Roma
Yeisu ana totugugunayao
Roma goi adi leta
Livala Aba Vaita
Leta ame Paulo igini ietune ina Yeisu ana totugugunayao Roma goi yaidi. Letayana igini tala 57 ina tala 59 goi go, nauyayanaidi. Go tomota maniyedi sinuwonúwana nakona tala 55 sinaena igini. Nakona Korinta goi ikaaiyaka tutayana igini.
Geya Paulo pasina da Roma maniyedi Yeisu sinumise geya. Go sem nakona Diyuu maniyedi Roma ana tokaiyakayao sina Yerusalema goi Pentikosi manuna, e Vala Dedevina Pita itaalavaite sinove, sinumise. Tutayana sikaluvilamna sina Roma goi Diyuu badabadaidi sivatulukoidi, e maniyedi sinumisa.
Tonumisa Roma goi moe kidi Totuyoyowo nuumisaidi be nakae Diyuu nuumisaidi.
Leta ame goi Paulo latuwona tonumisa Roma goi ilatuwokoidi ina nuwonúwana ina vadádana yaidi manuna. Ina vadadanayana ikavava, latuwona tauyadi sivaite tutayana ina asa Sipeini goi.
Leta ame ana masi gagaina moe Paulo latuwona tonumisayadi ivatulukoidi bego Yaubada aba numisa ina kanasíuna yaina goi. Boi nimatu ikatótula Eberamo yaina bego boda gagaina tauyana yaina goi bei sisowóduwo. Moe atotulayana Eberamo inumise, tauna Yaubada ivayoko kina kiboobosina. Paulo ivatulukoida enao tayamo toito ikaaiyaka bego Diyuu o Totuyoyowo kiboobosidi Yaubada matana goi. Enaoyana moe numisa.
Aiyuwoina Paulo ivatulukoida kita neta Yaubada bogina ivayokoida kita kiboobosida, e ida sinapu itoboine nakae Tauyana latuwona.
Leta Luluna
1. Paulo ina talavaita be ina vadádana manudi 1:1-15
2. Yaubada ina egamogamogu be nakae Tauyana aba numisa manudi 1:16—4:25
3. Ida lotuta: Bego Yaubada ana káeyana tomoeeyalina goi takaiyako vata 5:1—8:39
4. Yaubada aba numisa bei ina kanasíuna ana katótula iguinuwedi 9:1—11:36
5. Tomota kiboobosidi idi sinapu nakonakae 12:1—15:13
6. Paulo ina nuwonúwana vaamliyaidi 15:14-33
7. Leta ana katuniboda 16:1-27
Paulo ina talavaita be ina vadádana manudi
1
(Roma 1:1-15)
Paulo ina talavaita Vala Dedevina manuna
1 E komi segowo Roma goi,
Yau Paulo leta ame agini iwo yaimi. Yau Guyau Yeisu ina pákwana be nakae ina vamoléyana nakae Yaubada iduduwegu o tadigo kada, ‘Bogina ikimasabegu Vala Dedevina Tauyana goi ima manuna.’
2 Valayana boi igimikaatotule ina tokabivalavala yaidi goi, e Gínina Kimaasabaina goi sigini.
3 Valayana moe Natuna Valena. Sakava goi Natunayana ibíbina Devida ina nunu yaina.
4 Ina taoyamna tokámasa yaidi pasina Yaubada ivayoko Tauyana Natuna mana togaga. Natunayana moe ida Tomoya Yeisu Guyau. Go ana vayokwanayana moe Baloma Kimaasabaina goi, Tauyana ada kimasaba Yaubada umana unana.
5 Yeisuyana goi anuwóiya kababane o tadigo kada, ‘Ikawoima, e kai ina vamoleyanayao’ bego Tauyana yoina manuna kana Totuyoyowo liliudi yaidi Vala Dedevina katalavaite, e madi numisa sikabikaone.
6 Komi da Roma tauyadi taiyao; tauyami Yaubada iduduwemi bei komi Yeisu Guyau ina bodao.
7 Leta ame moe komi, tauyami Yaubada imatakooiyemi be nakae iduuduwemi, ina kimasabayao Roma goi ami leta.
Yaubada Tamada be ida Tomoya Yeisu Guyau idi kanuwóiya be idi tuboina bei sivinimi.
Paulo ina kauyagu
be nakae ina vadádana manudi
8 Mainao Yeisu Guyau ina guinuwa goi madabokimi manumi akauyagu ida Yaubada yaina. Guna kauyaguyana unana imi numisa valena inúnuwo ina poyapoya ame ana madabokina goi.
9 Guna kauyaguyana itoboine. Yaubada iyaagoigu manakaegu tuta liliuna guna kawanoi goi anuwaaisimi! Tauyana yaina ma kategu madabokina be magu taimámina apaaisewa Natuna Valena Dedevina ana talavaita manuna.
10 Tuta liliuna guna kawanoiyadi liliudi goi akaawanoi Yaubada yaina neta ina nuwonúwana nakae, bei itoboinegu ao avadademi.
11 Akatukuwonemi bei agitemi bego Baloma Kimaasabaina ina yabobona akaiguyauye yaimi, bei akitogagemi.
12 E moe bei komi be yau takipaiwoleda. Nakae komi imi numisa ikipaiwolegu, e yau guna numisa ikipaiwolemi.
13 E segowo, latuwogu koyagoi bego tuta badabadaina aavatoiya ao yaimi goi go, boi ima ame tuta dogoi maniyedi sisanaabodegu geya awoita. Latuwogu ao bego itoboinegu komi nakae yaimi goi abágula, e bei guna bagulayana kiyayana yaimi goi ababane nakae boi aababane Totuyoyowo liliudi yaidi goi.
14 Magu tasíkwana Vala Dedevina atalavaite tomota liliudi yaidi. Neta kidi asa gagaidi adi tokaiyakoyao be nakae woiwoitulu, kidi tonanamsa be nakae totamogemoge.
15 Tauna nakae latuwogu toina bego Vala Dedevinayana atalavaite komi Roma goi kokaaiyaka yaimi.
Yaubada ina egamogamogu
be nakae Tauyana aba numisa manudi
(Roma 1:16—4:25)
Vala Dedevina goi Yaubada ikaiwoduwe
Tauyana aba numisa ina kanasíuna yaina
16 Moitamo, guna nuwonúwana bego Vala Dedevinayana atalavaite yaimi. Valayana manuna geya aomaemaeta. Valayana moe Yaubada ina togaga tonumisa liliuda ada yava manuna! Yavayana moe mainao kita Diyuu manuda namliyeta komi Totuyoyowo manumi.
17 Manakaeda tayagoi Valayana moe Yaubada ina togaga? Ame nakae: Vala Dedevinayana sinaena goi Yaubada ina kibóbwata ana kanasíuna manuna bogina ikaiwoduwe. Ina kaiwoduwoyana moe Tauyana aba numisa pasina go, kita tonumisa manuda. Moe Gínina Kimaasabaina nakae idige kana,
‘E kina tokibóbwata numisa goi iiketoiya.’
Abekuki 2:4
Yaubada ina egamogamogu Totuyoyowo
idi goyo pasidi
18 Kaga unana Yaubada ina kibobwatayana ikaiwoduwe? Ame pasina: Yaubada yábana goi ina egamogamogu bogina ikaiwoduwe tomota idi kaoliliwo liliudi be nakae idi kapipilova liliudi pasidi. Tomotayadi idi kapipilova goi sipoikíkina bego Yaubada ana Nanamsa Mooitamoina sisanabode.
19 Yaubada ina egamogamoguyana ikaiwoduwe unana kaga neta itoboineda tayagoi Yaubada manuna bogina imavada tauyadi yaidi goi unana Tauyana bogina ikaiwoduwe yaidi, tauna bogina siyagoi.
20 Manakaena ikaiwoduwe? Boi poyapoya ana madágina kunu goi go, ima ame tuta nakona Tauyana ina sinapu, nakae ina togaga aiyako vaatayaina be nakae aderina, geya tagitedita. Ago ina madágina liliudi goi itoboineda tagitedokoidi, tauna togoyoidiyadi geya itoboinedita idi kapipilova manuna sivakibala.
21 Unana siyagoi Yaubada ikaaiyaka go, tuwo ina togaga ana káeyana geya sikamoitamoeyeta nakae itoboinedi. Nakae yaina geya sikauyaguta, go sem idi nuwogau goi tauyadi geya basabasaidimo be nuwodi yaaluwoidi bogina sikamamaníwana. Tauna geya itoboinedita sivakibala idi kapipilova manudi.
22 Tauyadi toinidi sipásima bego madi nanamsa go, kidi siyaluwo.
23 Yaubada aiyako vaatayaina ina togaga ana káeyana sikalave go, toinidi idi nuwonúwana goi idi yaubadayao adi tapata kaavavaidi tokwalu nakae siwodugudi, e yaidi goi sisaakululu. Tokwaluyadi moe tomota maisiyadi, mánuwo maisiyadi, yoguyogu maisiyadi be kaga daladalaidi maisiyadi.
24 Tauna Yaubada itagonedi toinidi idi yalagau nuwodi goi sisabokuuliyedi be simasisi goyogoyo, tuwo amo guinuwayadi goi wowodi sigieomaemaedi.
25 Ago Yaubada ana Nanamsa Mooitamoina sikalave go, pola goi sikaimapu. Tuwo Tomadágina yaina goi geya, go sem ina madágina yaidi goi sisaakululu be nakae sitaaimámina! Tomadaginayana aba yapali vata! E nakae!
26 Amo idi sinapuyana pasina Yaubada itagonedi idi vikaiya aba omayamaya yaidi goi. Idi vevina masisi moitamo koroto taiyao sikalave go, vavina vavina taiyao simasisi goyogoyo.
27 Koroto nakae. Masisi moitamo vevina taiyao sikalave go, madi savívila koroto siyaledi gagaina. Koroto koroto taiyao guinuwa aba omayamaya siguuinuwedi, tuwo adi liuna bei sibabane moe itoboine idi bágala pasina.
28 Kidi Yaubada sidovatusi go, silovina bego Tauyana ana nanamsa moe geya basabasainamo yawoidi manudi, tuwo sikatae, e tauna nakae Tauyana itagonedi toinidi nuwodi goyogoyoidi yaidi goi be kaga geya itoboineyeta yaidi, e tuwo siguuinuwedi.
29 Sinapu ame sivakayaodeidi: Guinuwa liliudi Yaubada ikaataedi, nuwonúwana goyogoyoidi, guinuwa goyogoyoidi, matakónana, goyo nuwonuwodi, vakipikipi, aumata, aumakimaki, pola, yogedageda nuwonuwodi, livalakipakipatu,
30 aogoyo, Yaubada ana tokaoliliwo, aipopóita, nuwatue, gágasa, goyo ana tolosinapu, tamadiyao be sinadiyao sopadi sikapipilavedi.
31 Tuwaina nuwodi maa patudi, idi katótula geya siguinuwedita, geya idi matakoimo be nakae geya idi nuwokapisimo.
32 Tauyadi bogina siyagoi Yaubada mana kivavasa iilovina bego avatauwa neta amo sinapuyadi siguuinuwedi, ámasa itoboinedi go, tuwo nava siguuinuwedi. Go idi goyo sivaituwe. Avatauwa neta sinapuyadi siguuinuwedi, e kidi togoyoidiyadi madi uyáwana sikaodedevinedi!