☰ KOLOSI 3
3
1 Goteme* nyakama Kataisapa awapa malunya sakatasia. Ongonya nyakamame ketae kaitinya-tae epe dupa kutao nyoo kalyepape. Yuu ongonya Kataisa Gotenya kingi tolae-kaita kalyamo. 2 Nyakamanya* masingi dokome yuu dakenya oapi dupanya masala naenya ketae kaitinya epe dupa masoo kalyepape. 3 Doko* aipuma? Nyakama yuu dakenya mana koo dupanya kumateami. Dee indupa lete auu pyoo kalyamino enenge doko Goteme Kataisa-pipa Gote baa-kisa yalo pyekea. 4 Nyakama* lete katasingi Kataisa baa panao ipatamo dokopa Goteme nyakama baa-pipa awapa tii pipae dokonya panaseta!
5 Tenge* ongonya minao nyakamame yuu dakenya mana dapale nyakamanya monanya singi dupa pyao kumasalapape: endakalipi nyele-nyele paenge dokopi, elya pingi napipenge pingi dokopi, elya pingi pyowanimi kumapala putiti kaenge dokopi, endakali mendenya opale mende nyipu laka lao masingi dokopi, mana dupa pyao kumasalapape. Nyipu laka lao masingi mana doko sambo gote tama pingi mana mende. 6 Mana* dopale dupa minao Gotenya pii nepenge endakali dupa Goteme imbu kayao yanu nyala epelyamo. 7 Wamba* nyakama endakali dupa-pipa awapa kateamino gii dokopa nyakamame apata mana dopale dupa watao miniami. 8 Dopaka* doko, indupa tii lengepi, imbu kaengepi, mona koo palengepi, pii koo lengepi, mokolipi lengepi mana dopale dutupa apata nyakamame soo nepalapape. 9-10 Nyakamame** akali wambatae nyakamanya monanya katenge dokopi dokonya mana koo dupa-pipa watao nepatala akali enenge doko nyakama-kisa nyoo kateami. Dokonya nyakamame nyakamanya mende sambo lamai lamai napyepape. Akali enenge Goteme wapuiamo dokome baa waingi tao etete auu pyoo masoo katena lao baame enenge injisoo katenge. 11 Enenge* joo katenge dokonya tata wakapi dee Juta endakalipi, elya pingi kambu kepapaepi dee kepala naengepi, pii tata waka kelyo kalyo lao lengepi, yana katatope joo katengepi, kendemane endakalipi, mee endakalipi dupa wakale wakale joo nakatenge. Enenge joo katenge dokonya Kataisa iki angi. Dupa pitakanya baaka angi!
12 Nyakama* Gotenya yapao nyepae. Nyakama baanya endakali etete epe baame auu kayapae. Dopana, nyakamame endakali yango moname kondo kayamaingi dokopi, auu pisingi dokopi, anasale joo katenge dokopi, andiki andiki pyoo katenge dokopi, yapa maka nakaenge dokopi, mana dutupa yonge pee joo pee pyoo katao kenda pipae dupanya mende nisa nisa pyoo kalyepape. 13 Nyakamanya* mendeme mende-kisa koo tenge mende setapenge jia kandeno doko, nyakamame baanya koo dupa kunao nepakamaiyepape. Kamongo dokome nyakama kondo kayao nyakamanya koo dupa kunao nepekeamoli pyoo nyakamame nyakamanya mendenya koo dupa kunao nepakamai nepakamai pyoo kalyepape. 14 Auu* kayamaingi mana dokome mana dutupa pitaka etete epe jina lao nyoo mendai injisingina, nyakamame auu kayamaingi doko mana dutupanya konda pyoo minao kalyepape. 15 Mona* lyuu lasekenge Kataisa dokome nyakamanya monanda doko isekena lao kalyepape. Nyakama dopa pyoo katao yonge mendai joo kalyepale lao Goteme nyakama ipupa lea. Dee nyakamame baa lao yaka pilinona lao masoo kalyepape. 16 Kataisanya** pii doko nyakamanya mona koko dokonya longo lao sina lao kalyepape. Mana kandenge dupa pitakame mende mana lamai lamai pyoo, kandao isoo kalyepape lao lamaiyepape. Nyakamanya mona dokome Losuu Wee dupa lao, Gote lao tama pingi wee dupa lao, masoo miningi dokonya wee dupa lao kalyepape. 17 Nyakamame* pii latamino dupapi, kalai pitamino dupapi, dupa pitaka Kamongo Jisasa lao masoo pyepape. Nyakamame baa-kisa Takange Gote doko lao yaka pilino laapape.
Enenge joo katenge dokonya endakali yango dupa-kisa kalai pipenge dupa
18 Nyakama** enda dupame nyakamanya akalingi dupanya pundipundi joo pilyepape. Dopa pingi mana doko Kamongo-kisa kapa penge. 19 Nyakama* akali dupame nyakamanya etanenge dupa auu kayao kalyepape. Nyakamame dupa kandao imbu imbuaka kayamaiya nayalapape.
20 Nyakama* wane dupame nyakamanya endangi takangepa dolaponya pii dupa pitaka auu pyoo sakamaiyepape. Dopa pitamino mana doko Kamongome auu kayata. 21 Aopyoo* latala wane dupame mona koo palyetamina, nyakama takange dupame nyakamanya wane dupa imbu pisala nayalapape.
22 Nyakama** kendemane dupame nyakamanya isa yuu dakenya kamongo dupanya pii dupa pitaka auu pyoo sakamaiyoo kalyepape. Mona lapo palyala nayao endakali dupame auu kaena lao nyakama kandatamino dokopa iki kalai pyaa naenya Kamongo Kataisa paka kayamaiyoo pyoo kalyepape. 23 Nyakamame* kalai pitamino dupa pitaka nyakamanya mona dokome endakalinya kalai pyakamailyamanona lao masala naenya Kamongonya kalai pyakamailyamanona lao masoo pyepape. 24 Kamongome nyakamanya epe setekeamo doko yole joo ditana lao masilyamino. Dokonya nyakamame Kamongo Kataisanya kalai pyakamaiyoo kalyepape! 25 Endakali* koo kalai pitamo dokome baanya koo kalai pitamo dokonya dee tange yanu nyeta. Goteme endakalinya lengelyaapi kandao mokosala naenge.
* 3:1 Wee 110:1; Mk 12:36; 16:19; Ap 2:33; Ep 1:20; 2:6; Pl 3:20; Kl 2:12 * 3:2 Mt 6:33 * 3:3 Lo 6:2; 2 Ko 5:14; Pl 1:21 * 3:4 Lo 8:19; 1 Ko 15:43; Kl 1:27; 1 Pi 5:1; 1 Jo 3:2 * 3:5 Lo 1:29; 6:6,11-12; 8:13; Ga 5:24; Ep 4:19,22; 5:3-5 * 3:6 Lo 1:18; Ep 5:6 * 3:7 Ep 2:2-3; Ta 3:3; 1 Pi 4:4 * 3:8 Ep 4:25-31; 5:4 * 3:9-10 Lo 6:6; Ep 4:22,25 * 3:9-10 Jen 1:26-27; Ep 4:22-24 * 3:11 Jen 11:1; 1 Ko 12:13; 15:28; Ga 3:27-28; Ep 4:13 * 3:12 Ep 4:1-2,32; 1 Pi 2:9 * 3:13 Mt 6:14; 18:21-35; 2 Ko 2:7; Ep 4:32; 1 Te 5:15 * 3:14 Lo 13:8-10; 1 Ko 13:13 * 3:15 1 Ko 12:12-13,27; Ep 2:16; 4:3-4; Pl 4:7 * 3:16 Ap 16:25; Ep 4:29 * 3:16 Ep 5:19-20 * 3:17 1 Ko 10:31 * 3:18 Ep 5:21–6:9 * 3:18 Ta 2:5; 1 Pi 3:1 * 3:19 Ep 5:25; 1 Pi 3:7 * 3:20 Ep 6:1 * 3:21 Ep 6:4 * 3:22 1 Ko 7:21-23; Ep 6:5; 1 Ti 6:1; Ta 2:9-10; Pm 16; 1 Pi 2:18 * 3:22 Ep 6:5-8 * 3:23 Lo 12:11 * 3:25 Lo 2:11
☰