12
Kwallibelø larrø kailan kemesra wamindig
(Mt 21.33-46; Lc 20.9-19)
1 Incha Jesúsbe ‘øyeeg lataitøwein køn’ chib kemesra wamindiiløtøga eshkab menda, trenchibig køn:
—Kan møg nuim pirau uvas tra mara, trugurrimbe panig pasra, uvas piwan wesrumikkucha pirau tamara pasra, katø tru ellmarigwan ashib laramig kan ya-unø palaig mara pasran cha. Incha nui pirøwan katøganelan misrigwan pirishinrraptø kwallchai tranabe, yabsrømay yan cha.
2 Incha yandø lurramig puben, nui kan karuindiig megabigwan tru kwallchab utabelan tru kanbalø lurrigwan utønrrai karua øriibe,
3 nømbe nun kemøra, kurragucha, chiguchagaig ørøbelø køn cha.
4 Inchen tru puaibe katøgan karuindiig megabigwan øren, truigwane turyu larrøgucha, nømbe tsalø wamabelø køn.
5 Inchen tru ellmarig puaibe katøgucha katøgan karua øren, truigwane kweetsin køben, katøbe mas yam øren, kanelane kurrabetab, kanelane kweechib inchibelø køn.
6 ’Inchen srabe yandø katøgucha kandø kørrømisrøbig køn, truibe nui trag nusrkai, undaaraig. Incha yandø srabebe truigwan ørøbig køn, trenchib: “Nai nusrkawane chinchimønrrun” cha.
7 Treendingucha tru kwallibeløbe kangurrin kangurri nømasiyaitø trenchibelø køn: “Pirøwan ketig utønrrabiibe iigwein køn cha. Kwetchab amun cha. Pirøbe namuin kørrømisrtrun” cha.
8 Incha nusrkawane kemøra, kweecha, asrwane tru uvas traugurri weguchibelø køn— cha.
9 Incha Jesúsbe trenchibig køn:
—¿Tru uvas tra puaibe chi martrerah? cha. Arrua, tru kwallibelane kweecha, tru uvas trawane katøganelan tranrrun cha.
10 ’¿Ñimgan Tiuswei wamwan pørigu iigwan mana lemeelø køtirru? cha:
Tru ya marøbelø kaasig sruube katsiisrø pølbasra wayamig
mas purø tab srukken misrin køn taigwan.
11 Señor Tius øyeeg marene,
namuin kabyube truba tabig asønatan cha.—
12 Inchen Jesúswan merrarrawa sruamrrab kemørtrab inchibelø køn, kaguende tru ‘øyeeg lataitøwein køn’ cha waminchippe, nømun kemesra wamindi møra. Inchendø nømbe misag truba nuwan køriimata, kagøbasha, pasramnetø ambuptinchibelø køn.
Tiuswein kønrrabigwane Tiuswan tranøppe, Césarwein kønrrabigwane Césarwan tranøb
(Mt 22.15-22; Lc 20.20-26)
13 Incha Jesúsweimay mø fariseosmeran køsrønba, Herodesweingateelanba ørøbelø køn, chigøben wamindingarua, nø kalø løtøbene, truyu kebenøsrkønrrab isua.
14 Inchen truiløbe amrrua, trenchibelø køn:
—Kusrennøbig, ñibe ciertonigwan waminchib møg kui aser cha. Katø misag maig chitanmaptø mørøb pasrømíig køn cha. Kaguende ñibe mundøgucha nømun mailø køtasha kandarøtø imøtø, Tiuswei maywan ñibe maig kusrenanamigwan cierton sølwan kusrenanøbig køn cha. Trube, ¿tru Roma maya misagwan karub wabigwan nam an pagaramig merømuig køh? Kabe, ¿merig køh, chinderah? cha. ¿Tranrrautah? Kabe ¿tranmønrrautah?— chibelø køn.
15 Inchen Jesúsbe nømune ka isatø, palatø tab inchib chib pønrrai ashabe, trenchibig køn:
—¿Nane chindimbarre kebenøsrkønrrab inchigue? cha. Kan pagaram anwan srua amrruy cha, na ashchab.—
16 Inchen srua amrruben, Jesúsbe trenchibig køn:
—¿I anyu maløba, i munchi pøriibabe muin køh?— cha.
Inchen nømbe:
—Tru Césarwein køn— chiben,
17 Jesúsbe trencha løtabig køn:
—Césarwein købene, trube, Césarwan tranay cha. Inchen Tiuswein købene, Tiuswan tranay— cha.
Inchen nune ke kwaara ashibelø køn.
Kwailø katøle øsiiranrrab kuigwan payib
(Mt 22.23-33; Lc 20.27-40)
18 Inchen mø saduceosmera køsrøn Jesúswan ashchab ambubelø køn. Truiløbe tru kwabeløbe øsiiramønrrun chibelø kuabe, Jesúswane øyeeg payibelø køn:
19 —Kusrennøbig, Moisésbe namun treeg pøra kørrømarig køn cha: “Møigwei nuneg køben kwawa, srawan urekkaig kørrømarene, trube, tru nuneebe piudaba kasharawa, nuneg kwabigweimburab ureg tøgagømig køn” chibig.
20 Trube, siete nunelø købig køn cha. Indiibe srøsriibe kasharawa, chi urekkaig kwaben,
21 tru wendauikkucha tru piudaba kasharawa, katø chi urekkaitøwei kwaben, katø tru pøn kønrrabyuigwangucha treetøwei nebuben,
22 yandø søteeløba tru ishuuba kasharawa, møikkucha ureg kørrømarmøn cha. Inchen yandø srabebe ishukkucha kwan cha.
23 Trube, tru kwabelø katø øsiirabene, ¿nøbe møigwei srain kønrrerah? cha payibelø køn, tru sieteeløba nune srai mara tøgagúig købene.—
24 Inchene Jesúsbe trencha løtabig køn:
—Ñimbe mandø kuinguen mørmøwa pella pønrrappe, ¿Tiuswei wamwan pørigwanba, katø Tiuswei maramburab marigwanba tab nebua ashmeelø kuarre pella pønrrømøtirru? cha.
25 Kaguende kwailø katøyug øsiirappe, kasharamøwei, kasharanmøwei inchun cha. Treeg kømøtø, srømbalasrø ángelesmera latailøtøwein kønrrun cha.
26 Inchen tru kwailø katø øsiiramigweimburappe ¿ñimgan Moisés pørigu lemeelø køtirru? cha, tru tusr-unø naarabigugurri Tius nun øyah taigwan: “Nabe Abrahamwei Tius, Isaacwei Tius, Jacobwei Tius kur” cha trendaigwan.
27 Tiusbe kwailai Tius kømøtø, øsiguelai Tius køn cha. Inchawei ñimbe purø nu pella pønrran— chibig køn.
Tius karua martrai pønsrailai utuig mas nuig
(Mt 22.34-40)
28 Inchen tru Moisés pørigwan kan kusrenanøbig tru ‘maig køh’ cha, payiyab køben mørøb pasrabiibe, Jesúsbe søl løti møra, nun kemallabe, trencha payibig køn:
—¿Tius martrai karua pønsrailai utuig mas nuibe møig køh?— cha.
29 Inchen Jesúsbe trencha løtabig køn:
—Tru martrai karua pasrig mas nuibe iig køn cha: “Au, Israel misag, møray cha. Namui Señor Tiusbe, Señor nøtø køn cha.
30 Señor ñui Tiuswane ñui manrraugurri kerrigu newan undaaraitøgaba, kerrigu ñui øsig pasraitøgaba, kerrigu ñui turtøga isumburab isuitøgaba, katø kerrigu ñui asru chishkømburab chish kuitøgaba undaaramig køn” tan cha.
31 Inchen tru wendauibe iig køn cha: “Ñima ñiasiitøwei maig undaguig køppe, ñui mendaigwangucha treetøwei undaaramig køn” cha. Tru maig maramigwan martrai pønsrailø i pagatø lataig nørreeløbe katøgane chi kaagøn— cha, trenchibig køn.
32 Inchen tru Moisés pørigwan kusrenanøbiibe trenchibig køn:
—Kusrennøbig, ñibe sølwein tan cha. Tiusbe kandø køn chib, katøgane mu kaagøn chib,
33 Tiuswan kerrigu ñui manrrøtøgaba, kerrigu ñui isumburab isuitøgaba, kerrigu ñui asru chish kømburab chish kuitøgaba undaarab, katø mendaigwangucha nøasiitø lataitøwei undaarab indamig køn cha trenchippe. Iilan mariibe Tiusweyasig traniiba, katø animalmeran kweecha Tiusweyasig parriiløba lataitøguen kømøtø, mas nuig køn— cha.
34 Inchen Jesúsbe truibe ke tab isua løti ashabe, nune trenchibig køn:
—Tius nø ashib karub pasrainug pumibe ñibe ke tre yab pasrømøn— cha.
Inchen yandø katøbe Jesúswane mugucha chi payrrab inchimeelø køn.
¿Cristobe mui Nusrkain køh?
(Mt 22.41-46; Lc 20.41-44)
35 Jesús Tiuswei yau kusrenanøb pasrøwabe, trencha payibig køn:
—¿Tru Moisés pørigwan kusrenanøbeløbe chindimba tru Cristone Davidwei misagugurri arrubig køn tah? cha.
36 Kaguende Davidtøweinguen Espíritu Santo eshkaig trendaig køn cha:
Señor Tiusbe tru nai Señorwane trendan cha:
“Nai kusrmaygatø wamisr cha,
ñui ashig kømui inchib tsalø inchibelan
ñi itøbunønrrai ñui srøb umbu na pønsramnegatig.”
37 Pøs Cristone David nøtøweinguen: “Señor” cha wamøbene, trube, ¿mandøgurri Cristobe Davidwei nusrkain kønrrab køh?— chibig køn.
Inchen misaamera truba nu pasrabiibe truba chull mørøbelø køn.
Moisés pørigwan kusrenanøbelan nøm mailø kuigwan Jesús waminchib
(Mt 23.1-36; Lc 11.37-54; 20.45-47)
38 Jesús kusrenanøb pasrøwabe trenchibig køn:
—Tru Moisés pørigwan kusrenanøbelane ashiptø kuy cha. Truiløbe kørrabelø kewa llirab amønamig chullelø køn cha, katø penab, yanøb indiisrø nømune maig købash kømø, truba tab wamønrrai inchib,
39 katø judíosmera tulundzuni yamerayube purø tab purramdønug purrag kui indamba, katø lincha tabig mabyugucha nørreelø purrainug purø tabigu purrag kui indamba inchibelø køn cha.
40 Incha katø piudasmeran nømui yameran kerrawabe, tabelø misrøb ke ka yandø truba yana Tiuswan waminchibelø køn cha. Truiløbe møra melamig mas nuigwan utønrrun— chibig køn.
Waacha piudai an kegutsig
(Lc 21.1-4)
41 Mana køsrøn Jesús Tiuswei yau Tiusweyasig an kebusrinug tru pinrrøgue wabene, truba nu misaabe truyu an kebusrøb køben, truba yamelø puarmerabe truba nørrøweyig an kebusri ashibig køn.
42 Inchen truyu kan waacha piuda arruabe, truyu pagatø øskø andø purø lamøzhig kebusren,
43 Jesúsbe nui kusrenanøb pera uniilan wamabe, trenchibig køn:
—Nabe ñimun cierton trendamønrrun cha: I waacha piudabe cajayu pusrøbelø kanelø lataguen kømø, mas nu kebusran cha.
44 Kaguen mayeeløba nømbe undaigwandø tranen, trune nøbe waacha køptø, nui kerrigu tøgagúigwan tranan cha, tru nui øsig tsumig kerrigu tøgagúigwan.—