1 Tesalonáika
Yeisu ana totugugunayao Tesalonáika goi
adi leta vakuumgoina
Livala Aba Vaita
Leta ame Paulo ma senao Silovano be Timoti sigini sietune ina Yeisu ana totugugunayao Tesalonáika goi yaidi. Letayana nakona tala 51 sinaena sigini.
Tesalonáika asa gagaina Mesadoniya parovinsi sinaena goi ikaaiyaka. Paulo boi igimiina Tesalonáika tala 50 sinaena. Amoko goi Vala Dedevina italavaite, e boda sinove Yeisu sinumise. Ame tetalayana Guinuwa 17:1-9 goi ikaaiyaka.
Tutayana Paulo Tesalonáika goi ikaaiyaka, tomota maniyedi sivakaleye be nakae sivatapiye isiya. Tauna geya itoboineyeta ina vatulúkwana ilukavave.
Niga tutayana Paulo ina Korinta goi, latuwona iyagoi da Tesalonáika dedevidi gea geya. Tuwo Timoti ietune ina bego iyagoi. Tutayana ikaluvilamna ima, italavaita bego da Tesalonáika idi numisa pasina mou sibaabanedi go, sitaoyaakavata.
Leta ame goi kidi Paulo latuwodi bego da Tesalonáika idi numisa sikitogage. Aiyuwoina latuwodi bego vatulúkwana maniyedi sikitototoidi. Nakae latuwodi bego sivatulukoidi Yaubada ina bodao manakaedi itoboinedi siiketoiya be nakae Yeisu ina kaluvilamna manuna.
Leta Luluna
1. Leta ana togínina be ana tokatuyaivayao 1:1
2. Kidi Paulo idi sinapu Tesalonáika goi be nakae da Tesalonáika idi sinapu 1:2—3:13
3. Paulo ina vatulúkwana da Tesalonáika yaidi 4:1—5:22
4. Paulo ina kawanoi da Tesalonáika manudi 5:23-28
Leta ana togínina be ana tokatuyaivayao
1
(1 Tesalonáika 1:1)
1 Komi Yeisu ana totugugunayao Tesalonáika goi,
Komi tauyami Tamada Yaubada be ida Tomoya Yeisu Guyau taiyao bogina kospwagógana, e ame ami leta yau Paulo, Silovano, be Timoti kagini kaetune iwo yaimi.
Yaubada ina kanuwóiya be ina tuboina bei ivinimi.
Kidi Paulo idi sinapu Tesalonáika goi
be nakae da Tesalonáika idi sinapu
(1 Tesalonáika 1:2—3:13)
Paulo ina kauyagu
da Tesalonáika yawoidi manuna
2 Tuta liliuna Yaubada yaina kakaauyagu komi madabokimi manumi. Ima kawanoi Yaubada yaina goi kanuwaaisimi. Tuta liliuna
3 komi imi paisewa imi numisa pasina be imi poisógana imi matakoi pasina be imi mesayágana imi lotuta ida Tomoya Yeisu Guyau yaina pasina ida Yaubada Tamada matana goi kanuwokaavatedi.
4 Komi semao Yaubada imatakooiyemi, ima kauyaguyana unana kaayagoi bogina ikinavemi komi ina bodao.
5 Ami kinavayana kaayagoi unana tutayana Vala Dedevina katalavaite yaimi, ima talavaitayana geya livala kaka goi geya, go sem ima livalayana mana togaga. Nakae livalayana Baloma Kimaasabaina ikamoitamoedoko yaima goi. Moe bogina kooyagoi unana kai boi kakaaiyaka yaimi goi, e ima guinuwa madabokina bogina kogite moe ami dedevina manuna.
6 Aiyuwoina komi ami kinavayana kaayagoi unana kai be ida Tomoya kovatotowonema ame nakae: Mou gagaidi kobaabanedi imi numisa pasina go, tuwo Valayana mami uyáwana kouuyaone. Uyawanayana Baloma Kimaasabaina ivinimi.
7 Tauna komi aba gita tonumisa liliudi yaidi, moeko Mesadoniya goi be nakae ameko Akeya goi.
8 Moitamo, komi aba gita tayamo. Komi goi ida Tomoya valena isagayako geya kada Mesadoniya be Akeya kaka goi geya, go sem imi numisayana Yaubada yaina valena bogina isagayako asa liliudi goi! Tauna geya itoboineyeta imi numisa manuna katalavaita.
9 Bogina koyagoi. Ava kasa goi kana, e toni kasa toinidi sitalavaitema manakaema boi mama nuwotokai kasowóduwo yaimi be nakae sitalavaitemi komi manakaemi yaubada polapola bogina kotugaviledi go, Yaubada maa yawoina be mooitamoina konoko bego komi Tauyana ina pakonayao, e kokasalemi Tauyana yaina.
10 Aiyuwoina sitalavaitemi komi manakaemi Natuna boi ámasa goi bogina ikaaitáoe kotuuyaosi bei yábana goi ikaluvilamna ima. Natunayana moe Yeisu; Tauyana Yaubada ina egamogamogu imamaima goi bei iyaveda. Tauna kaayagoi Yaubada ikinavemi.