30
Agur ayvu oĩa
1 Massá pygua Jaque ra'y Agur ijayvuague oĩa:
Amongue aipoe'i: “Xeruete, anhea'ã riae ete ma.
Anhea'ã riae ete ma, Xeruete.
Ha'e rami vy xekane'õ ma.
2 Mba'eta xee ma ava rami e'ỹ aikuaa axy raxa,
neĩ ava 'arandua xee ndarekoi,
3 ndaikuaai 'arandu,
neĩ Iky'a e'ỹ va'e guigua voi ndaikuaai va'e.
4 Mava'e tu yva re oo, ha'e gui oguejy ju?
Mava'e tu opo py ojopy kuaa ta yvytu?
Mava'e tu yy ojokua 'rã oao apy py?
Mava'e tu onhono raka'e yvy ha'e javi, ijapy peve?
Mba'exa tu hery, ha'e ta'y rery?
Ndee nda'u ndereikuaai ri?” he'i 'rã.
5 Nhanderuete ayvu ma iky'a e'ỹ va'e meme,
hexe ojerovia va'e kuery pe mba'emo vai jokoa oiko.
6 Emoĩve eme ijayvuague ramigua,
ndevy ijayvu atã e'ỹ aguã, ha'e ijapu va'e reikoa oikuaa e'ỹ aguã.
7 Mokoĩ regua re ajerure ndevy,
eme'ẽ e'ỹ eme, aikove teria ja.
8 Eipe'a ke xegui anhetẽ rupi e'ỹ aikoa ha'e xeapu reixea.
Eme'ẽ eme xeporiaukue aguã, neĩ arekopa aguã.
Eme'ẽ tembi'u aikotevẽ nhavõ,
9 xapy'a rei arekopa ma rire ndegui xerexarai vy
“Mava'e tu Senhor?” ha'e e'ỹ aguã.
Ha'e rami e'ỹ vy xeporiaukue'i vy xemonda aikovya rupi
Nhanderuete rery iky'a va'ea rami aikuaa uka e'ỹ aguã.
10 Tembiguai re ndeayvu rei eme ipatõ renonde,
ha'e va'e ju ndere ijayvu poyi e'ỹ aguã, ha'e repaga aguã rami reiko e'ỹ aguã.
11 Ikuai nguu kuery re ijayvu vai va'e,
ha'e oxy voi ndogueroayvu porãi va'e.
12 Ikuai ha'e kuery ae ojeupe ae “Ojejavy va'e'ỹ” he'i va'eri
peteĩgueve ma voi gueko vaia gui ndojeky'a'o ukai.
13 Ikuai ojejou porã rei va'e,
onhemboyvate rei va'e ha'e kuery ae oikuaa rami, ha'e yvate rupi rei oma'ẽ va'e.
14 Ikuai kyxe guaxu rami haĩ va'e,
kyxe rami haimbe va'e oguereko
yvy gui omomba aguã iporiaukue'i,
ha'e oipotapa rei va'e kuery, avakue mbyte gui.
15 Tuguy pytea ma oguereko mokoĩ guajy,
ha'e va'e ma “Eme'ẽ, eme'ẽ”, he'i va'e.
Ha'e mboapy oiko hevyatã kuaa e'ỹ va'e,
tá, irundy ikuai “Ha'eve ma!” nde'i kuaai va'e.
16 Ha'e va'e ma yvyra rupa,
kunha imemby e'ỹ va'e ae,
yvy pirukue yy noĩa,
ha'e tata voi “Ha'eve ma” nde'i va'e.
17 Nguu ojojai rei va'e,
ha'e oxy nonhe'ẽ rendui va'e rexa ma
xapirẽ yakã yvýrygua omondoropa 'rã,
ha'e taguato ra'y kuery ho'upa 'rã.
18 Mboapy nunga oiko xevy iporã ete va'e,
tá, irundy ikuai aikuaa e'ỹ va'e:
19 ha'e va'e ma taguato yvate rupi oveve oikovy va'e,
mboi ita áry otyryry ovy va'e,
kanoã guaxu ye'ẽ mbyte rupi oaxa ovy va'e,
ha'e avakue kunhataĩgue reve joayvua.
20 Po rami ma kunha itavy rei va'e reko.
Okaru ha'e ojuru oiky'a'opa ma vy
“Mba'eve py ndatekoavyi”, he'i 'rã.
21 Mboapy oiko yvy yta mboryryiarã,
tá, irundy jaexa vy jaropo'aka va'erã e'ỹ:
22 ha'e va'e ma tembiguai huvixarã oĩxe va'e,
hi'arandu e'ỹa rupi tembi'u re hevyatã oikovy va'e,
23 kunha omenda va'eri oayvupy e'ỹ,
ha'e gui tembiguai kunha herekoa rekovia ha'e ju onhemoingo va'e.
24 Irundy regua ikuai yvy re kyrĩ'i va'eri
hi'arandu va'e kuery gui hi'aranduve va'e:
25 ha'e va'e ma tay'i, ha'e kuery ma imbaraete va'e'ỹ va'eri
kuaray aku py guembi'urã omoĩ porã va'e;
26 ha'e anguja guaxu ipo'aka va'e'ỹ,
ha'e rami teĩ ita pa'ũ re ae 'rã hoo;
27 tuku karu ma huvixa va'e'ỹ va'eri
oguataa rupi hyxy porã'i 'rã jogueravy;
28 ha'e gui ambere'i ma nhandepo py jajopy rive'i va'erã,
teĩ huvixa ro py ae oiko va'e.
29 Mboapy ikuai jaexa rã ojejou porã reia rupi oguata va'e,
tá, irundy onhemboyvate reia rupi ikuai va'e:
30 ha'e va'e ma guary mymba kuery pavẽ gui imbaraeteve va'e,
ha'e neĩ avave gui guakykue katy ojevy va'erã e'ỹ;
31 ha'e uru ava opexo omopu'ã rei reve oguata va'e,
ha'e kavara ava,
ha'e gui huvixave ma hexe nhapu'ã aguã voi nda'evei va'e.
32 Ne'arandua rupi e'ỹ renhemboyvate ri vy,
e'ỹ vy ndepy'a re mba'emo vairã remoĩ ri vy
ejoko ndejuru ndepo py.
33 Mba'eta kamby nhamomy-momyĩ ramo manteiga ojeapoa rami,
ha'e oxĩmby rã huguy oẽa rami avi,
ipoxy aguã rami joapo ramo joguero'apa rei 'rã.