3
Polome endakali tata waka dupa-kisa kalai piamo doko
1 Tenge ongonya minao namba Polo Kataisa Jisasanya anjetae akali dokome nyakama endakali tata waka dupa nisalanya Gote lao loma sekelyo.
2 Kini, nambame nyakama nisatale lao Goteme mona epe palyetala namba kalai diamo doko nambame dopa pyoo piana lapae doko sepeami.
3 Goteme baanya pitona lao masingi yalo pyoo masoo kateamo doko namba-kisa panasipumopa nambame kandatala pii kuki dutupa wambao pepa pyekelyo.
4 Nyakamame pii dutupa itaki pyao kandatamino dokopa Goteme Kataisa-kisa pitona lao yalo pyoo masoo kateamo doko nambame auu pyoo masilino lao masetami.
5 Yalo pyoo masoo kateamo doko indupa Goteme baanya aposele epe dupapi potopesa epe dupa-kisapi Oli Sipitisa dokome panasetelyamoli pyoo wamba yuu gii peamo dupanya endakali dupa-kisa dopa pyoo panasala naya-pyaa.
6 Yalo pyoo masiamo doko dapa: endakali tata waka dupame Juta endakali dupa-pipa awapa Wai Pii Epe dokonya-kaita Gotenya epe dupa nyoo, yonge mendai joo katao, Goteme Kataisa Jisasa-kisa epe ditona leamo doko nyetami.
7 Goteme baanya pupu lapae dokome kalai pingili pyoo mona epe palyoo baame namba epe mende ditala Wai Pii Epe dakenya kalai akali joo kata lea.
8 Gotenya endakali dupa pitakanya namba etete anasale joo kalyo. Dopaka doko, baame namba epe dake mee dia: Kataisanya etete epe kapa pao kandao etala nayapenge dupa nambame endakali tata waka dupa lamaiyoo kata lea.
9-10 Dee baame pitona lao yalo pyoo masoo kateamo doko indupa aipa pyoo isoo kalai pilyape lao endakali dupa pitakame kandena lao nambame panasoo lamaiyoo kata leaka. Dupa pitaka wapuiamo Gote dokome wamba yuu gii peamo dupa pitakanya baanya masingi doko yalo pyoo masoo kateamoaka doko, indupa baame baanya mana kandapenge tata tata dupa isingi kaitinya kalyamino dupapi enomba nyoo isoo kalyamino dupapi dupa sosame laitaka pina lao dopa pia-pyaa.
11 Yuu wamba waka Goteme pitona lao masiamo doko naimanya Kamongo Kataisa Jisasa-kisa petea.
12 Naima Kataisapa pakatae katao baa lao masoo minilyamano dokome naima etete paka nakayao Gote kalyamo dokonya kapa pao pupenge jilyamo.
13 Ongonya nambame pii dake nyakama langilyo: nambame nyakama nisoo lekeleke tao kalyo doko masetala nyakamame mona kumala nayalapape. Namba tanda nyilyo datupame nyakamanya kenge doko minalyekelyamo.
Kataisanya auu kaenge doko masina lao Polome loma siamo doko
14 Dee tenge ongonyaka minao nambame Takange lao luma lakao loma silyo.
15 Ketae kaitinya kalyamino dupapi isa yuunya kalyamino dupapi palu doko pitaka Takange Gote mambele kenge soo kalyamino.
16-18 Takange Gote etete tii pyoo kalyamoli pyoo baame baanya Oli Sipitisa dokome nyakama-kisa koko katenge akali enenge doko etete kyoto joo katekena lao kyoto injisakatamopa, masoo miningi dokonya Kataisa nyakamanya monanda dokonya katekena lao loma sekelyo. Dee Goteme nyakama auu kaenge dokonya pingi pyambatala kyoto injisoo katasetamopa, nyakamame kyoto joo katao nyakamapi Gotenya endakali dupa pitaka-pipame Kataisanya auu kaenge doko yale paka lamo lao, londe etete lamo lao, ketae waka lamo lao, isa onosa waka lamo lao, kapa pao masalapale lao loma sekelyo.
19 Kini, nyakamame Kataisanya auu kaenge etete masala nayapenge doko masalapale lao Goteme baanya epe tumbatae dupa pitakame nyakama tumbasekena lao loma sekelyo.
20 Gote pupu lapae dokome naima-kisa kalai pyoo kalyamoli pyoo baame naimanya loma soo tee lapengepi masepengepi dupa pitaka kapa pao ita minao baame eteteaka longo pyekenge.
21 Sosa-kisapi Kataisa Jisasa-kisapi yuu gii dupa pitakanya tanga tangapi Gote dokoaka lao tama pipenge lamo! Kiniaka.