☰ PILIPAE 1
POLOME
PILIPAE
TANGE DUPANYA PEPA
PYAO PYASAKAMAIYAMO DOKO
Pii atupa wambao kandapenge
Masetonia Potopinja dokonya taono Pilipae doko siamopa Loma tangeme isia-pyaa. Polo baa tee pyao yuu Yutope pupala taono Pilipae dokonya Wai Pii Epe doko lamaiyamopa sosa mende katea-pyaa. Sosa dokome Polo baa anjetae paleamopa oapapi daa jilyamo lapae sepala Pilipae tange dupame nisiami-pyaa. Dopa piamino dokonya yaka pilyaminona lao pepa pyao pyasia-pyaa. Dopa pyoo pituu dupame nyakamanya kenda pipae dupa masala naenya Jisasa Kataisa lao masoo mona yaepao kyoto joo katena lao kyoto injisoo pepa pyao pyasia-pyaa.
Polome Pilipae tange dupanya pepa pyao pyasakamaiyamo dokonya pii lyaa dupa:
1:1–11 Pii wambao pepanya piamo dupa
1:12–26 Polo baa dopa pyoo kalyo lao leamo doko
1:27–2:18 Kitisene dupa Kataisapa kopatae katenge
2:19–30 Timotipa Ipapotaitasapame kalai pitambino doko
3:1–4:9 Opale mendeme nyakama koyasetana yandapipa dupa kandao isoo kalyepape
4:10–20 Pilipae dupame yaka pilyaminona leamo doko
4:21–23 Polome pii etao lasa leamo dupa
1
1 Polopa* Timotipa nalimba Kataisa Jisasanya kendemane dolapome nyakama Pilipae tange Kataisa Jisasa-pipa pakatae kalyamino Gotenya dupa pitakapi, setao katenge akali dupapi, nisingi akali dupapinya pepa dake pyao peekelyambano. 2 Naimanya* Takange Gotepa Kamongo Jisasa Kataisapame nyakama kandao mona epe mende palyetala nyakamanya mona doko lyuu lasekena.
Polome Pilipae tange dupanya loma sakamaiyamo doko
3 Nambame* nyakama lao masilyoli pyoo koteaka lao nambanya Gote doko kandao yaka pilino lenge. 4-5 Nyakamame* Wai Pii Epe doko tee pyao siamino gii dokopa pituu Wai Pii Epe lamaingi kalai dokonya namba-pipa awapa piamino doko pyoaka ipao indupa tuu lelyamino. Dokonya nambame koteaka lao nyakama pitaka nisoo loma silyoli pyoo mona yaepao loma soo tee lekenge. 6 Nambame* dapa lao masokondape pyoo masingi: Goteme nyakama-kisa kalai epe mende tee pyao piamo doko pyoaka katao Kataisa Jisasa dee ipatamo gii dokopa pyoo etatana lao masingi. 7 Nyakama* nambanya mona itange etete! Dokonya nambame nyakama pitaka kandao dopa lao masingi doko kapa pelyamo. Namba anjetae palipu dokopapi, dee endakali dupame Wai Pii Epe nambame lamaingi doko kaya lao namba kosimi lapiminopa nambame Wai Pii Epe doko kiningina lamaitoana lao yanu pyao pupu lasipu dokopapi, nyakama pitakame Goteme kalai namba diamo doko awapa pilyamino. 8 Goteme* kandamupa kiningi lelyona, Kataisa Jisasame endakali dupa eteteaka auu kaengeli pyoo nambame nyakama auu kayao kandapu laka lao neame kumilyo.
9 Dee* nambame dapa lao loma sekenge: nyakamame angi dupa masokondape pyoo masingi dokopa mana doko epepe koope lao yapakondape pyoo yapenge mana dokopa mana dolapo minao mende auu kayamai kayamai pyoo auu kayamaiyoo kalyepale lao loma sekenge. 10 Dopa* pyoo katao nyakamame angi dupa yapao nyoo nyakama-kisa koo tengepi mende nasingi auu pipae katao Kataisa dee ipatamo gii doko kandao nyetami. 11 Dee* Jisasa Kataisame nyakama sakatasetamopa nyakamame mana tolatae dupa longo lao minao payao Gote lalyoo tama pyoo katatamiaka.
Polome namba Kataisanya iki kalyona leamo doko
12 Kaimia* paluma, namba-kisa piamo dupame Wai Pii Epe doko kaita lyokala naenya, lao tayatale lao nisiana lao nyakamame masipimi laka lao nambame masilyo. 13 Dopa* piamo dokonya Kapomane Isingi Mupa dokonya anda isoo katenge yanda singi dupa pitakapi endakali waka ae katapimino dupapimi namba Kataisanya kalai pyakamaingi dokonya anjetae kalyeno lao masilyamino. 14 Dee namba anjetae kalyo dokonya masoo miningi kaiminingilongo dupame Kamongo lao masokondape pyoo masoo minatala paka nakayao Wai Pii Epe doko etete kyoto joo lao panelyamino.
15 Kini,* kaiminingi yangi dupame nambapa tilya nyoo namba ita minalanya Kataisanya lao pii lamailyamino. Dopaka doko, yangi dupame kiningi mona mendai palyoo lamailyamino. 16 Mona mendai palyoo Kataisanya lao pii lamailyamino akali dupame Wai Pii Epe doko auu pyoo sina lao nambame kyoto injisoo kalyale lao Goteme namba katasia lamo lao masetala namba auu kayao pii lamailyamino. 17-18 Dopaka doko, yangi dupame kopeta masoo nyakama tange andake jipuma laka lao masetala Kataisanya lao pii lamailyamino. Dupame namba anjetae palelyo dokonya kenda pipae mendapua waipa soo dyaanya dopa pilyamino doko nambame angi mende daana lao masilyo. Mana dupa pitakanya—sambo mona lapo palyoo Kataisanya lao pii lamailyamino dokopi kiningi mona palyoo pii lamailyamino dokopi—mana dupa pitakanya akali dupame Kataisanyaka lao pii lamailyamino. Dokonya namba mona epe palyilyo doko tendapi dopaka pito.
19 Nyakamame* loma soo tee lekenge dokonyapi Jisasa Kataisanya Oli Sipitisa dokome nisingi dokopinya nambanya kosa dake etatamo dokopa namba kapa pao auu pyoo katato lao masoo lelyo. 20 Dee* nambame dapa pitona lao kyoto joo masoo katenge: nambame kalai mendaipi mendenya kapa pao elya sala naenya paka nakayao kyoto joo koteaka lao pingiliaka pyoo indupa apata lete katato kandawapi kumato kandawapi dokome nambame Kataisaka lalyetoana lao masilyo. 21 Doko* nambanya masingi dokome namba Kataisanya iki kalyona lao masilyo! Kumapala epe dupa longo lao nyepengena lao masilyo. 22 Dopaka* doko, namba lete mee katato kandao doko, nambanya kalai dokome dii mandita. Dokonya nambame kaitini andukunya watao minawape lao masala naelyo. 23 Nambame* kaitini dolaponya andukunya watao minawape lao mona lapo palelyamo. Namba pao Kataisapa awapa katapu laka lao masilyo. Doko epe etete! 24 Dopaka doko, nambame nyakama nisoo katapenge doko etete tenge angi jilyamo. 25 Nambame* doko kiningina lao masetala namba lete mee nyakama-pipa awapa katao nisalapo lao masilyo. Dopa pitopa nyakamame masoo miningi dokonya minama-minama pyoo minao mona yaepatami. 26 Dopa* pitaminopa namba nyakama katatamisa dee ipato tenge dokonya nyakamame Kataisa Jisasa kandao etete lalyetami lao masilyo.
27 Nambame* mendai mende iki nyakama langilyo: nyakama payatamino dokome Kataisanya lao Wai Pii Epe doko nyepae endakali joo payalapape. Dopa pitaminopa nambame nyakama kanja ipatopi naipatopi nyakama mona mendai palyoo kyoto joo katao, masingi mendai iki palyoo tole payao Wai Pii Epe masoo miningi doko kiningina lao kyoto injisalanya lekeleke tao lamaiyoo kalyamino lapae so 28 Nyakamame* nyakamanya yandapipili akali dupanya mana mendaipi mendenya paka nakayalapape. Dopa pitamino dokome dupa kapa pao koyataminopa nyakama auu pyoo katatamina lao dupa laitaka pita. Doko Gote mambele nyakama dopa pyoo katatami! 29 Baame nyakama-kisa mana epe minao Kataisanya joo kalyepa latala, Kataisa lao masoo minalapape iki laa naenya, Kataisanya kalai doko pyoo tanda nalapape leaka. 30 Wamba* namba lekeleke tao kateopa kandeamino doko indupa mee lekeleke tawaka kalyeno lapae silyamino. Kini, nyakama apata lekeleke telyo mendai dokonya lekeleke tawaka kalyamino.
* 1:1 Ap 16:1,12-40; Lo 1:1; 2 Ko 1:1; Ga 1:10; Kl 1:1; 1 Te 1:1; 2 Te 1:1; Pm 1 * 1:2 Lo 1:7; Ga 1:3; Pm 3 * 1:3 Lo 1:8; 1 Ko 1:4; 1 Te 1:2 * 1:4-5 Pl 1:18,25; 2:2,29; 3:1; 4:1,4,10; 1 Te 5:16 * 1:6 1 Ko 1:8; Pl 1:10; 2:13,16 * 1:7 Ap 21:33; 2 Ko 7:3; Ep 3:2; 6:20; Pl 1:30 * 1:8 Lo 1:9; 2 Ko 1:23 * 1:9 Kl 1:9-10; Pm 6 * 1:10 1 Ko 1:8; Pl 1:6; 2:16; 1 Te 5:23; Ip 5:14 * 1:11 Jo 15:8; Pl 3:9; Ip 12:11; Je 3:18 * 1:12 Lu 21:13 * 1:13 Ap 28:30; Ep 3:1; 2 Ti 2:9 * 1:15 Pl 2:20-21 * 1:19 Jop 13:16; Ap 16:7; 2 Ko 1:11; 2 Ti 4:17 * 1:20 Lo 14:8; 1 Ko 6:20; 2 Ko 1:5; 1 Pi 4:16 * 1:21 Ga 2:20 * 1:22 Lo 1:13; Kl 3:3-4 * 1:23 2 Ko 5:8 * 1:25 Pl 2:24 * 1:26 1 Ko 15:31; 2 Ko 1:14; 5:12; Pl 1:4; 2:16; 1 Te 2:19 * 1:27 Ap 4:32; Ep 4:1; Pl 4:3; Kl 1:10; 2:5 * 1:28 2 Te 1:5 * 1:30 Mt 5:11; Ap 16:19-40; Pl 1:7,13; Kl 1:24; 1 Te 2:2; 2 Te 1:4-7
☰