34
परमेश्वरजी छ्याँबै केमैं लइ छतसि खीलाइ थेब् लब
दाऊदए भजन घ्रि। दाऊदइ आबिमेलेखए उँइँर सोबलमैंल् धोंबै ब्योर उँइँइ। छतसि आबिमेलेखइ दाऊदलाइ ल्हावाइ।
1 खोंयोंन् बिलेया ङ याहवेहए मिं क्वेरिब्मुँ;
ङए सुँर खोंयोंन् बिलै खीलाइन थेब् लबै ताँमैं तरिब्मुँ।
2 ङए सोइ याहवेहर्न सैं तोंरिब्मुँ;
दुःख योंब्मैं चु ताँ थेसि छिं ङ्हाँब्मुँ।
3 ङने बा-बालुन् याहवेहए मिं थेब् लद्,
धै ङ्यो खागु तसि खीए मिं कैंडो लले!
4 ङइ याहवेहने ग्वार ह्रिमा खीजी ङलाइ ज्वाफ पिंइ
धै ङलाइ ङ्हिंन् लबै ताँन् सैमैंउँइँले ङ फ्रेमिंइ।
5 खी ङाँइ ङ्ह्योब्मैं बेल्ले सैं तोंल् योंब्मुँ,
धै फा पिसि चमैंए क्र खोंयोंइ कुरल् त्हुरिब् आरे।
6 दुःख योंबै म्हिइ याहवेहने ग्वार ह्रिमा खीजी चए ताँ थेमिंइ
धै चए ताँन् दुःखउँइँले फ्रेमिंइ।
7 याहवेहलाइ मान लब्मैं ताँनए कारग्युले खीजी खीए स्वर्गदूत रुँबर ल्हैदिम्,
धै चमैं जोगेमिंम्।
8 याहवेहजी कति ल्हें ल्हयो खमुँ बिसि ह्रोंसैन म्हैसि क्होद्।
खीए प्हलेर्न ग्वार योंबै म्हिइ आशिक योंमुँ!
9 ओ याहवेहए म्हिमैं, खीलाइ मान लदै खीजी बिबै ताँ ङिंन्!
तलेबिस्याँ खीलाइ मान लब्मैंने तोइ सैलै या खाँचो आत।
10 भर्खर्बै सिंहमैं चबै सै तोइ आयोंसि फोत्तेन् तब्मुँ,
दिलेया याहवेहलाइ म्हैब्मैंने बिस्याँ छ्याँब सैमैंल खाँचो तरिब् आरे।
11 ओ च्ह-च्हमिमैं खो, ङए ताँ थेद्;
याहवेहलाइ खैले म्हाँदिल् त्हम् बिसि ङइ क्हेमैंलाइ लोमिंब्मुँ।
12 क्हेमैंए न्होंरि खाबज्यै ह्रिंबै छ्ह सोसि
सैं तोंन्ले छ्ह थोल् योंस्याँ तमल ङ्हाँस्याँ,
13 ह्रोंसए लेइ आछ्याँबै ताँ आपोंन्,
धै ह्रोंसए म्हदेइ स्योर आतेद्,
14 आछ्याँबै के लबउँइँले एखो धै छ्याँबै के लद्;
आक्ह्रिबै म्हिमैं क्ह्रिमिंन्, खोंयोंन् बिलै छाबन् के लरिद्।
15 याहवेहजी ठिक के लब्मैंए फिर मि छरिमुँ
धै चमैंए ताँ थेम्।
16 दिलेया आछ्याँबै के लब्मैंलाइ खीजी बिरोध लम्।
छतसि चमैं सिबै लिउँइ ताँन् म्हिमैंइ युनन् म्लेवाम्।
17 ठिक के लब्मैंइ ग्वार ह्रिमा याहवेहजी थेमुँ
धै चमैंए ताँन् दुःखउँइँले फ्रेमिंम्।
18 सैं चोयाब्मैंने बालु याहवेह तमुँ;
धै सैं सियाब्मैंलाइ खीजी सैं क्होल् लमिंमुँ।
19 ठिक के लबै म्हिए फिर ल्हें दुःखमैं खमुँ,
दिलेया याहवेहजी चए ताँन् दुःखउँइँले फ्रेमिंम्।
20 खीजी चए ताँन् ह्रिब्मैंए रक्षा लमुँ;
चए ह्रिब्मैं घ्रि या चोरिब् आरे।
21 ह्रोंसइ लबै आछ्याँबै केइन दुष्ट म्हिमैं सैवाब्मुँ,
धै ठिक के लब्मैंलाइ आखोब्मैंइ दण्ड योंब्मुँ।
22 याहवेहजी ह्रोंसए के लब्मैं जोगेमिंम्;
खीए प्हलेर्न ग्वार योंब्मैं खाबै या दोषि ठर्दिरिब् आरे।