71
Tɑcɑɑ, tɑɑ lɔ-m, nɔɔnɔɔ mɑ kpɑtəlɑɑ kɛ́
1 Tɑcɑɑ, nyɑɣɑ mɑ tʋɣɩ kpʋlʋɣʋ,
tɑɑ yele nɑ mɑ lɑŋlɛ wɑkəlɩ.
2 Wɑɑsɩ-m nɑ ń yɑ-m nyɑ́ siɣisuɣu tɔɔ,
ke nyɑ́ ŋkpɑŋʋɣʋ nɑ mɑ tɔɔ nɑ ń sənɑ-m.
3 Nyɑɣɑlɛ mɑ kʋkpɑmʋɣʋ ŋku mɑ cɔɔsəɣənɑ
nɑ mɑ tʋɣɩ kpʋlʋɣʋ kɛ tɑm tɔ.
Nyɑɣɑlɛ mɑ kʋkpɑmʋɣʋ, nɑ mɑ koluŋɑ ɩcɑtɛ.
4 Mɑ Ɩsɔ fiti-m ɩsɑɣɑʋ niŋ tɑɑ,
fiti-m wei ɩɩ təŋəɣɩ tɑmpɑnɑ
nɑ ɩ́ kɛ́ nyəməŋ tʋ tɔ ɩ niŋ tɑɑ.
5 Tɑcɑɑ Ɩsɔ, nyɑɣɑ mɑ tɛɛləɣɩ,
nyɑɣɑ mɑ pɛtɑ mɑ təɣɩ hɑtoo mɑ pəcɑɑtʋ.
6 Hɑtoo mɑ too lotu tɑɑ nyɑɣɑ mɑ tekiɣi,
nyɑ́ ləsənɑ-m mɑ too tɑɑ,
nyɑɣɑ mɑ sɑŋ tɑm.
7 Mɑ kɛ́ kɔkɔlɔ nyəm kɛ yəlɑɑ pɑɣɑlɛ kɛ́.
Nyɑɣɑlɛ mɑ kpʋlʋɣʋ tətʋlɛ toŋ nyəntɛ.
8 Nyɑ́ sɑmtʋ yontu tike ɩ́ wɛɛ mɑ nɔɣɔ tɑɑ.
Pə wɛɛ sɩ mɑ yɔɣɔtəɣɩ nyɑ́ teeli tɔm kɛ pɑɑ ɩfemle nte.
9 Tɑɑ lɔ-m, nɔɔnɔɔ mɑ kpɑtəlɑɑ kɛ́.
Wɑɑtʋ wei mɑ tomɑ pɑsəɣɩ tɔ tɑɑ lɔ-m.
10 Mɑ kolontunɑɑ yɔɣɔtəɣɩ mɑ tɔm kɛ́.
Mpɑ pɑ cɛŋəɣɩ mɑ weesuɣu tɔ pɑ lɑkɩ təmɑɣɑ sɑɑwɑlɑ sɩ:
11 Ɩsɔ lɔ-ŋ kɛ́, tə təŋɩ-ŋ nɑ tə kpɑ-ŋ.
Mɑ fɛɩnɑ nɔɣɔlʋ sɩ ɩ́ lɛɛkɩ-m pɑ niŋ tɑɑ.
12 Hɑɩ, Ɩsɔ, tɑɑ hɑtələnɑ-m.
Mɑ Ɩsɔ kɔɔ lɔŋ nɑ ń wɑɑsɩ-m.
13 Pɑ tənɑ mpɑ pɑ suuki-m tɔm tɔ,
pə́ liɣiti-wɛ nɑ pɑ́ sɑɑlɩ yem,
nɑ fɛɛlɛ tɔɣɔ mpɑ pɑ cɑɑ mɑ lepu tɔ.
14 Ɩlɛ mɑɑ tɛɛləɣɩ tɑm,
nɑ mɑ́ sɑŋɩ-ŋ nɑ mɑ́ lɛləɣɩ.
15 Nɑ mɑ nɔɣɔ yɔɣɔtəɣɩ nyɑ́ siɣisuɣu
nɑ nyɑ́ nyʋɣʋ yɑpʋ tɔm kɛ pɑɑ kʋyɑkʋ ŋku.
Mpi tɔ, mɑ tɑ nyɩ pə tənɑsɩ.
16 Mɑɑ yɔɣɔtɩ nyɑ́ təmɑ sɔsɔɔnɑ tɔm Tɑcɑɑ Ɩsɔ,
nɑ mɑ́ tɔɔsɩ nyɑ́ siɣisuɣu tike tɔm.
17 Hɑɩ, Ɩsɔ, hɑtoo mɑ pəcɑɑtʋ kɛ n sɛɣɛsɑ-m,
hɑlənɑ sɑŋɑ nyɑ́ teu tɔm kɛ mɑ kpɑɑləɣɩ.
18 Pɑɑ mɑ kpɑtəlɑɑ təkuŋkuŋku,
mɑ Ɩsɔ tɑɑ lɔ-m.
Ɩlɛ mɑɑ kpɑɑlɩ kʋfɑlɑŋ yəlɑɑ kɛ nyɑ́ tɔm
nɑ mɑ́ heeli cele piyɑ kɛ nyɑ́ toŋ tɔm.
19 Hɑɩ, Ɩsɔ, nyɑ́ siɣisuɣu fɛɩ tənɑɣɑ.
Pə́cɔ n lɑpɑ kɔkɔlɔ nyəmnɑɑ,
nɔɣɔlʋ tɑ nəɣəsənɑ-ŋ.
20 N yelɑɑ nɑ tə́ nɑ́ wɑhɑlɑnɑɑ nɑ
lɑŋwɑkəllɛ kɛ kɑtɑtəlɑɣɑ,
n kɑ́ yele nɑ mɑ́ wɛɛnɑ weesuɣu,
nɑ ń ləsɩ-m pʋʋɣʋ sɔsɔɔʋ tɑɑ.
21 Tɑɣɑnɩ mɑ nyʋɣʋ kɛ kʋsʋɣʋ,
hɛɛsɩ mɑ lɑŋlɛ.
22 Ɩlɛ Ɩsɔ mɑɑ sɑ-ŋ nɑ cəmʋɣʋ
nɑ mɑ́ yoo nyɑ́ teu tɔm kɛ yontu.
Nɑ mɑ́ tɑlɑ Ɩsɛɣɛlɩ Nɑŋŋ tʋ nyɑ́ nɑ sɑŋkʋ.
23 Mɑɑ tɑlɑ-ŋ nɑ yontu,
nɑ mɑ́ wiliti-ŋ nɑ mɑ nɔɣɔ
sɩ n yɑpɑ mɑ nyʋɣʋ.
24 Mɑ nɔɣɔ kɑ yɔɣɔtəɣɩ pɑɑ kʋyɑkʋ
ŋkuɣu nyɑ́ siɣisuɣu tɔm.
Mpɑ pɑ pɛɛkəɣɩ mɑ lepu tɔ fɛɛlɛ
pɩɩ-wɛɣɛ nɑ pə liɣiti-wɛ.