6
दुःख तमा ल्होमिंन् बिसि लबै प्राथना
क्वे प्रिंब्मैंए चिबए ल्हागिर बीणा-सारङ्गीं ह्रादै शिमिनिथ भाकाले प्रिंब। दाऊदए भजन घ्रि।
1 ओ याहवेह, क्हि ह्रिस खमा ङ आहौदिद्,
क्हिए ह्रिसर ङ प्हरेइ आप्रुद्।
2 ओ याहवेह, ङने भों तिफुँइ आरे, छतसि ङए फिर ल्हयो खमिंन्;
ओ याहवेह, ङए ह्रिबमैं नइमुँ, छतसि ङ सल् लमिंन्।
3 ङए सो खैता-खैता तइमुँ!
ओ याहवह, खोंयों समा पैंरिब् जा, खोंयों समा?
4 ओ याहवेह, ङ ङाँइ तोद्, ङ सिल् आपिंन्;
खोंयोंइ आनुबै क्हिए म्हाँया ङए फिर मुँबइले ङ जोगेमिंन्।
5 सियाब्मैंइ क्हिलाइ आमैं;
क्रोंर क्हिए मिं खाबइ क्वेब्मुँ?
6 ङ क्रोसि तोइ लल् आखाँब् तइमुँ;
म्हुँइँस ह्रोंसे ङ क्रो-क्रोइ ङए क्ह्ल्यो प्हाँइमुँ,
धै ङए मिग्लिइ ङए क्रेगु या प्हाँइमुँ।
7 न्हुँइ लमा ङए मि आचारब् तइमुँ;
ङए शत्तुरमैंइ दुःख पिंबइले ङ छेनाले म्रोंल् आखाँब् तइमुँ।
8 ओ आछ्याँबै के लबै म्हिमैं, ङ ङाँइँले ह्याद्,
तलेबिस्याँ ङ क्रोब याहवेहजी थेइमुँ।
9 ल्होमिंन् बिसि ङइ ग्वार ह्रिमा याहवेहजी थेइमुँ;
ङइ लबै प्राथनाए ज्वाफ खीजी पिंम्।
10 ङए ताँन् शत्तुरमैं फापिल् त्हुब्मुँ; धै खैता-खैता तयाब्मुँ,
चमैं फाफिसि तिस्यार्न ङ ङाँइँले स्योयाब्मुँ।