☰ KOLOSI 1
POLOME
KOLOSI
TANGE DUPANYA PEPA
PYAO PYASAKAMAIYAMO DOKO
Pii atupa wambao kandapenge
Yuu taono Kolosi dokonya sosa mende katea-pyaa. Polome siamopa endakali mendapu Kolosi ipupala sambo pii mendapua lelyamino lapae sepala pepa dake pyao Kolosi pyasia-pyaa. Dupame sambo pii dupa lao pituu, embame Gote masokondape pitinopa baame emba pyoo nyina lao kaitinya isingi dupapi enomba nyoo isoo katenge dupapi dupa lao loma sepenge. Dee mendapuame Juta dupa losuu lengemali pyoo elya-pingi kambu kepawapi nee mendapu daa laapape lawapi lelyamino lapae Polome sepala pepa dake pyao Kolosi pyasoo pituu, Jisasa Kataisame iki kapa pao endakali dupa pyoo nyetana lea-pyaa.
Polome Kolosi tange dupanya pepa pyao pyasakamaiyamo dokonya pii lyaa dupa:
1:1-8 Pii wambao pepanya piamo dupa
1:9–2:19 Jisasame piamo dupa lao panelyamo
2:20–4:6 Endakali dupa Kataisame enenge injisia
4:7-18 Polome pii etao lasa leamo dupa
1
1-2 Goteme** namba Polo Kataisa Jisasanya aposele katatena lao masiamoli pyoo kalyo. Dopa pyoo katao nambapa kaiminingi Timotipa nalimbame nyakama Gotenya endakali Kataisa lao masoo miningi kaiminingi Kolosi tange dupanya pepa dake pyao peekelyambano. Naimanya Takange Goteme nyakama kandao mona epe mende palyetala baame nyakamanya mona doko lyuu lasekena.
Polome Kitisene dupa masetala Gote lao yaka pilino lenge doko
3 Nalimbame** nyakama lao masetala loma silyamba dii lao naimanya Kamongo Jisasa Kataisanya Takange Gote doko kandao koteaka lao yaka pilino lenge. 4 Nyakamame* Kataisa Jisasa lao masoo minao katao Gotenya endakali dupa pitaka auu kayamaiyoo kalyamino lapae sepala dopa pilyambano. 5 Wamba* Wai Pii Epe kiningi doko nyakama-kisa tee pyao epeamo dokopa nyakamame pii dokonya masoo malisoo katenge doko sepeami. Dokonya nyakamame nyakamanya masoo malisoo katenge Goteme kaiti-kisa isakao kalyamo doko masetala, masoo minao auu kayamaiyoo kalyamino. 6 Wai* Pii Epe dokome yuu dupa pitakanya dii mandisoo tayao silyamo. Goteme naima kandao mona epe palelyamona lapae pii doko nyakamame tee pyao siami. Sepala dokonya tenge angi dupa etete masokondape pyoo masoo kateamino gii dokopa pituu Wai Pii Epe dokome nyakama-kisa mendai dopaka pia. 7 Wai* Pii Epe doko Kataisanya kendemane kalai awapa pyakamaingi akali nalimbanya mona setenge Ipapotasame nyakama langiamopa mana nyiami. Baame nalimba nisoo Kataisanya kalai mimi minao pyakamaingi. 8 Oli* Sipitisame nyakama sakatasipumopa nyakamame mende auu kaya kaya pyoo kalyaminona lao akali dokome nalimba langia.
9 Langiamo* doko nalimbame sepala gii dokopa pituu tee pyao kayala nayao koteaka lao nyakama nisoo loma soo kalyambano. Goteme pipimili lao masingi doko etete auu pyoo masalapale lao baanya mana kandapengepi auu pyoo masepengepi dupa pitaka baame nyakama dina lao nalimbame Gote-kisa tee lekelyambano. 10 Baame* dopa pitamopa nyakamame kapa pao Kamongonya endakali joo payao pitamino dupa pitaka baame auu kaengeli pyoo pitami. Dee nyakamame kalai epe pitamino dupa pitakame dii mandyuu Gote lao etete auu pyoo masokondape pyoo masoo katatamiaka. 11-12 Goteme** baanya pupu lapae etete epe singili pyoo nyakama etete kyoto injisetamopa nyakamame yapa maka nakayao kenda pipae dupa nyoo katao Takange Gote doko lao mona yaepao yaka pilino lao katatami. Baame baanya endakali tii pipae kalyamino dupanya epe setakamaiyamo dokonya yangi nyakama nyalapale lao baame nyakama auu pisetea. 13 Baame* naima iminjetaenya pupu lapae dokonya pyoo nyepala baanya mona setenge Ikininginya isingi dokonya auu pyoo katasia. 14 Baanya* mona setenge Ikiningi dokome naima kii tamao nyepae koo kunanya nepatae kalyamano.
Gotenya Ikiningi dokonya lao Polome leamo doko
15 Gotenya* Ikiningi doko naimame nakandenge Gote doko waingi tapae. Baa Gotenya wambao mandipae. Wapopae dupa pitakanya ulusale katenge. 16 Doko* Goteme baanya Ikiningi dokome yuupi kaitipinya kandengepi nakandengepi singi dupa pitakapi, kaitinya kiŋi joo isoo katenge dupapi, kamongo dupapi, isingi dupapi, enomba nyoo isoo katenge dupapi, dupa wapuina leamopa wapuia-pyaa. Dupa pitaka baanya jina lao baa tangeme wapuia-pyaa. 17 Dupa* pitaka nasiamopa baa wamba katea-pyaa. Dupa pitaka baa mambele siamo doko mee soaka kalyamo. 18 Dee* baa yonge dokonya aiyomba. Yonge doko sosa. Tee piamo doko baaka. Gotenya wambao mandipae doko baa malunya wambao sakatea. Baa dupa pitakanya mupa joo kalyanya dopa pia. 19-20 Goteme** baa tange itata baanya Ikiningi doko-kisa katatona lao masia-pyaa. Katapala yuupi kaitipinya singipi katengepi dupa pitaka dee tange mona setatona lao masia-pyaa. Kini baame masiamoli pyoo baanya Ikininginya taiyoko ita pokonya kai leamo dokonya-kaita epe yuu yongasia.
21 Wamba* nyakama Gote-pipa waka joo katao nyakamanya monanya masingi dokome baa-pipa yandapipili joo mana koo dupa minao kateami. 22 Dopaka* doko, indupa nyakama baanya enomba dokonya etete epe auu pipae koo tengepi mende nasingi kalyepale lao katasalanya Goteme baanya Ikiningi endakali jetala kumiamo dokonya-kaita baame nyakama baanya mona setenge injisia. 23 Dopana,* Goteme nyakama masoo miningi dokonya kyoto joo katasiamo doko nyakamame yakinala naenya minawaka kalyepape. Nyakamame Wai Pii Epe wamba siamino dokonya masoo malisoo katenge doko yakinalapale lao opale waka mendeme nyakama pyalya lao nyina lao kayala nayalapape. Wai Pii Epe dake yuu dupa pitakanya sepeami. Namba Polo Wai Pii Epe dakenyaka kalai akali jio.
Polome sosanya kalai pingi dokonya leamo doko
24 Nambame* nyakama nisoo indupa tanda nelyo dokonya mona epe palyoo kalyo. Nambame Kataisanya yonge sosa doko nisoo kenda pipae nyepenge malatae sipumu dupa nambanya yongeme kapa pisoo kalyo. 25 Nambame* nyakama nisatale lao Goteme kalai diamoli pyoo namba sosanya kalai akali jio. Baame baanya pii doko pitaka nambame lamaiyakao kalyale lao kalai doko namba dia. 26 Pii* doko wamba yuu gii peamo dupa pitakanya endakali dupame nakandena lao Goteme yalo piamoaka doko, indupa baame baanya endakali dupa-kisa panasetelyamo. 27 Goteme* pii yalo pyoo kateamo doko naimame endakali tata dupa pitakanya lamo lao eteteaka epe longo paka lamo lao masipimi laka lao masia. Pii yalo piamo doko dapa: Kataisa nyakama-kisa koko kalyamo. Nyakamame Gotenya yuu eteteaka epe dokonya katatamana lao masoo malisoo kalyamino dokonya tenge doko baa. 28 Naimame* Kataisanya lao pii lamaingi. Endakali dupa pitaka Gotenya enomba dokonya Kataisapa pakatae angi joo katasina latala, naimame mana tata tata dupa pitaka masoo, endakali dupa mendai mendai lao kandao isoo kalyepape lamaita mana lamaita pyoo kalyamano. 29 Kataisanya* pupu lapae dokome namba sakatasipumopa nambame endakali mendai mendai lao dupame dopa pyoo katena lao kalai lekeleke tao kyoto joo pilyo.
* 1:1-2 Lo 1:1; Ep 1:1 * 1:1-2 Lo 1:7 * 1:3 Ep 1:16 * 1:3 Pm 4-5 * 1:4 1 Ko 13:13 * 1:5 Ep 1:13,15; Kl 1:23; 1 Pi 1:3-4 * 1:6 Ap 14:3; 20:24,32; Lo 1:13; 2 Ko 6:1; 1 Ti 3:16 * 1:7 Kl 4:12; Pm 23 * 1:8 1 Ko 13:1 * 1:9 Ep 1:9,15-17; 5:17; Pl 1:9; Pm 6 * 1:10 Ep 2:10; Pl 1:27; Kl 3:10 * 1:11-12 Ep 1:19; 3:16 * 1:11-12 Jo 8:12; Ap 26:18; Ep 1:11,18; 5:8; 1 Pi 1:4; 2:9 * 1:13 Lu 22:53; Ep 1:21; 2:2 * 1:14 Lo 3:24; Ep 1:6-7; Ip 1:3 * 1:15 Jen 1:1-2; Sak 12:10; 2 Ko 4:4; Kl 1:18 * 1:16 Jo 1:3,10,18; Lo 8:29; 11:36; 1 Ko 8:6; Ep 1:10,21; Ip 1:3,6 * 1:17 Pot 8:22-31; Jo 1:1; 8:58 * 1:18 Ap 26:23; 1 Ko 15:20; Ep 1:22-23; 4:15; 5:23; Kl 1:15,24; Pa 1:5 * 1:19-20 Kl 2:9 * 1:19-20 Lo 5:1; Ep 1:7,10; 2:13-16; 1 Jo 2:2 * 1:21 Lo 5:10; Ep 2:1-2,12; 4:18-19 * 1:22 1 Ko 1:8; Ep 2:14-16; 5:27; Kl 2:13 * 1:23 Mk 16:15; Ap 2:5; 2 Ko 3:6; Ep 3:7,17; 1 Ti 3:16; Ip 3:14 * 1:24 Mt 5:11; 2 Ko 1:5; Ep 3:13; Kl 1:18; 2:1 * 1:25 Lo 15:19; 2 Ko 3:6; Ep 3:2,7-8 * 1:26 Lo 16:25-26; Ep 3:3-5,9-10 * 1:27 Ep 1:8; 2:12; Kl 3:4; 1 Te 4:13; 1 Ti 1:1 * 1:28 1 Ko 2:6; Ep 4:13 * 1:29 Ep 3:7,20; Pl 4:13; 2 Te 1:11
☰