☰ 1 TESALONAIKA 1
POLOME
TESALONAIKA
TANGE DUPANYA PEPA
WAMBAO PYAO PYASAKAMAIYAMO DOKO
Pii atupa wambao kandapenge
Timotimi Polo baa lamaiyamo pii dupa sepala pepa dake pyao pyasia-pyaa. Baame Tesalonaika tange dupanya masoo miningi dupa masetala dupanya mende auu kaya kaya pingima dokonya Gote lao yaka pilino lao, wamba baa dupa-pipa awapa katao pituu mana miniamo dupa lao pepa pia-pyaa.
Tesalonaika tange dupame Jisasa dee ipatamo dokonya pisoo pituu, Kataisa dee naipupumopa masoo miningi endakali kumatami dupa Kataisame lanyetamopa lete etete katatamipi daape lawapi baa andukupa ipata laape lawapi pisiamino dupanya yanu pyao nyakamame kalai pilyaminoli pyoo mona paliuu pyoo kalyepape lea-pyaa. Jisasa dee ipupala baa lao masoo miningi endakali sakapi kumapaepi dupa pitaka lanyetana lea-pyaa.
Polome Tesalonaika tange dupanya pepa wambao pyao pyasakamaiyamo dokonya pii lyaa dupa:
1:1 Pii wambao pepanya piamo dupa
1:2–3:13 Yaka pilino lenge piipi tama pingi piipi dupa
4:1-12 Kitisene mana minina lao sakatasingi pii dupa
4:13–5:11 Kataisa dee ipatana lao pii dupa
5:12-22 Polome dupa pupu lasoo leamo doko
5:23-28 Polome pii etao lasa leamo dupa
1
1 Namba* Polopi, Silipenasapi, Timotipi naimame naimanya Takange Gotepa, Kamongo Jisasa Kataisa-pipa awapa Tesalonaika yuu dokonya sosa kalyamino endakali dupanya pepa dake pyao peekelyamano. Goteme nyakama kandao mona epe mende palyetala nyakamanya mona doko lyuu lasekena.
Tesalonaika tange dupame masoo minao mana epe miniamino doko
2 Naimame* loma soo pituu, nyakama pitaka masilyamali pyoo koteaka lao Gote kandao yaka pilino lenge. 3 Nyakamame* Gote lao masoo minao kalai pilyamino dupapi, nyakamame endakali auu kayapimino dokome kyoto joo dupa nisilyamino dupapi, nyakamame Jisasa Kataisa lao masoo malisoo kyoto joo kalyamino dokopi dupa naimanya Gote-kisa Takange dokonya enombanya naimame kame nasingi. 4 Kaimia* paluma, Goteme nyakama auu kayapala yapao nyiana lao naimame masoo kalyamano. 5 Doko,* naimame Wai Pii Epe nyakama-kisa lao paneamano doko mee pii iki daa. Pii doko pupu lapaepi, Oli Sipitisapi paleta dokona, naimame etete kapana lao maseteama. Dopana nyakama auu pyoo kalyepale lao naima nyakama-pipa tole kateamano mana doko nyakamame masilyamino. 6 Naimapi* Kamongo dokopimi piamanoli pyoo nyakamame piami. Nyakamame pii doko soo tanda longo neaminopa Oli Sipitisame nyakama mona yaepasia. 7 Dopa* piamopa, masoo minao paenge endakali yuu Masetoniapa Akayapa dolaponya katenge dupa pitakame mana kandena lao nyakama kateami. 8 Kamongo* dokonya pii lapae doko nyakama-kisa soo yuu Masetoniapa Akayapa dolaponya tayatelyamo. Dee nyakamame Gote masoo minilyamino dokonya atome pii doko yuu dupa pitakanya tayatelyamoaka. Tayatelyamo dokonya naimame pii mende dee lapenge nanjilyamo. 9-10 Nyakamame** naima auu kayao lanyiamina lawapi, kiningi Gote lete katenge dokonya kendemane jemana latala, baanya Ikiningi doko kaiti-kisa katao ipatamo doko malisemana lao sambo gote dupa maita maitala Gote lao mona kapilyiamina lawapi dupa Masetonia tangepi Akaya tangepi dupame atome lengema. Goteme naima imbu kayatamo dokonya naima Pyoo Nyetamo Akali Jisasa doko, Goteme malunya sakatasia.
* 1:1 Ap 15:22; 16:1; 17:1; Lo 1:1,7; 2 Ko 1:19; 2 Te 1:1-2 * 1:2 Lo 1:9-10; Pl 1:3-4; Kl 1:3; 2 Te 1:3,11; 2:13 * 1:3 Lo 8:25; 15:4; 1 Ko 13:4-7; Kl 1:4-6; 1 Te 5:8; Pa 2:2 * 1:4 Lo 1:7; 2 Te 2:13; 2 Pi 1:10 * 1:5 Ap 1:8; 20:18; 1 Ko 2:4-5; 4:20; 2 Ko 12:12 * 1:6 Ap 13:52; 17:5-9; Lo 14:17; 1 Ko 4:16; 11:1; Ga 5:22-23; 1 Te 2:10; 3:3; 2 Te 1:4; 3:7,9 * 1:7 Lo 15:26; 2 Te 1:4; 1 Pi 5:3 * 1:8 Lo 1:8; 2 Te 3:1 * 1:9-10 Ap 14:15; Ga 4:8 * 1:9-10 Mt 3:7; Ap 17:31; Lo 2:5-6; 5:9; 1 Te 2:19-20; 4:16-17; 5:9; Ta 2:13
☰