15
Jesús Pilatoi merrab
(Mt 27.1-2, 11-14; Lc 23.1-5; Jn 18.28-38)
1 Inchen yandø chab tør-rrabendø sacerdotesmeran karubeløba, misagwan karubelø kølli misaameraba, katø tru Moisés pørigwan kusrenanøbeløba, tru Setenteelø maig maramigwan asha marøbelø kerrigueløba tulundzunabelø køn. Incha nømbe Jesúswane lusra, srua amba, Pilaton tranøbelø køn.
2 Inchen Pilatobe Jesúswan trenchibig køn:
—¿Ñigan judíosmerai rey køtirru?— cha.
Inchen Jesúsbe trencha løtabig køn:
—Ñitøweinguen chab trendan— cha.
3 Inchen sacerdotesmeran karubeløbe nune chine, chine ‘øyeeg marøbig kuig køn’ chiben,
4 Pilatobe katøyug trenchibig køn:
—¿Chigucha løtømønrrapteh? cha. Ñiguen ash cha, ñune chigøben yeeg waminchib køn cha, nømbe.—
5 Inchen Jesúsbe treeg indingucha løtømuben, Pilatobe ‘kan øyeebe maig kermab’ isub kørrømisrøbig køn.
Jesúswan kwanrrai pasrøb
(Mt 27.15-31; Lc 23.13-25; Jn 18.38–19.16)
6 Fiesta kwalømmerawane kubernadurbe kailan keeri yau pønrrabelan misag møigwan elatchai miaben, trendø treeg marøb elachibig køn.
7 Inchen tru keeri yaube kan møg Barrabás taibe keerig pasrabig køn, nøbe larrø kailøba søtømisra, ashib karubelan namig kurrabyu misag kweechaig.
8 Inchen misaamerabe amrrua:
—Ñi trendø treeg marøbiibe, treeg mar— chib, Pilatone miab mendøben,
9 Pilatobe trencha løtabig køn:
—¿Ñimbe judíosmerai reywan na elatsamig palain køgue?— cha.
10 Kaguende Pilatobe tru sacerdotesmeran karubeløbe Jesúswane uni ashig kømuptø nun tranin kui ashibig køn.
11 Inchen sacerdotesmeran karubeløbe Jesúswan kømøtø, nømbe Barrabáswane elatchai inchibelø køn.
12 Inchen Pilatobe katøyug payippe, trenchibig køn:
—Trube, ¿ñim tru judíosmerai rey køn taigwane nabe mandø indamø?— cha.
13 Inchen nømbe katø trenchib trashib løtabelø køn:
—¡Kurusyu mesrø!— chib.
14 Inchen Pilatobe trenchibig køn:
—¿Nøbe chi kalø marindørre øyeeg martrainchigue?— cha.
Inchen nømbe masken mur trashibelø køn:
—¡Kurusyu mesrø! ¡Kurusyu mesrø!— chib.
15 Inchen Pilatobe tru nu misagwan ka tab kønrrai inchig køptø Barrabáswan ka inrrai elacha, Jesúswane ichagutsingaruabe, kurusyu mesrønrrai tranøbig køn.
Suldaumera Jesúswan indzatø ashib
16 Inchen suldaumerabe palacioyu mas umbusrø srua amba, maya suldau søtøwan tulundzuningarua,
17 kan yalø piguiig itøguenana, kaldiigwan corona mara, petsøsrøbelø køn.
18 Incha trugurrimbe trenchib trashib mendabelø køn:
—¡Judíosmerai Rey, viva!— chib.
19 Incha cañatøga turbøtø itsamba, illimbi tutamba, tab inchib chib, nui merrab tømbønsramba inchibelø køn.
20 Incha øyeeg marøb ka indzatø ashib srua køptø, tru yalø piguiig itøguenanigwan wesrawa, nuiwan katøle kenana, kurusyu mesrønrrab nune wesrubelø køn.
Jesúswan kurusyu mesraig
(Mt 27.32-44; Lc 23.26-43; Jn 19.17-27)
21 Kan møg cirenesriig Simón taig, Alejandroimba, Rufoimba møskai wambig nøørøsrøngurri purainrrab arruben, nune Jesúswei kuruswan ke mutamne incha mutøsrøbelø køn.
22 Incha kanbalø Gólgota taisrømay nune srua ambubelø køn, (tru trenchippe, “Calaverasrø” tainug).
23 Jesúswane vinoba, mirraba lindisaig yuulingucha, Jesúsbe muchimíig køn.
24 Inchen kurusyu mesra, suldaumerabe Jesúswei kewagúilan mu merrarramig nebutashchab suerte kuchibelø køn.
25 Inchen løtsø las nuevetø købig køn, tru Jesúswan kurusyu mesrøben.
26 Incha kan pørig mesrøbelø køn, chigurrin kwanrrai mesraig køn cha eshkabig:
JUDIOSMERAI TRU REY KØN
chibig.
27 Incha katø pagatø nileelangucha kanun kusrmay, kanun atsimay nunba kurusyu melsrøbelø køn.
28 Inchen tru Tiuswei wamwan øyah chib pøriibe nebuig køn: “Tru kailai utu nune tøga pasrig kønrrun” taig.
29 Inchen truwan puraambubeløbe tsalø wamab, turwandø kønøgøb trenchibelø køn:
—¡Au, ñi Tiuswei yawan pøtiicha, katø tru pøn kwalømyutø kusranrrabiibe,
30 kwamønrrab ñitøwei chigøben mar! cha. ¡Kurusyugurri pinaamø!— cha.
31 Inchen tru sacerdotesmeran karubeløba, tru Moisés pørigwan kusrenanøbeløba treetøweih nun indzatø ashib kangurrin kangurri trenchibelø køn:
—Kanelane kaigyugurri wesrabendø, nøasiitøweimbe kaiman cha.
32 Tru Cristo, Israel misagwei reybe, møi kurusyugurri pinaarrubash cha, nam asha, nø kuitamab kørenrrab— cha.
Inchen nøba kurusyu melsraig melabeløgucha Jesúswan tsalø wamabelø køn.
Jesús kwaig
(Mt 27.45-56; Lc 23.44-49; Jn 19.28-30)
33 Yandø kwaløm tøbøtag misrene, maaben las treskatig pirau ørøba løstiig kørrømisren,
34 tre uras Jesúsbe truba mur trashibig køn:
—¡Eloi, Eloi! ¿Lama sabactani?— cha. (Trenchippe: “¡Nai Tius, nai Tius! ¿Chindimba nandø elachigu?” chib.)
35 Inchen møiløgøsrøn truyu pønrrabelø mørabe, trenchibelø køn:
—Møray cha. Elíaswan wamøtan— cha.
36 Inchen møikkøsrøn lulabe, ñab esponjan køchiibiyu kebisha, kan caña tsigu pucha, mutchai pulusrø yuuløb trenchibig køn:
—Kagøbasay cha. Inchippa kwamønrrai pinøsranrrab Elías attashchab— cha.
37 Inchene Jesúsbe mur trashippe, yandø isrømuptinchibig køn.
38 Inchen Tiuswei yau tru purø tab llensuzhig kelarrab søtø mesraibe palasrøngurri kørrab kølsra, yandø paig misrøbig køn.
39 Inchen tru Roma suldau cienelan nø karubiibe Jesúsweim pinrrøgue pasrøwa, øyeeg trasaigwan mørøb, mandø kwaigwan ashib inchabe, trenchibig køn:
—Isa kømø, i møøbe Tiuswei Nusrkaiwein kuin køn— cha.
40 Inchen ishumburmera møiløgøsrøn yabsrøngurrindø ashib pønrrabelø køn. Tru utube María Magdalena køben, tru Wendiig Santiagoimba, Joséweimba usri María køben, katø Salomé købengue.
41 Inchen tru ishumburmerabe Jesús Galileasrø uñen, nui mendig amøñib, purugub inchibelø købig køn. Inchen truyube truiløtø kømøtø, katøgan ishumburmera Jerusalénmay Jesúsba nebamba yam pasrabig køn.
Jesúswan sørig
(Mt 27.57-61; Lc 23.50-56; Jn 19.38-42)
42 Inchen yandø yem misrøb køben, tru isram kwalømweyasig tamarøb kuin kwaløm købig køn, kaguende katø kwalømbe isram kwaløm kønrrab køben.
43 Inchen José arimateasriig, tru Setenteelø maig maramigwan asha marøbelai utuig truba nuig tabig kui asig møg, nøgucha Tius nø ashib karub wainuguigwan muniirabig arrua, Pilato wainug kørmø kebinrrab isua, nøbe kebya, Jesúswei asrwan miabig køn.
44 Inchen Pilatobe, trube, kwabguen inditamab isua, nøbe truba kwaara, kan suldau cienelan nø karubigwan wama, kwabguen inditarru cha, payibig køn.
45 Inchen truibe nun eshkaben, Pilatobe Jesúswei asrwan Joséwan pinøsrungarubig køn.
46 Inchen Josébe kan lino llensutøga kirra, Jesúswei asrwan pinøsrua, truyu pulabe, kan peñayu søramig trab lalig pasrabigu waya, trugurrimbe kan nu srugwan merrana, kebambinug kasrøbig køn.
47 Inchen María Magdalenaba, María Joséwei usrimbabe chu sørøben ashibelø køn.