☰ PILEMONI 1
Pilemoni
Pilemoni ana leta
Livala Aba Vaita
Leta ame Paulo ma siyana Timoti sigini sietune ina koroto tayamo yoina Pilemoni. Pauloyana deri goi ikaaiyaka nakona Roma goi. Nakona tala 60 ina tala 62 go, nauyayanaidi letayana sigini.
Pilemoni Yeisu ana tonumisa tayamo asa Kolose goi ikaaiyaka go, mana pákwana tayamo yoina Onesimo. Kina Onesimoyana ina goyo o ina bágala pasina isiya ina Roma goi bego Paulo ilusale, latuwona bego bagalayana igiepalu. Amoko goi Paulo ibabane. Go tomota paakonina neta isiya go, niga ana tomoya iyoisimnei, itoboine pakoninayana ikaumate.
E Onesimo Roma goi Paulo ibabane go, Paulo Onesimoyana ivatuluko Yeisu tetelina, e inumise. Tauna Paulo Pilemoni ana leta igini bego Onesimo inave Pilemoni ivini. Paulo latuwona Pilemoni ina matakoi goi ina pákwana Onesimo ina goyo inuwotao go, ivauyaonemnei.
Leta Luluna
1. Leta ana togínina be ana tokatuyaivayao 1-3
2. Pilemoni ina matakoi be ina numisa 4-7
3. Paulo ina kawanoi Onesimo manuna 8-22
4. Paulo ina vaduduwo 23-25
1
Leta ana togínina be ana tokatuyaivayao
1-2 Ima kalo Pilemoni,
Yau Paulo deri ana tokaiyako Guyau Yeisu ana talavaita pasina siyada Timoti taiyao leta ame kaetune iwo yaimi; tauyami moe kom Pilemoni be niuda Apiya be Arikipo,† tauyana Yeisu ana tovayaviya kai nakae, be nakae komi Tomoya ana totugugunayao kosaakululu Pilemoni ina vada goi.
3 Yaubada Tamada be ida Tomoya Yeisu Guyau idi kanuwóiya be idi tuboina bei sivinim.
Pilemoni ina matakoi be ina numisa
4-5 Livala bogina anove Yaubada ina kimasabayao madabokidi kumatakooiyedi be nakae ida Tomoya Yeisu nava kuunumise, tauna guna kawanoi goi anuwokaavatem go, tuta liliuna akaauyagu guna Yaubada yaina kom manum. 6 Guna kawanoiyana Yaubada yaina bego ida kabivekoveko ida numisa pasina ikitogagem. Moeko goi dogoi liliudi dedevidi Guyau yaina goi siisowóduwo bei kuyagoidokoidi. 7 Siyagu, guna kawanoi itoboine unana im matakoi pasina uyáwana gagaina be nakae atepatu gagaina alootowoidi. Im matakoiyana goi Yaubada ina kimasabayao yawoidi bogina kulisidi. Tauna guna kawanoi goi anuwokaavatem.
Paulo ina kawanoi Onesimo manuna
8 Tauna latuwogu dogoi tayamo kuguinuwe. Yau Guyau ina vamoléyana magu katepatu gagaina itoboinegu bei alovinaem kaga itoboinem kuguinuwe 9 go, tuwo matakoi pasina akawanoi makimaki yaim dogoiyana kuguinuwe. Yau Paulo Guyau Yeisu ana katumapu‡ be nakae deri ana tokaiyako Guyauyana ana talavaita pasina 10 akawanoimakimakiyem yau natugu Onesimo‡† boi deri goi avaanatune manuna. 11 Tauyana boi geya basabasainamo yaim go, ame tuta tauyana ma basabasaina kom yaim be nakae yau yaigu.
12 Tauyana aetunevile iwo go, tauyana ategu. 13 Latuwogu avagagale bego ikatumapum be guna kaiyaka deri sinaena Vala Dedevina ana talavaita pasina ivaitegu. 14 Go neta geya im tagonamo, e geya tayaamo kaga latuwogu aguinuwe, govila bei im vaita dedevina yaigu moe guna lovina pasina go, geya toinim im nuwonúwana pasina geya. 15 Tauyana geya avagagaleyeta unana nakona tuta kaakupina goi Yaubada ivatumasabemi ame pasina: Bego tutayana ikaluvila iwo, ikaiyako vata yaim. Tauna geya avagagaleyeta. 16 Tutayana ikaluvilamna iwo bei ikaiyako vata yaim go, geya tuwaina im pákwana kaka geya, go sem kidi paakonidi ikalisavedi unana tauyana siyada, ida kalo, Yeisu ana tonumisa tayamo. Tauyana manuna nukotogu iyoi go, nakona kom nukotom iyoi gagaina unana tauyana im pákwana sakava ana dadava goi go, siyam ida spwagógana ida Tomoya taiyao pasina!
17 Tauna neta kom kunuwonúwana bego yau im tosavaiyuwo Yaubada ina paisewa manuna, e agu matakoi yaim goi agu gogo nakae Onesimo kwabimnēi. 18 Go neta kaga nakae boi ina goyo o ana rowaga yaim, e kuyāto, bei yau amapu.
19 Yau Paulo ame toinigu nimagu goi agini! Madabokina bei yau amapusave. Kunuwokavāte yau pasigu yawoim vata bogina kubabane. Moe nakae am rowaga go, geya latuwogu rowagayana manuna akavilevilem.
20 U siyagu, ida spwagógana ida Tomoya taiyao pasina latuwogu vaita kom yaim goi ababane. Ida spwagógana Guyau taiyao pasina yawoigu kulīsi! 21 Ayagoi sopagu bei kwabikaone. Moe pasina leta ame agini unana ayagoi moitamo guna nuwonúwana bei kuguinuwe go, ayagoi bei kukidedededi!
22 E yau kebagu im vada goi kwatuubayāsi. Aalotuta bego imi kawanoi Yaubada yaina goi tuta giyaina bei sitaligeigu, e bei ao. Tauna kebagu kwatuubayāsi.
Paulo ina vaduduwo
23 Epapira† ina numisa Guyau Yeisu yaina pasina deri ana tokaiyako yau taiyao, e tauyana ina yabobona yaim. 24 Maki,†a Aristako,†b Demasi†c be Luke†d nakae idi yabobona yaim; tauyadi Yeisu ina tosavaiyuwoyao yau taiyao.
25 Ida Tomoya Yeisu Guyau balomaimi bei ikanuwoiyedi.
 
Yau Paulo
† 1:1-2 Kol 4:17. ‡ 1:9 Atumapu: Ame livalayana ana yagoina aiyuwo. Tayamo moe tomoya. Aiyuwoina ana yagoina moe atumapu. ‡ 1:10 Onesimo: Ame youyana moe da Giriki niyadi go, ana yagoina kada, ‘Basabasaina.’ † 1:10 Kol 4:9. † 1:23 Kol 1:7, 4:12. †a 1:24 Gui 12:12,25, 13:13, 15:37-39; Kol 4:10. †b 1:24 Gui 19:29, 27:2; Kol 4:10. †c 1:24 Kol 4:14; 2Ti 4:10. †d 1:24 Kol 4:14; 2Ti 4:11.
☰