10
Yeisu yawoina sivatayamo ikasale ámasa goi
kita liliuda ada yava manuna
1 Guyau ina kasalayana tuwaina ataligei. Yaubada ina Katukeda moe dogoi dedevidi nava bei Yaubada iguuinuwedi yaida makayaudi. Atukedayana geya kada dogoi toina geya. Tauna nakona Tonúwala Toolagaina tala tamo tamo goi tuta liliuna yoguyogu sikaumatedi sikaasaledi Yaubada yaina bego tomota sidedevina Yaubada matana goi go, Atukedayana geya itoboineyeta bei Yaubada ana tovalabelabenayao ikimatuwedi.
2 Manakae? Amo vininabeso yoguyoguyadi nava bei sikaasaledi idi goyo manudi neta sikimavadevataedi? Geya! Neta amo vininabesoyadi moitamo sivatayamo sikasaledi be sikimavadedi, e Yaubada ana tosakululuyao nukotodi geya isabutukoidita idi goyo manudi. Go moe nakae geya isowoduwoita!
3 Go sem vininabesoyadi moe adi kaba nuwokavata tala tamo tamo goi kidi nava madi goyo.
4 Ame moitamo. Bulumakau bolamo be goti bolamo ikaikaidi geya itoboinedita tomota ida goyo sitauwedi.
5 E tauna tutayana Guyau ima poyapoya ame goi, Yaubada ilatuwoko, idigo kana,
‘Yoguyogu ikaikaidi adi kasala be
parawa ana vininabeso geya latuwom.
Go wowogu kwatubayasi bei akasale yaim.
6 Tomota idi vininabeso yoguyogu sivakasavedi
adi kasala kom yaim o idi goyo manudi yoguyogu
sikaumatedi sikasaledi kom yaim go,
moe dogoiyadi geya kuuyaonedita.
7 Tuwo kagu,
“Gwa! Yau amegu.
Yaubada e, bogina ama
bei kom im nuwonúwana aguinuwe
nakae boi manugu buki nuunumina goi sigini.” ’
Same 40:6-8
8 Mainao maeko goi Tauyana kana,
‘Yoguyogu ikaikaidi adi kasala,
parawa ana vininabeso,
tomota idi vininabeso yoguyogu sivakasavedi adi kasala
be nakae yoguyogu sikaumatedi adi kasala goyo manudi
geya latuwom be nakae geya kuuyaonedita.’
Same 40:6
Go moe dogoiyadi sikasaledi nakae Yaubada ina Katukeda idige go, tuwo amo nakae Yaubada ilatuwoko.
9 Niga idigo kana,
‘Gwa! Yau amegu.
Bogina ama bei kom im nuwonúwana aguinuwe.’
Same 40:8
Bogina kogite? Enao bogo goyo adi núwala ikabi ikalave go, enao vau iyato.
10 Ina nuwonuwanayana pasina, tauna Yeisu Guyau sivatayamo wowona ana kasala goi ikimasabeda Yaubada umana.
11 Tuwo Tonúwala liliudi Vada Kimaasabaina goi siitaoya maliyalina tamo tamo Yaubada ina paisewa siguuinuwedi; nakae vininabeso liliudi sikaasaledi Yaubada yaina go, vininabesoyadi geya itoboinedita bei tomota idi goyo sikabidi sikalavedi.
12 E kina go ida Tonúwala Tolagainayana sivatayamo vininabeso tayamo ikasale goyo manudi go, ina kasalayana moe tuta madabokina itoboine. Ikasale ikavava, wowoina basekoina Yaubada kakataina goi itusobu.
13 Amo tutayana iiyamwasi ana kadókana ina kaleyayao Yaubada ivasobusobuyedi.
14 Moitamo. Ida Tonúwala Tolagainayana ina núwala ana paisewa bogina ikavava. Tayamo vininabeso goi kita bogina ikimasabevataeda toinina umana ikimatuweda.
15 E moe Baloma Kimaasabaina nakae bogina ikamoitamoe yaida. Tauyana idigo kana,
16 ‘Yauwe idigo kana,
“Amo tutayana bei akanasíuna
Isileli tubunao yaidi goi ame nakae:
Nuwodi goi guna Katukeda bei ayatoidi
nakae kidi atedi goi aginidi.” ’
Yeremaya 31:33
17 Namliyeta idigo kana,
‘Geya tuwaina idi goyo
be nakae idi kapipilova bei anuwokaavatedi.’
Yeremaya 31:34
18 E ame goyoyadi yaida goi Yaubada bogina inuwotaoidi, tauna geya tuwaina goyoyadi adi vininabeso takasaledi Yaubada yaina!
Yaubada tanōko
be nakae ida numisa tayoisikavāte
(Iberiu 10:19-39)
19 E tuwo segowo, Yeisu ikaikaina goi mada katepatu Tukunu Kimaasabaina Toina ana siu manuna.
20 Wowona ina kámasa goi enao vau, moe yawana vau ana kenao, ikatupáeve kita manuda tutayana vabodaupa kaarekoina goi isiu ina Tukunu Kimaasabaina Toina goi.
21 Aiyuwoina mada Tonúwala Toolagaina itobukukuyuida go, Yaubada ina Vada irugwausi.
22 Tauna ma kateda mooitamoidi be mada numisa toogagaina Yaubada tanōko unana ateda bogina iseulidi be nakae nuwoda ina sabutuko ikimavadedi go, wowoda bwae maavadaina goi inikidi.
23 Ida lotuta Yeisu yaina goi takamooitamoe, geya ida nanayuwomo tayoisikavāte. Tauyana ada tokatótula moe aba numisa. Tauna ida lotuta Yeisu yaina tayoisikavāte.
24 Aiyuwoina sedao manudi tanuwonūwana manakaeda nuwodi tanuwotalatalaidi bei simatakoi be guinuwa dedevidi siguinuwedi. Ida nuwotalatalayana ame nakae:
25 Taabu ida tugúguna ida Tomoya manuna takaalavēdi nakae tomota maniyedi idi sinapu, go sem sedao atedi tavapatupatūdi go, mada salau nakae taguuinūwe unana Yauwe ina Maliyalina imamaima.
26 Neta nanamsa Yaubada ana Nanamsa Mooitamoina manuna bogina takabi go, talovina nava goyo taguuinuwe, geya tayaamo núwala ida goyo manuna ikaaiyaka,
27 go sem mada matoita ada takínona tatuyaosiyamo be yeu ivakaigaga toina tababane. Amo yeuyana giyakainava bei Yaubada ina kaleyayao ivakasavedi.
28 Avatauwa neta Yaubada ina Katukeda boi Mosese iivinidi sikatae, e geya adi nuwokapisimo go, idi goyo adi totalavaita adi taiyuwo o adi taito idi talavaita goi itoboinedi sikámasa.
29 Neta moe nakae Yaubada itagone ina Katukeda ana tokapipilovayao manudi, manakaemi konuwonúwana tomota adi liuna manuna neta idi goyo ame nakae: Yaubada Natuna sikaolilive? Aiyuwoina Yaubada ina kanasiuna vau ikaikaina sikaogoyoe. Ikaikayana goi Yaubada ikimasabedi toinina umana. Aitonina Baloma Kimaasabaina sikaogoyoe go, Balomayana anuwóiya unana. Manakae? Liuna gagaina bei sibabane gea geya? Bei igoyo toina ae?
30 Moe moitamo. Bogina tayagoi moe kina Yaubada idigo kana,
‘Yau tokapipilova adi toliuna. Yau bei akatumapudi.’
Atukeda 32:35
Aiyuwoina Mosese kana,
‘Yauwe ina bodao bei itakinoidi.’
Atukeda 32:36
31 Moe aba matoita toina neta Yaubada maa yawoina ina takínona nimana goi tababane.
32 E konuwovīla boi tutayana Yaubada nuwomi igimitapasigidi, namliyeta mou ana gedageda gagaina kolotowoidi go, kotogaga.
33 Moe gedagedayadi ame nakae: Tuta maniyena tomota matadi goi sigieomaemaemi, nakae sitagiwoimi be siyogedegedemi go, tuta maniyena semiyao nakae sigieomaemaedi; adi gedagedayadi goi komi taiyao kovavasa.
34 Moitamo. Komi taiyao kovavasa. Tauyadi deri ana tokaiyakoyao konuwokapisiyedi be kovaitedi be nakae tutayana konami tomota sivainaoidi go, tuwo kouyáwana unana bogina koyagoi konami dedevina toina be aiyako vaatayaina yábana goi ikaaiyaka nava bei kobabane.
35 Tauna imi katepatu taabu kookalāve. Moe imi katepatuyana goi ami vaiwówana bei kobabane.
36 Neta latuwomi ami vaiwowanayana kobabane, itoboinemi komesayágana bego tutayana Yaubada ina nuwonúwana bogina koguinuwe, kaga ikaatotule bei kobabane.
37 Moe nakae Gínina Kimaasabaina idige kana,
‘Nava tuta giyaina tuwaina
Tauyana imamaima bei ima go, geya mgoninamo.
38 E yau guna tokibóbwata numisa goi iiketoiya.
Go neta itugavilegu,
geya auyaoneyeta.’
Abekuki 2:3-4
39 E kita go geya Yaubada ana totugavilayao nakae geya, moe vailai ana kenao. Go sem kita tauyadi aba numisa nakae. Moe yawoida adi yava ana kenao.