2 Tesalonáika
Yeisu ana totugugunayao Tesalonáika goi
adi leta aiyuwoina
Livala Aba Vaita
Leta ame Paulo ma senao Silovano be Timoti sigini sietune ina Yeisu ana totugugunayao Tesalonáika goi yaidi. Tesalonáika moe asa tayamo Mesadoniya parovinsi sinaena. Asayana tupwana gagaina.
Paulo Korinta goi ikaaiyaka tutayana ma senao leta ame sigini. Boi mainao Yeisu ana totugugunayao Tesalonáika goi adi leta vakuumgoina tala 50 sinaena sigini go, tukówana maniyedi sikavava, e ame ina leta aiyuwoina nakae tala 50 sinaena sigini.
Boi Paulo ina Tesalonáika Vala Dedevina italavaite tomota yaidi, e maniyedi sinumisa. Tesalonáika tetelina buki Guinuwa 17:1-9 ikaaiyaka.
Leta ame goi kidi Paulo siivatétala gagaina Yeisu ina kaluvilamna manuna. Aiyuwoina Paulo latuwona kidi idi numisa goi sitaoyaakavata. Aitonina tonumisa maniyedi geya sipaiseweta unana sinuwonúwana Yeisu giyakainava bei ikaluvilamna, tauna kidi Paulo tonumisayadi sikatumatalidi bego sipaaisewa ana kadókana Yeisu ima.
Leta Luluna
1. Leta ana togínina be ana tokatuyaivayao 1:1-2
2. Paulo kidi idi kauyagu be Yeisu ina kaluvilamna manuna 1:3-12
3. Vatulúkwana Yeisu ina kaluvilamna manuna 2:1-17
4. Awanoi kidi Paulo manudi 3:1-5
5. Lovina suumoyaidi manudi 3:6-15
6. Paulo ina vaduduwo 3:16-17
1
Leta ana togínina be ana tokatuyaivayao
1 Komi Yeisu ana totugugunayao Tesalonáika goi,
Komi Tamada Yaubada be ida Tomoya Yeisu Guyau taiyao bogina kospwagógana, e ame ami leta yau Paulo, Silovano be Timoti kaetune iwo yaimi.
2 Tamada Yaubada be ida Tomoya Yeisu Guyau idi kanuwóiya be idi tuboina bei sivinimi.
Paulo kidi idi kauyagu
be Yeisu ina kaluvilamna manuna
3 Semao, itoboinema tuta liliuna kakaauyagu Yaubada yaina goi komi manumi. Ima kauyaguyana itoboine unana imi numisa nava ibibíbina nakae imi matakoi sedao yaidi goi kovaaituwe.
4 Tauna Yaubada ana totugugunayao liliudi matadi goi kauyawana gagágasa manumi. Yaubada ana totugugunayaoyadi kalatuwokoidi komi gedageda be mou kobaabanedi go, nava komeesayágana be koonumisa.
5 Imi sinapuyadi kiyakiyaya tayamo bego Yaubada ina takínona moe kivaavasaina, tauna bei ivayokoimi kina ina kalibúbuna tomotaimi. Moe pasina ame tuta mouyadi kobaabanedi.
6 Moitamo. Yaubada ina takínona moe kivaavasaina, tauna itoboine tauyadi siyogedeegedemi ikatumapudi, e nakae iyogedegededi.
7 Ago komi be kai ida mouyadi goi ida waiwasi bei ivinida tutayana ida Tomoya Yeisu yábana goi isowóduwo. Tauyana mana aneroseyao toogagaidi
8 yeu sabeninimina ikalinibisidi go, sisou simamaima. E ina sowoduwoyana goi avatauwa neta Yaubada geya siyagoiyeta be nakae ida Tomoya Yeisu Valena Dedevina geya sikabikaoneyeta, bei ikatumapudi.
9 Tomota amo tauyadi nakae Yaubada ina liuna bei sibabane. Liunayana moe sivailai vata. Nakae ida Tomoya matana goi be ina togaga ana káeyana goi itavileiyevataedi.
10 Moe bei isowóduwo tutayana Tauyana bei ima bego ina kimasabayao sitaimamine o tadigo kada, ‘Ina tonumisayao liliudi sikainaope.’ Moe komi nakae taiyao unana ima talavaita konumise.
11 Imi yapaliyana pasina tuta liliuna komi manumi kakaawanoi ida Yaubada yaina bego tutayana idovatusimi, bei igitemi komi imi ketoiya itoboine nakae boi bogina iduduwemi ina bodao. Aiyuwoina kakawanoi bego ida Yaubada ina togaga goi ikitoogagemi bei komi imi sinapu dedevina nakae latuwomi be nakae itoboinemi imi guinuwa imi numisa pasina koguuinuwedi.
12 Ima kawanoiyana nakae bego yawoimi goi ida Tomoya Yeisu ina togaga ana káeyana kovagiitakoe be nakae komi nakae yoimi ikilaagasidi. Moe nakae itoboine unana ida Yaubada be ida Tomoya Yeisu Guyau idi kanuwóiya yaida goi ikaaiyaka.