57
Tɑfiiti sələməɣɩ ɩsɔtɑɑ Ɩsɔ sɔsɔ
(Kʋkɑlətʋ 8-12: Yontu 108:2-6)
1 Tɑfiiti yontu nti tə wɛ yonyoolɑɑ nyʋɣʋ tʋ
yontunɑɑ tɑɑ nɑ pɑ́ yɑɑkɩ-tɩ sɩ:
Tɑɑ kʋ tɔɣɔlɔ.
Tə tɑɑ kɛ́ Tɑfiiti kɛɛsəɣɩ ɩsənɑ ɩ sewɑ Sɑyuli nɑ ɩ́
ŋmɛlɩ kʋkpɑmʋɣʋ pʋʋɣʋ tɑɑ tɔ pə tɔm.
Yontu ntəɣəlɛ sɩ:
2 Hɑɩ, Ɩsɔ nyənɩ mɑ pətɔɔtəlɛ yoo,
nyənɩ mɑ pətɔɔtəlɛ.
Mpi tɔ, nyɑ́ kiŋ kɛ mɑ pɛɛkəɣɩ mɑ təcɔɔsəlɛ.
Mɑɑ ŋmɛlɩ tənɑ, nɑ n kenti mɑ tɔɔ,
hɑlənɑ wɑhɑlɑnɑɑ pɑnɛ pɑ́ tɛ.
3 Ɩsɔtɑɑ Ɩsɔ Sɔsɔ kɛ mɑ yɑɑkɩ.
Ɩnɩ ɩ lɑpənɑ-m pə tənɑ.
4 Ɩ kɑ́ wɑɑsɩ-m nɑ hɑtoo ɩsɔtɑɑ,
nɑ ɩ́ liɣiti wei ɩ tʋ mɑ wɑɑlɩ tɔ,
nɑ ɩ́ lɑ-m ɩ kʋpɑntʋ.
5 Mpɑ pɑ hɛkʋ mɑ wɛɛ tɔ
pɑ tɔkɩ yəlɑɑ kɛ́ ɩsɩɩ tɔɣɔlɑsɩ.
Pɑ kelɑ sɛŋtɑɑ kɛ́ ɩsɩɩ ŋmɑntɑɑsɩ nɑ nyəmɑ́,
nɑ pɑ nsəmlɛ nɑ lɔŋ ɩsɩɩ lɑɣɑtɛ.
6 Hɑɩ Ɩsɔ, nyɑ́ sɔsɔɔntʋ ɩ́ kəlɩ ɩsɔtɔnʋɣʋ kɛ kʋlʋɣʋ,
nɑ nyɑ́ teu nɑ tɛtʋ tənɑ tɔɔ.
7 Pɑɑ hulɑ pʋʋɣʋ kɛ mɑ mpɑɑʋ tɑɑ kɛ́,
nɑ kʋ lumsu-m.
Ɩlɛnɑ pɑ́ nyɩ-m kɑtɔkɑ.
Amɑ kʋlʋmɑɑ mpɛ pɑ hotinɑ kɑ tɑɑ.
8 Hɑɩ Ɩsɔ, mɑ nyɔɔ toŋ,
mɑɑ sɑ-ŋ nɑ mɑ́ pʋɣʋlɩ-ŋ.
9 Mɑ ləsɑɣɑ, fe,
mɑ cəmʋɣʋ nɑ mɑ sɑŋkʋ ɩ́ fe,
mɑɑ fe nɑ pə́cɔ pə́ nyɑɑlɩ.
10 Tɑcɑɑ mɑɑ sɑ-ŋ yəlɑɑ tɑɑ,
nɑ mɑ́ pʋɣʋlɩ-ŋ piitimnɑɑ tɑɑ.
11 Mpi tɔ, nyɑ́ kʋpɑntʋ sɔsɔɔntʋ tɑpɑ ɩsɔtɔnʋɣʋ kɛ́,
nɑ nyɑ́ teu nɑ́ɑ́ tɛɛ ɩsɔŋmʋntʋ tɔɔ.
12 Hɑɩ Ɩsɔ, kpɑɑsɩ nyɑ́ təɣɩ ɩsɔtɔnʋɣʋ tɔɔ,
nɑ nyɑ́ teeli nɑ tɛtʋ tənɑ tɑɑ.