4
Eberamo ina numisa Yaubada ikamoitamoe
1 Tauna manakaeda? Eberamo bogina tadovatusi go, kaga tababane, kina tubuda sakava ana dadava goi? Geya, ae?
2 Kada go ina guinuwa pasidi Yaubada ivayoko kina kiboobosina, e itoboine tomota matadi goi igágasa. Go geya ina guinuwa pasidi Yaubada ivayoko kina kiboobosina geya, go sem ina numisa pasina. Tauna geya itoboineyeta Yaubada matana goi igágasa.
3 Manakaeda tayagoi moe moitamo? Gínina Kimaasabaina nakae idige, kana,
‘Eberamo inumisa Yaubada yaina, e ina numisayana Yaubada igite, ikamoitamoe bego kina Eberamoyana moe Yaubada nuwona ana tokibóbwata.’
Aba Vatowo 15:6
4 E guna masi ana kaba gita aguinuwe bei koyagoi. Avatau neta ipaisewa, ana maisa moe geya kada tokaiguyau ina kanuwóiya goi geya, go sem topaisewayana ana takona.
5 Go Yaubada ina sinapu ituli. Tauyana itoboine ana tokaoliliwoyao ivayokoidi kidi kiboobosidi. Tuwo avatauwa neta geya sipaiseweta, go sem ame Yaubadayana yaina sinumisamo, e idi numisayana igite, ikamoitamoe bego amo tauyadi nuwona ana tokibobwatayao. Moeko goi idi paisewa pasina geya, go sem idi numisa pasina ivayokoidi kidi kiboobosidi ina kanasíuna manuna. Tauna ina vayokwanayana moe anuwóiya.
6 Moe nakae Devida ina bóbwara tomota adi dedevina manuna neta geya kada idi guinuwa pasidi geya, go sem idi numisa pasina kidi kiboobosidi Yaubada matana goi. Tauyana kana,
7 ‘Avatauwa neta idi kapipilova Yaubada inuwotaoidi
nakae idi goyo ikatuuyouyoidi,
e adi dedevina bogina sibabane.
8 Avatauwa neta idi goyo Yauwe geya ikatuyaividita,
e adi dedevina bogina sibabane.’
Same 32:1-2
Yaubada ina katótula Eberamo yaina
moe ina numisa pasina
9 E tuwo manakae? Amo dedevinayana Devida idigedige moe kita sakavaida kuuponidi adetava manuda, gea kidi sakavaidi geya adi kupwanamo nakae manudi? Madabokiida ae? Ame bogina adige Eberamo manuna kagu,
‘Ina numisayana Yaubada igite, ikamoitamoe bego kina Eberamoyana moe Yaubada nuwona ana tokibóbwata.’
Aba Vatowo 15:6
10 E tuwo Eberamo nakonakae tutayana ina numisa Yaubada ikamoitamoe? Bogina sakavaina ikupo, gea nava geya ikupoeta? Geya kada sakavaina bogina ikupo geya, go sem sakavainayana nava geya ikupoeta
11 namliyeta baige kina Yaubada ilatuwoko aba kinana tayamo iguinuwe. Aba kinanayana moe sakava ana kúpwana. Moe aba kamoitamo bego tauyana kiboobosina Yaubada matana goi. Go Eberamoyana mana numisa tutayana sakavaina nava boi geya ana kupwanamo. Nakae Yaubada iguinuwe bei avatauwa neta sakavaidi geya adi kupwanamo go, sinumisamo, e tauyadi liliudi tubudi moe Eberamo. Moeko goi idi numisayana Yaubada igite, ikamoitamoe, e tauyadi nuwona ana tokibobwatayao.
12 Aiyuwoina Yaubada nakae iguinuwe bei Eberamoyana moe kidi sakavaidi kuuponidi tubudi nakae. Tauyadi moitamo sakavaidi bogina sikupoidi go, tuwaina tubudi Eberamoyana ina numisa kiyaena sivaekuli. Ina numisayana tagite tauyana yawoina goi tutayana sakavaina nava geya ana kupwanamo.
13 Guna nuwonúwana alumavivisi. Yaubada boi ikatótula Eberamo mana bodao yaidi goi bei poyapoya ana madabokiina ivinidi adi kaba lovina. Ago geya kada ina Katukeda ana guinuwa pasina ikatótula geya, go sem unana Eberamo ina numisa pasina tauyana kiboobosina Yaubada matana goi.
14 Neta atotulayana ina sowóduwo kidi Atukedayana adi toguinuwa sibabane, e numisa bogina geya basabasainamo be nakae atotulayana dogoi besobeso.
15 Manakaeda tayagoi moe moitamo? Yaubada ina Katukeda ana kapipilova pasina ina egamogamogu isowóduwo. Go neta Atukedayana geya, e apipilova geya.
16 Yaubada ina katótula Eberamo ivini moe ina numisa pasina unana ame: Bego atotulayana moe Yaubada ina kanuwóiya kaka goi, e bei ina katotulayana kita Eberamo ina bodao liliuda moitamo tababane. Geya kada kidi Atukedayana ana toguinuwa aditava geya, go sem avatauwa neta idi numisa Eberamo ina numisa nakae, tauyana madabokiida tubuda nakae.
17 Moe nakae boi Gínina Kimaasabaina idige, kana,
‘Avayokoim kom boda badabadaidi tubudi.’
Aba Vatowo 17:5
E Eberamo inumisa Yaubada yaina, tuwo tauyana moe madabokiida tubuda nakae Yaubada matana goi. Eberamo iyagoi Yaubada ibóbwara moitamo unana itoboine tokámasa ikaitaoedi be nakae kaga neta mainao geya sikaiyaketa, e ibóbwara sisowóduwo.
18 Ana kaigigita atotulayana geya itoboineyeta isowóduwo o tadigo kada, ‘Eberamo itoboine nukotona itopa’ go, tuwo tauyana mana lotuta inumisa nakona moitamo nava tauyana bei boda badabadaidi tubudi nakae Gínina Kimaasabaina bogina idige, kana,
‘E tubumowo adi badabada bei nakae.’
Aba Vatowo 15:5
19 Geya tayamo tuta Eberamo ina numisa ineneta. Tauyana ana tala giyakainava 100 bogina, e bogina iyagoi wowona kaamasina be nakae Sera kaagalina.
20 E Yaubada ina katótula manuna geya inanayuwoita; nakae ina numisa geya ikalaveyeta. Go sem ina numisayana imatuwo unana Yaubada aba taimámina ikinane
21 be nakae iyagoi bego kaga Yaubada bogina ikaatotule, nakae itoboine iguinuwe.
22 Moe pasina tauna kina Yaubada Eberamo ina numisayana igite, ikamoitamoe bego kina Eberamoyana moe Yaubada nuwona ana tokibóbwata.
23 E amo gininayana kana, ‘Ina numisayana ikamoitamoe’ go, moe geya kada Eberamo anetava manuna geya,
24 go sem kita nakae manuda! Bei ida numisa ikamoitamoe, e kita nakae kiboobosida Tauyana matana goi, kita tauyada tanumisa bego ida Tomoya Yeisu tokámasa yaidi bogina ikaitáoe.
25 Yeisuyana boi siyoisi ida kapipilova pasidi sikaumate go, kita manuda Yaubada ikaitáoe bego ivayokoida kita nuwona ana tokibobwatayao.