3
Senhor nhanhe'ẽ rendu aguã rupi nhanemo'arandua
1 Xera'y, nderexarai eme xee rombo'eague re.
Ndepy'a re emoĩ porã ke ajapo uka va'ekue.
2 Mba'eta ha'e nunga ma nemoingove puku 'rã,
ndere omoĩ retave 'rã ma'etỹa re reiko aguã.
3 Nderexarai eme mborayvu ha'e anhetẽ va'e rupi reikoa aguã gui.
Ha'e rami reiko aguã emoĩ ndeaju'y re mbo'y remoĩa rami.
Ndepy'a re embopara yvyrape re rami.
4 Ha'e rami vy reupity 'rã Nhanderuete nemboaxya,
avakue voi nemboete 'rã.
5 Ndepy'a ha'e javi py ejerovia tema Senhor re ae,
ha'e rã ndee ae 'arandua re ma ejerovia eme.
6 Opa mba'e rejapoa py nema'endu'a hexe.
Ha'e ramo ha'e oipe'a 'rã nerenonderã.
7 Enhemo'arandu eme ndee ae reikuaa rupi rive.
Eiko tema Senhor renonde rejererokyjea rupi, ha'e ejepe'a teko vai gui.
8 Ha'e rami reikoa ma ojapo 'rã nderete imbaraeteve aguã rami,
nekãgue voi omokane'õgua 'rã.
9 Emboete ke Senhor mba'emo rereko va'e py,
ha'e jypy'i rejou va'ekue-'ekue reme'ẽa py.
10 Ha'e ramo nderoguy tynyẽmba 'rã mba'emo ra'yĩgue,
vinho hyru gui voi onheẽmba rei 'rã.
11 Xera'y, endu rive eme ta'vy Senhor nemo'arandu rã,
ndekuerai eme guive ndevy ijayvu ramo,
12 mba'eta Senhor ma guembiayvu kuery pe ae 'rã ijayvu,
tuu gua'y oayvu va'e pe ijayvua rami avi.
13 Ovy'a ete 'rã ava o'arandurã ojou va'e,
oikuaa aguã oupity va'ekue.
14 Mba'eta ha'e rami jaikoague repy ma prata gui ovareve,
ouro iporãve va'e gui ovareve.
15 Pérola gui voi ovareve 'rã.
Opa mba'e reipota va'e ma 'arandu gui ndovareive.
16 Opo oiporu kuaa regua re 'arandu oguereko nderekove ombopukuve aguã,
ha'e rã oiporu kuaa e'ỹa re ma oĩ mba'emo porã ha'e nemboetea aguã regua.
17 Ha'e va'e tape ma iporã va'e meme.
Ha'e va'e rupi jaa vy jaupity 'rã mby'a porã.
18 Oupity va'e pe ma yvyra tekove me'ẽa hi'aĩ.
Ovy'a ete 'rã oupity va'e ha'e javi.
19 O'arandua rupi Senhor yvy onhono raka'e,
oikuaapaa rupi ojapo imoiny yva.
20 Opa mba'e oikuaapa va'e vy yy ombovu raka'e yvy guýry oĩague gui,
ha'e rã arai gui ma ombou yxapy.
21 Xera'y, emboyke eme rexaa py remoĩ va'ekue,
ereko riae ke 'arandu anhetẽ va'e reiko kuaa aguã.
22 Mba'eta nenhe'ẽ pe ome'ẽ 'rã tekove,
ndeaju'y re mbo'y remoĩ vy renhembojeguaa rami avi.
23 Ha'e rami vy tape rupi reikoa rupi voi reiko porã 'rã,
renhepyxanga e'ỹ re.
24 Renheno ta ma vy nderekyjei 'rã,
ha'e gui renheno ma vy reke porã 'rã.
25 Enhemondyi eme mba'emo oiko xapy'a teĩ,
neĩ heko vai va'e kuery mokanhyarã ou va'e gui.
26 Mba'eta Senhor oĩ 'rã ndere ou va'e jokoarã,
ndepy re voi opena 'rã nembo'aa e'ỹ aguã.
27 Eipytyvõ e'ỹ eme ojexavai rei'i va'e kuery,
ndepo py remboja'o aguã rereko ri vy.
28 Xapy'a rei aỹ ma voi mba'emo rereko ri vy
aipo're eme neirũ pe: “Tereo ju, ha'e gui ko'ẽ rã ma eju ju.
Ha'e ramo ma ame'ẽ 'rã mba'emo”, 're eme.
29 Enhembopy'a eme neirũ re rejapo vai aguã,
ndere ojeroviaa rupi ndero katy'i oĩ ramo.
30 Nda'evei joupe ndeayvu ete-ete aguã mba'eve py e'ỹ,
ndevy ojapo vai e'ỹ re.
31 Erovy'a rei eme ojerovia rei va'e,
eiko eme guive ha'e kuery ikuaia rami,
32 mba'eta Senhor ojeguaru heko vai va'e gui,
ha'e rã heko porã va'e ma oirũ ae rami 'rã oguereko.
33 Senhor ijayvu vaiague opyta 'rã heko vai va'e ro re,
ha'e rã heko porã va'e rekoa re ma imoingo porãarã anho oĩ 'rã.
34 Mba'eta ha'e ojojai 'rã ojojai reia rupi ikuai va'e,
ha'e rã yvyĩgueve'i ma omboaxy 'rã.
35 Hi'arandu va'e omboetepy 'rã ikuai,
ha'e rã hi'arandu e'ỹ va'e ma oxĩmba aguã rami ikuai.