1 Tɑfiiti yontu nti
pɑ tɔɔsəɣənɑ Ɩsɔ tɔɔ tɔɣɔlɔ.
2 Tɑcɑɑ tɑɑ hɔ mɑ ŋkpɑŋʋɣʋ
yɑɑ ń tʋ-m sɑləkɑ nɑ pɑ́ɑ́nɑ́.
3 Mpi tɔ, nyɑ́ nyəmɑ́ yɑɣɑ-m kɛ́,
nɑ nyɑ́ niŋ yuŋ tii mɑ tɔɔ.
4 Nyɑ́ pɑ́ɑ́nɑ́ tɔɔ,
mɑ tɔnʋɣʋ fɛɩ təcʋŋŋ.
Mɑ kʋpəntʋɣʋ tɔɔ,
ɑlɑɑfəyɑ fɛɩ mɑ mʋwɑ tɑɑ.
5 Mɑ ɩsɑɣɑtʋ kəlɑ-m kʋŋkʋlʋməŋ.
Nɑ tə́ nɩɩ-m ɩsɩɩ səɣəlɑ sɔsɔɔnɑ.
6 Mɑ hiŋ tɑɑ lɑpɑ kʋsɔɣɔtʋ kɛ́ nɑ pə́ wɩɩkɩ.
Mɑ kʋmɛlɛntʋ kɑsəyɑɣɑ ntɛ́.
7 Wʋsɑsɩ kɔkəlɑ-m kɛ́ nɑ mɑ́ kɑwɑ kɑtɑtəlɑɣɑ.
Lɑŋwɑkəllɛ tɑɑ kɛ́ mɑ tɔŋ kʋyɛɛŋ tənɑ.
8 Wʋsɑsɩ sɔsɔɔnsɩ sɑləɣənɑ mɑ tənɑɣɑ tɑɑ.
Pʋlʋpʋ fɛɩ təcʋŋŋ kɛ́ mɑ tɔnʋɣʋ tɑɑ.
9 Pə yɔkɑ-m kɛ́ tənɑŋnɑŋ mɑ fɛɩ tomɑ.
Nɑ mɑ lɑŋwɑkəllɛ yeki nɑ mɑ́ mɔləɣɩ.
10 Tɑcɑɑ n nyəmɑ́ mɑ kʋnyɩɩləm kɛ teu.
Pəyele n nyəmɑ́ mɑ mɔlɑ.
11 Mɑ lɑŋlɛ tɔɔkɩ kɛ́ nɑ mɑ tomɑ tɛŋ.
Mɑ ɩsɛ nɑ́ɑ́ tɩɩ tɛŋ nɑʋ.
12 Mɑ tɑɑpɑlɑɑ nɑ mɑ ɑsəmɑɑ seeki mɑ wɑhɑlɑ.
Nɑ mɑ cɔlɔ nyə́mɑ hɑtələɣənɑ-m.
13 Mpɑ pɑ pɛɛkəɣɩ mɑ səm tɔ pɑ nyəkɩ-m kɑtɔsɩ
ɩlɛnɑ mpɑ pɑɑ cɑɑ-m nɑ kʋpɑntʋ tɔ
pɑ́ yɔɣɔtəɣɩ ɩsɑɣɑtʋ nɑ tɔm kʋtʋsʋtʋ kɛ tɑm.
14 Amɑ mɑ pəsɑ ntɑm kɛ́ mɑɑ nɩɩkɩ,
yɑɑ kɑmumukɑ mɑɑ yɔɣɔtəɣɩ nɑtəlɩ.
15 Mɑ wɛ kɛ́ ɩsɩɩ ntɑm,
mɑɑ cɔɔkɩ nɑtəlɩ.
16 Mɑ Ɩsɔ Tɑcɑɑ nyɑɣɑ mɑ tekiɣi,
nɑ mɑ́ tɑŋɑɑ sɩ ń cɔnɑ mɑ nɔɣɔ.
17 Hɑlɩ mɑ sələmɑ-ŋ sɩ ń tɑɑ yele nɑ pɑ́ pɑɑnɑ-m.
Yɑɑ pɑ́ kɛɛsənɑ mɑ cɛŋlʋɣʋ nɑ pɑ́ kʋlɩ mɑ tɔɔ.
18 Mpi tɔ, mɑ cɛɛ fiɣinuɣu kɛ́,
nɑ mɑ wʋsɑsɩ tɔɔsəɣɩ-m pə tɔm.
19 Mɑ tisɑ mɑ kʋpəntʋɣʋ kɛ́
nɑ kʋ tɔm cɑɑləɣɩ-m.
20 Mɑ kolontunɑɑ wɛnɑ ɑlɑɑfəyɑ kɛ́ nɑ tomɑ.
Mpɑ pɑ footiɣi-m mʋsʋŋ tɔ,
pɑ pɑɣɑlɛ wɛ sɔɣɔntʋ.
21 Ɩsɑɣɑtʋ kɛ pɑ lɛɛtəɣɩ-m mɑ kʋpɑntʋ lonte.
Mɑ pɛɛkəɣɩ kʋpɑntʋ tɔɣɔ pɑɑ cɑɑkɩ-m.
22 Mɑ Ɩsɔ Tɑcɑɑ, tɑɑ lɔ-m.
Pəyele tɑɑ hɑtələnɑ-m pooluŋ.
23 Mɑ cɑɑ, mɑ nyʋɣʋ yɑ́tʋ,
kɔɔ lɔŋ kɛ mɑ wɑɑsʋɣʋ.