14
1 Kunha hi'arandu va'e ojapo porã 'rã ngoorã,
ha'e rã hi'arandu e'ỹ va'e ma opo py ae ngoo ombovaipave 'rã heravy.
2 Heko porã va'e ma Senhor renonde ojererokyjea rupi 'rã ikuai,
ha'e rã tape vai rupi ikuai va'e ma omboete e'ỹ va'e.
3 Hi'arandu e'ỹ va'e oiko axy 'rã ojejou porã reia rupi ijayvuague py,
ha'e rã hi'arandu va'e ma ijayvu porãague py oo jepe 'rã.
4 Toro ra'y omba'eapo va'e ndoikoi rã mba'emo ra'yĩ mboapy'i ae 'rã jareko nhamoĩ porãaty py,
ha'e rã toro ra'y ovare va'e jareko vy nhamono'õ retave 'rã.
5 Anhetẽ rupi joeko mombe'ua nda'ijapui 'rã,
ha'e rã anhetẽ rupi e'ỹ nhomombe'u va'e ma opa mba'e py 'rã ijapu.
6 Jojojai rei va'e o'arandurã oeka teĩ ndojoui 'rã,
ha'e rã hi'arandu va'e pe ma ndaxyi 'rã mba'emo oikuaa aguã.
7 Ejepe'a ke avakue hi'arandu e'ỹ va'ea gui,
mba'eta ha'e kuery ijayvu teĩ peteĩve henda py ndereikuaa porãi 'rã.
8 Hi'arandu va'e oexa uka o'arandua ojee ae oikuaa potaa py,
ha'e rã hi'arandu e'ỹ va'e ma ijarakuaa e'ỹa py ojekore.
9 Hi'arandu e'ỹ va'e ojejavy teĩ “Mba'e'ỹ” he'i rive 'rã,
ha'e rã heko porã va'e ma joayvua rupi 'rã ikuai.
10 Nhandepy'a re nda'eveia oĩ va'e nhande ae 'rã nhaendu,
ha'e javy'aa voi ndajaexa uka kuaai 'rã jaexa va'ety e'ỹ pe.
11 Heko vai va'e kuery ro ombovaipaa 'rã,
ha'e rã heko porã va'e roguy rupi ma ipotypa 'rã.
12 Oĩ tape jaexa rã ha'eve rei va'e merami,
ha'e rami teĩ opaa py ma nhandereraa 'rã manoa katy.
13 Nhanderory rei reve teĩ nhandepy'a py ma ndajavy'ai,
javy'aa opa ramove mboriau ju 'rã nhaendu.
14 Opy'a py anhetẽ rupi e'ỹ ikuai va'e ojopy 'rã ikuaiague repy ha'e javi,
heko porã va'e oiko porãague repy ojopy va'erã ramigua e'ỹ.
15 Hi'arandu e'ỹ va'e ma ijayvua rã oendu vy ogueroviapa rei 'rã,
ha'e rã hi'arandu va'e ma oikuaa pota 'rã oiko aguã re.
16 Hi'arandu va'e oikuaa pota vy ojepe'a 'rã mba'emo vai gui,
ha'e rã hi'arandu e'ỹ va'e ma ivai vyvoi 'rã ojee ae rive ojerovia vy.
17 Ipoxy rei rive va'e opa marã 'rã ikuai,
avakue joapo vai rei va'e re nda'ija'eai 'rãe.
18 Hi'arandu e'ỹ va'e ma 'arandu rupi e'ỹ 'rã ikuai,
ha'e rã hi'arandu va'e ma oiko kuaa-a py ijegua.
19 Heko vai va'e guenapy'ã re 'rã oĩ heko porã va'e renonde,
anhetẽ rupi e'ỹ oiko va'e ojerure 'rã oiny heko porã va'e rokẽ py.
20 Iporiaukue'i re hoo katy'igua kuery ae voi nda'ija'ei 'rã,
ha'e rã oguerekopa va'e ma irũ reta 'rã.
21 Ngoo katy'i rupi ikuai va'e re ija'e'ỹ va'e ojejavy,
ha'e rã iporiaukue'i mboaxya ma ovy'a 'rã.
22 Mba'emo vairã rupi rive onhembopy'a va'e ndojejavyi 'rã teve?
Ha'e rã iporã re nhanhembopy'a ramo nhanderayvua ha'e ojeroviaa 'rã nhandere.
23 Nhamba'eapoa ha'e javi rupi jajou retave 'rã,
teĩ nhandeayvu katu rivea py ma nhandeporiauve rive 'rã.
24 Hi'arandu va'e mba'e rei-rei retaa ijegua 'rã,
ha'e rã hi'arandu e'ỹ va'e pegua ma nda'ijarakuaai reia.
25 Anhetẽ va'e rupi joeko mombe'ua ma ogueraa jepe 'rã joekove,
ha'e rã ijapu rei va'e ma nhombotavypa rive 'rã.
26 Senhor renonde jajererokyjea rupi vy jajou nhanhemi aguã imbaraete va'e,
nhandera'y kuery voi ojou 'rã onhemi aguã.
27 Senhor renonde jajererokyjea rupi vy jaupity 'rã yvu tekove me'ẽa,
nhuã manoa py ja'a e'ỹ aguã.
28 Huvixa pegua kuery heta ramo oguerovy'a 'rã,
ha'e rã oatapa ramo huvixa nda'evei rei 'rã.
29 Ivai rive e'ỹ va'e ma opa mba'e py oexa uka 'rã o'arandu,
ha'e rã ipoxy rive va'e ma oguerovy'a 'rã hi'arandu e'ỹa rive.
30 Ha'eve rei'ia nhaendu vy nhanderete ha'e javi oiko porã 'rã,
ha'e rã joe nhandea'e e'ỹa py ma nhanekãgue hu'ũmbaa rami.
31 Iporiaukue'i momboriau reia kuery ma Imoingoare re voi opu'ã rei,
ha'e rã iporiaukue'i mboaxya kuery ma Nhanderuete mboetea rupi avi ikuai.
32 Heko vai va'e ho'a 'rã gueko vaia py ae,
ha'e rã heko porã va'e ma omanoa py voi oguereko 'rã oarõ aguã.
33 Hi'arandu va'e py'a re oĩ hi'arandua,
ha'e rã heko vai va'e py'a re oĩ va'e ma oikuaa pavẽ 'rã.
34 Peteĩ-teĩ regua teko porã rupi ikuaia py yvateve 'rã,
ha'e rã jejavya re anho ikuai va'e ma ojou vai pavẽ 'rã.
35 Huvixave oguerovy'a 'rã tembiguai kuery hi'arandu va'e,
ha'e 'rã ha'eve'ỹa rami ikuai va'e ma ombopaga vaipa 'rã.