55
Wei ɩ wɑɑlɩ pɑ lɩɩwɑ tɔ ɩ sələmʋɣʋ
1 Tɑfiiti yontu nti pɑ yookinɑ sɑŋkʋ nɑ tə́ wɛ
yonyoolɑɑ nyʋɣʋ tʋ yontunɑɑ tɑɑ tɔɣɔlɔ.
2 Hɑɩ, Ɩsɔ ke ŋkpɑŋŋ nɑ ń nɩɩ mɑ kʋsələmʋtʋ.
Tɑɑ kisi mɑ wiinɑʋ kɛ nɩɩʋ.
3 Nɩɩ mɑ tɔm nɑ ń cɔ-m,
nəɣəsɛɛ pɩɩnɑ-m nɑ mɑ́ cɔɔkɩ yem nɑ mɑ́ huɣutiɣi lotu.
4 Mpi tɔ, mɑ kolontunɑɑ nyɑɑsəɣɩ-m kɛ́,
nɑ ɑsɑɣɑɑ nɑ́ɑ́ ŋmɑkələɣɩ-m nɑ pɑ́ mələɣənɑ
mɑ nyʋɣʋ tɑɑ kɛ́ wɑhɑlɑ nɑ pɑ́ wɛ mɑ wɑɑlɩ nɑ pɑ́ɑ́nɑ́.
5 Mɑ lɑŋlɛ wɑkəlɑ sɔsɔm kɛ́,
nɑ səm sɔɣɔntʋ pɩɩ-m.
6 Sɔɣɔntʋ sɔsɔɔntʋ kpɑ-m kɛ́,
nɑ mɑ́ seliɣi.
7 Mɑ nyɩɩlɑɣɑ ɩsɩɩ ye mɑɑ wɛnɑ keŋ ɩsɩɩ ɑlukuku,
mɑɑ kʋlɑ hʋntʋ nɑ mɑ́ hɛɛsɩ.
8 Mɑɑ sewɑ nɑ mɑ́ polo pooluŋ
nɑ mɑ́ cɑɣɑ timpi nɔɣɔlʋ fɛɩ tɔ.
9 Mɑɑ sewɑ lɔŋ kɛ kɑcuculɑɣɑ
nɑ heelim sɔsɔɔm nɑ mɑ́ cɔɔsɩ.
10 Tɑcɑɑ, líɣítí mɑ kolontunɑɑ, pɑ́ tɑɑ nɩɩnɑ təmɑ.
Mpi tɔ, mʋsʋŋ nɑ ɩyoosile tike kɛ mɑ nɑɑkɩ ɩcɑtɛ tɑɑ.
11 Yoou cɔɔkənɑ tə koloosi kɛ ilim nɑ ɑhoo.
Kʋpəntəŋ nɑ ɑcilɑɣɑtʋ sunɑ tə tɑɑ.
12 Yʋlʋkʋlɛ wɛ tə tɑɑ kɛ́.
Pəyele ŋmɩɩləm nɑ tʋsʋɣʋ nɑ́ɑ́ lɑŋəɣɩ.
13 Ye pɩɩ kɛ́ kolontu tʋʋkənɑ-m pə tɑɑ lɑ-m pʋlʋ.
Yɑɑ ye mɑ pɑtɑ kɑ kʋlɑɣɑnɑ mɑ tɔɔ mɑɑ ŋmɛlɑ-ɩ.
14 Amɑ mɑ nɑ wei tə kɑɑwɑ nɑ mɑ tʋɣʋnɑ-ɩ tɔɣɔ,
ɩ kɛ́ mɑ tɑɑpɑlʋ nɑ mɑ ceu kɛ́.
15 Mɑ nɑ-ɩ tɩɩ wɛ təmɑ nɑ leleŋ kɛ́,
nɑ tɑ́ nɑ sɑmɑɑ tə puki Ɩsɔ təsɛɛlɛ tɑɑ.
16 Səm ɩ́ tuti mɑ kolontunɑɑ,
nɑ pɑ́ tii ɑtɛtəlɛ tɑɑ nɑ pɑ ɩsɛ.
Mpi tɔ, ɩsɑɣɑtʋ sunɑ pɑ tɑɑ.
17 Ɩsɔ kɛ́ mɑɑ wiinɑ,
nɑ ɩnɩ ɩ kɑ́ wɑɑsənɑ-m.
18 Tɑnɑŋ nɑ ilim tɑɑ nɑ tɑɑnɑɣɑ kɛ mɑ wiiki
nɑ ɩ́ nɩɩkɩ mɑ nɔɣɔ.
19 Ɩnɩ ɩ kɑ́ yɑnɑ-m nɑ ɩ́ yele nɑ mɑ́ hɛɛsɩ.
Mpi tɔ, mpɑ pɑ kʋləɣɩ mɑ tɔɔ tɔ pɑ wɛ pɑɣɑlɛ kɛ́.
20 Ɩsɔ wei ɩnɩ ɩ kɛ́ wulɑʋ kɛ too tɑm tɔɔ tɔ,
ɩ́ nɩɩ nɑ ɩ́ pɑsɑ-wɛ.
Yəlɑɑ mpɛ́ pɑɑ lɑɣɑsəɣɩ,
pə́cɔ pɑɑ nyɑŋnɑ Ɩsɔ.
21 Ɩ tʋ ɩ tɑɑpɑlɑɑ mpɑ ɩ́ nɑ-wɛ pɑ wɛ leleŋ tɔɣɔ niŋ.
Nɑ ɩ́ wɑkəlɩ nɔɣɔ ŋkɑ ɩ kɑ pɛɛlɑɑ tɔ.
22 Ɩ nɔɣɔ nɑ leleŋ kɛ́ ɩsɩɩ tɩɩŋ nɑ ɩ tɑɑ nɑ kɔkɔ,
nɑ ɩ fɑɑcinɑɑ tewɑ, ɩlɛnɑ ɩ tɑɑ nɑ sɑpəlɑsɩ.
23 Pɛtɩ nyɑ́ nəɣəsɛɛ tənɑɣɑ Tɑcɑɑ niŋ tɑɑ, nɑ ɩ́ pɑɑsənɑ-ŋ.
Ɩɩ yeki sɩ siɣisulu ɩ́ cɛŋlɩ.
24 Amɑ Ɩsɔ n kɑ́ yele nɑ yəlɑɑ mpɛ
pɑ tii pəlɑɑʋ tɑpʋɣʋ tɛɛ.
Yʋlʋkʋlɑɑ nɑ ŋmɩɩlɑɑ nɑ́ kɑɑ hɑɣɑ
pɑ pɩɩsɩ hɛkʋ nɑ pə́cɔ pɑ́ sɩ.
Amɑ nyɑɣɑ mɑ pɛtɑ mɑ tɩ.