☰ ROMA 16
Leta ana katuniboda
16
(Roma 16:1-27)
Paulo ina yabobona da Roma nuumisaidi yaidi
1 E niuda Pibe akamoitamoe yaimi goi; tauyana ida Tomoya ana totugugunayao Kenakareya goi adi tovaita. 2 Tauyana akamoitamoe bego ida Tomoya goi tauyana kouyaone nakae komi Yaubada ina kimasabayao itoboinemi. Ago Pibeyana neta kaga ikiseyeseye, e kovāite. Tauyana tovaita tayamo; e tomota badabadaidi be nakae yau bogina ivaitema.
3-4 Kidi guna tosavaiyuwoyao Guyau Yeisu umana Pirisika ma monena Akuila† toinidi yawoidi sinuwoupedi yau manugu, e tauyadi yaidi akauyagu go, geya yau aguta geya, go sem Yeisu ana totugugunayao Totuyoyowo nuumisaidi liliudi nakae sikauyagu, e guna yabobona yaidi. 5 Adi taiyuwokova idi vada goi kidi Yeisu ana totugugunayao sisaakululu, e guna yabobona yaidi.
Kina guna kalo Epeneto Guyau ana togiminumisa Esiya sinaena, e guna yabobona yaina.
6 Meri, tauyana ipooisógana gagaina komi manumi, e guna yabobona yaina.
7 Segowo Diyuu Androniko be Yuniya‡ boi deri ana tokaiyaka yau nakae. Adi taiyuwokova Yeisu ina vamoleyanayao sinaedi toolagaidi madi wowoina tomota goi. Boi mainao sigimispwagógana Guyau taiyao namliyeta yau. Guna yabobona yaidi.
8 Ampiliato, tauyana guna kalo ida Tomoya goi, e guna yabobona yaina.
9 Urabano, tauyana guna tosavaiyuwo Guyau umana, e guna yabobona yaina.
Guna yabobona guna kalo Stakosi yaina.
10 Apelasi, tauyana boi ina numisa ana vakakona goi itogaga, tauna tauyana aba numisa Guyau yaina, e guna yabobona yaina.
Guna yabobona tauyadi Aristobulo ina vada goi sikaaiyaka.
11 Erodiyoni, tauyana Diyuu yau nakae, guna yabobona yaina.
Tauyadi Narikisu ina vada goi bogina sispwagógana ida Tomoya taiyao, e guna yabobona yaidi.
12 Guna yabobona Terupaina be Teruposa yaidi. Vevinayadi ida Tomoya manuna sipoisógana gagaina.
Guna yabobona ida kalo Pesisi yaina. Vavinayana ida Tomoya manuna ipoisógana gagaina.
13 Guna yabobona Rupuso† ida Tomoya ina kinava tayamo yaina. Korotoyana sinana boi ivanatunegu, e guna yabobona nakae tauyana yaina.
14 Guna yabobona Asunikirito, Pelegoni, Erame, Patarova, Erama be nakae sedao moeko taiyao yaidi.
15 Guna yabobona Pilologo, Yuliya, Nereya ma niuna, Olimpa be Yaubada ina kimasabayao liliudi taiyao yaidi. 16 Sedao moeko goi koyoowoiīdi nakae komi kimaasabaimi Yaubada umana itoboinemi.
Guyau ana totugugunayao liliudi ameko idi yabobona yaimi.
Atumátala tolivisi manudi
17 E segowo, akawanoi makimaki yaimi ami dodōkana kidi tolivisi be tovakapusi yaidi. Tauyadi idi sinapu vatulúkwana mooitamoina bogina konovenove sivakaleye. Tauyadi kovakilisīdi. 18 Tomota tauyadi nakae toinidi geya sikasaledita ida Tomoya Guyau yaina, go sem toinidi idi vikaiya yaidi sikaasaledi. Ago idi bóbwara dibidibidi be idi katunuwanuwa goi tomota adi polayoomanaidi nukotodi sivasulaigidi go, komi nakae geya. Geya itoboinedita sivasulaigimi. 19 Moitamo. Imi kabikáwana valena bogina inúnuwo, e tomota liliudi sinove, tauna komi pasimi auyáwana. E latuwogu komi mami nanamsa dogoi dedevidi manudi koguinuwedokoidi go, goyo ana dadava latuwogu komi imi sinapu maavadaidi. 20 E Yaubada, Tauyana tuboina unana, giyakainava bei Kaleya ivavetevete, tuwo ivasobusobuye sobuyekoida goi.
Ida Tomoya Yeisu ina kanuwóiya bei ikaaiyaka yaimi.
Tonumisa Paulo taiyao idi yabobona
da Roma nuumisaidi yaidi
21 Guna tosavaiyuwo Timoti†a ina yabobona yaimi. Nakae semao Diyuu nuumisaidi maniyedi Lukiyo,†b Yasoni†c be Sosipatero†d idi yabobona yaimi. 22 Yau Teritiyo ida Tomoya ana tosabokuli tayamo leta ame agini Paulo manuna,‡ e guna yabobona yaimi. 23-24 Gaiyo,†a tauyana imataogeeogegu be nakae Yeisu ana totugugunayao liliuma itaagonema ina vada goi katugúguna, e ina yabobona yaimi. Erasto†b kina asa ana mani ana torugwáuta be nakae siyada Kwarato idi yabobona yaimi.‡
Yaubada ana yapali
25 E Yaubada tayapalīye! Tauyana itoboine ikitogageda nakae Vala Dedevina aanumise idige. Valayana moe Yeisu Guyau valena ataalavaite. Valayana unana moe Yaubada ina nuwogau boi nimatu go, ima ame vamoounina. 26 Go Valayana ame tuta bogina ikaiwoduwe, e Yaubada Tokaiyako vata ina lovina goi go, tokabivalavala idi gínina goi katalavaite Totuyoyowo liliudi yaidi bego madi numisa sikabikaone.† 27 Yaubada anetava Tonanamsa aba taimámina Yeisu Guyau ina guinuwa goi ame tuta be nakae tuta simamaima!
E nakae!
 
Yau Paulo
† 16:3-4 Gui 18:2,18,26; 1Ko 16:19; 2Ti 4:19. ‡ 16:7 Androniko be Yuniya: Da Giriki niyadi goi kadi, ‘Androniko be Yuniya.’ Yuniya nakona Androniko monena o niuna. † 16:13 Mak 15:21. †a 16:21 Gui 16:1,3, 17:14-15, 18:5, 19:22, 20:4; 1Ko 4:17, 16:10; 2Ko 1:19; 1Tk 3:2,6; 1Ti 1:18, 6:20; Ibe 13:23. †b 16:21 Gui 13:1. †c 16:21 Gui 17:5-9. †d 16:21 Gui 20:4. ‡ 16:22 Teritiyo leta ame igini Paulo manuna. Nakona Paulo ibóbwara go, Teritiyo igini. Ikavava, Paulo ikatuyaivi go, neta ina nuwonúwana Teritiyoyana ikabidoko, e Paulo yoina igini. Moe boi nimatu tomota idi sinapu leta ana gínina manuna †a 16:23-24 1Ko 1:14; 3Iy 1:1. †b 16:23-24 2Ti 4:20. ‡ 16:23-24 Leta ame ana kopi maniyedi goi tomwana 24 geya ikaiyaketa. Go maniyedi goi ikaaiyaka. Nakona tomwanayana Paulo geya iginiyeta, go sem tokaidámana tayamo toinina igini. Tomwana 24 ame nakae: Ida Tomoya Yeisu Guyau ina kanuwóiya komi liliumi yaimi bei ikaaiyaka. E nakae! † 16:26 Rom 1:5.
☰