4
Ka main pire gi dungwa ibal gariba muine sin dungwa mere niminin ta milekungwa
1 Ena God miriin giil pire na tere, “Ka main konagi iray ero,” di na tongwa gay gule ta erekire, na yobilaan bile konagi iray erebinwe.
2 Ibal kiraan sire bawle tongwa main pisere kela kule dire kakiibi ta dikire, te kakiibi dire, “God ka main dungwa iru iru dimua,” dire ibal iru bawle di tekebinwe. Ka iru di tekire, ka main kawen dungwa kirara di gawa di ibal tobina, ena ibalin kobi God mabin mina mile nomanin suna obin si pire ka dungwa paama di pirama dire, di tobinwe.
3 Tere te Yesu Kirisito guun kan kere di maribe ere ibal tobinga iwe. Ka main iray aal kule painamia, ena kol gaul ai nangwa ibal tawle ka main iray ta pire pol sekenamue.
4 Ibalin kobi pire gi di Yesu ta tekungwa main iwe. Gariba gul kakiibi kobaan ta milungwa, kaan Satan, ibalin kobe ka main pire gi ta dekenama dire, yalini kiraan sire nomanin si kel di ibalin kobi te milemue. God milungwa mere, Kirisito nomanin naabile aw dungwa kirara iru mere milere, yalini ka main aw dungure milungwa kol wai i, ibalin kobi ta kanekinama dire, Satan nomanin si kel di ibalin kobi tomue.
5 Na yal kobe inan mile pai erebinga main, kere di maribe ere i ta tekere, “Yesu Kirisito mile na inan kobanan milemua,” di tere, te Yesu wai pirama dire, na yal kobe i nil konagi yal mile aa ki di i tobinwe.
6 God mile, “Si bilungwa ali para aw di piraa sinamua,” dimue. Dire milere, te God naabile aw dungwa mere, Kirisito i maribe erungwa, na ibal kobe pire pol si pirabina dire, yalini na nomanan suna pai mile naabile aw di na tomue.
7 Tongure ibinga iwe, na ibal kobe inan yobilaan ta bilekire, God taran yobilaan bilkaw paima di ibal iru pirama dire, na ibal kobe gariba muine sin dungwa mere niminin ta milekebingire, God yobilaan pai na tomue.
8 Ibal taw kobe na yobile suna ere wenabe gire taalime main main ere na tomba, kol wai ta nabina dire, kanebinwe. Te ibal taw nomanin binanbile si na tomba, na pire gogo ta erekibinwe.
9 Na kayminan ibal binanbile milimba, na ye nega kobe imo mile paimue. Te ibal taw si main ere na tomba, i sutaw ta ere na tekemue.
10 Yesu mile pai erungwa mere erebinga, i ibal kobe kanana dire, Yesu gain giil pire gulungwa mere, na para kamin kaun kaun gain giil iru pirebinwe.
11 Yesu mile pai erungwa mere, na yal kobe para iru i maribe erabinga, i ibal kobe kanana dire, Yesu milungwa main te na ibal kobe pire gi di Yesu tobinga i pire, kamin kaun kaun ibal kobe na si gulabina di omue.
12 Na yal kobe si gulabina di omia, ena gulungwa main pire gain giil pire milebinaba, i ibal kobe sigare kule u kwi nanga kol ware milinwe.
13 Ena ka main minin ganin iru dire bilungwa paangwa, “Ka main pire gi diga, ena ka i di gawa diwa.” Ka iru dungwa mere, na para ka main pire nomanin suna yere ka main pire gi dibinga, ena ka i para di gawa diwe.
14 God mile Singaba Yesu aa tongure alungwa pirebinwe. Pirere Yesu aa gi di pirebinga, ena yalini na ibal kobe para aa tenangure alabingire, God na ibal kobe para, Yesu bole awli pi yalini inin milungwa gul nama di pirebinwe.
15 I ibal kobe milinga pire, God kalin diga para muru ere i tomue. God ere wai ere ibal tongwa main para muru ware biinamia, ena ibal kobe binanbile maki ye God tere deminin si tenangwa paamue.
16 Ena iru paangwa main i pire, ka main konagi gay gule ta erekire, na yobilaan bile erebinwe. Na gaynan bile yerala di erimba, kamin kaun kaun na nomanin suna si kwi ye na tongure, sigare kule u wai obinwe.
17 Na gaynan giil pirebinga, baan tawliga pire gin taran wei sinamba, God ere wai ere na te milangwal milamue. Gain giil pirebinga mere, iru ere na tekenamue. God ere wai ere na tenangwa, maa kora kule na tenamue.
18 Inan kalkan omilan kanebinga i, guman mina ta yekebinba, kalkan te main inan omilan ta kanekibinga, ena kal main i, na ibal kobe i guman mina yobinwe. Kalkan omilan kanebinga, kaun tawliga dinangure wei sinamba, kal main ta kanekibinga, eme imo di painangwal painamue.