1 Konsa, tout fis Israël yo depi Dan jis rive Beer-Schéba, menm avèk peyi Galaad la te sòti e kongregasyon an te rasanble kòm yon sèl òm a SENYÈ a nan ✡Mitspa. 2 Chèf a tout pèp yo, menm tout tribi an Israël yo, te vin kanpe nan asanble a pèp Bondye a, kat-san-mil sòlda a pye ✡ki te rale nepe. 3 (Alò, fis a Benjamin yo te tande ke fis Israël yo te monte Mitspa.) Epi fis Israël yo te di: “Pale nou kijan mechanste sa a te vin rive?”

4 Epi Levit la, mari a fanm nan ki te asasine a, te reponn e te di: “Mwen te vini avèk mennaj mwen pou pase nwit lan Guibea ki pou Benjamin. 5 Men mesye Guibea yo te leve kont mwen, yo te antoure kay la pandan nwit lan akoz mwen menm. Yo te gen entansyon touye mwen; men olye de✡ sa, yo te vyole mennaj mwen jiskaske li te vin mouri. 6 Epi mwen te pran mennaj mwen an, mwen te koupe li an mòso e mwen te voye li nan tout peyi eritaj Israël la, paske ✡yo te komèt yon zak ki lèd e malonèt an Israël. 7 Gade byen, tout fis Israël yo, ✡bay lide avèk konsèy nou isit la.”

8 Alò, tout pèp la te leve kòm yon sèl moun, e yo te di: “Pa gen menm youn nan nou k ap tounen nan tant li, ni nou p ap retounen lakay nou. 9 Men kisa n ap fè Guibea; nou va monte kont li pa tiraj osò. 10 Epi nou va pran dizòm sou san nan tout tribi Israël yo, san sou mil e mil sou dis-mil pou founi manje pou pèp la jiskaske yo vini Guibea nan Benjamin, pou yo kapab pini yo pou tout zak malonèt yo te fè an Israël yo.” 11 Konsa, tout fis Israël yo te rasanble kont vil la, tèt yo ansanm kòm yon sèl moun.

12 Alò, tribi Israël yo te voye mesye yo pami tout tribi Benjamin an, e yo te di: “Ki kalite mechanste sa ki te fèt pami nou an? 13 Pou sa, livre bannou mesye sa yo, ✡sanzave Guibea yo, pou nou kab mete yo a lanmò e ✡retire mechanste sa an Israël.”

Men fis Benjamin yo te refize koute vwa a frè yo, fis an Israël yo. 14 Fis a Benjamin yo te rasanble soti nan vil Guibea yo, pou sòti nan batay kont fis Israël yo. 15 Soti nan vil yo, nan jou sa a, fis Benjamin yo te monte ak venn-si-mil mesye ki te rale nepe, anplis moun Guibea ki te konte a sèt-san òm ekstrawòdinè. 16 Pami tout moun sa yo, sèt-san ✡òm ekstrawòdinè yo se te moun goche. Yo chak ta kapab tire yon wòch avèk fistibal sou yon grenn cheve e yo pa janm pa pran l. 17 Alò, lòt mesye Israël yo anplis Benjamin te konte nan kat-san-mil òm ki rale nepe. Tout sila yo se te moun lagè.

18 Alò, fis Israël yo te leve monte Béthel. Yo te mande Bondye, e te di: ✡“Se kilès ki va monte avan pou fè batay kont fis Benjamin yo?”

Alò, SENYÈ a te di: “Juda va monte avan.”

19 Alò, fis Israël yo te leve nan maten, e yo te fè kan kont Guibea. 20 Mesye Israël yo te sòti pou batay kont Benjamin e mesye Israël yo te pran pozisyon batay kont yo nan Guibea. 21 Alò, fis Benjamin yo te parèt deyò nan Guibea, e yo te ✡fè tonbe atè nan jou sa a, venn-de-mil òm nan Izrayelit yo. 22 Men pèp la, mesye Israël yo, te ankouraje youn lòt e te vin pran plas batay la menm kote ke yo te vin parèt nan premye jou a. 23 ✡Fis Israël yo te monte e kriye devan SENYÈ a jis rive nan aswè. Yo te ✡fè mande SENYÈ a e te di: “Èske nou dwe pwoche ankò pou fè batay kont fis a frè m yo, Benjamin?”

Epi SENYÈ a te reponn: “Monte kont li.”

24 Alò, fis Israël yo te vini kont fis a Benjamin yo nan dezyèm jou a. 25 Benjamin te sòti kont yo soti Guibea nan dezyèm jou a e yo te fè tonbe atè, ankò 18,000 òm pami fis Israël yo; tout moun ki te rale nepe yo.

26 Alò, ✡tout fis Israël yo ak tout pèp la te monte rive Béthel e te kriye. Konsa, yo te rete la devan SENYÈ a, yo te fè jèn tout jounen an jis rive nan aswè. Epi yo te ofri ofrann brile ak ofrann lapè devan SENYÈ a. 27 Fis Israël yo te ✡mande devan SENYÈ a (paske lach temwayaj la te la nan jou sa yo, 28 epi Phinées, fis a Éléazar a, fis Aaron an, te kanpe devan li pou fè sèvis nan jou sila yo, epi yo te di: “Èske mwen dwe sòti menm yon lòt fwa nan batay kont fis a frè m yo, Benjamin, oswa èske m dwe sispann?”

Epi SENYÈ a te di: “Monte, ✡paske demen Mwen va livre yo nan men nou.”

29 ✡Konsa, Israël te pozisyone mesye yo antoure Guibea pou fè anbiskad. 30 Fis Israël yo te monte kont fis Benjamin yo nan twazyèm jou a e yo te pozisyone yo menm jan ke yo te fè nan lòt fwa yo. 31 ✡Fis Benjamin yo te sòti kont yo e te rale soti kite vil la. Konsa, yo te kòmanse frape e touye kèk moun nan pèp la, menm jan ak lòt fwa yo, sou gran chemen yo, youn ki te monte a Béthel e lòt la Guibea, anviwon trant mesye Izrayelit.

32 Fis a Benjamin yo te di: “Yo vin frape tonbe devan nou, menm jan ak lòt fwa a.” Men fis Israël yo te di: “Annou sove ale pou nou kapab atire yo kite vil la rive nan gran chemen yo.”

33 Epi tout fis Israël yo te leve sou plas yo pou te vin parèt nan Baal-Thamar. ✡Konsa mesye Israël nan anbiskad yo te sòti nan plas pa yo, kote Maaré-Guibea menm. 34 Lè di-mil òm ekstrawòdinè nan tout Israël yo te parèt kont Guibea, batay la te vin fewòs; ✡men mesye Benjamin yo pa t konnen ke yon gwo dega t ap pwoche yo. 35 Epi SENYÈ a te frape Benjamin devan Israël jiskaske fis Israël yo te detwi venn-senk-mil-san moun nan Benjamin nan jou sa a, tout moun ki te rale nepe yo 36 Konsa, fis Benjamin yo te wè ke yo te fin bat yo. Paske ✡lè mesye Israël yo te bay teren an a fis Benjamin yo, se te akoz yo te depann de mesye ki t ap fè anbiskad yo, pou yo te voye kont Guibea. 37 ✡Mesye anbiskad yo te kouri kont Guibea; epi yo te ouvri pou voye frape tout vil la avèk lam nepe. 38 Alò, siyal ki te prevwa antre mesye Israël yo ak mesye anbiskad yo se te ✡ke yo ta fè yon gran nwaj lafimen leve sòti nan vil la. 39 Alò, mesye Israël yo te vire nan batay la e Benjamin te kòmanse frape e touye anviwon trant mesye Izrayelit, ✡paske yo te di: “Vrèman, yo detwi devan nou, tankou nan premye batay la.” 40 Men lè nwaj la te kòmanse leve sòti lavil la tankou yon pilye gwo lafimen, Benjamit yo te gade ✡dèyè yo; epi gade byen, nan tout vil la, lafimen t ap monte vè syèl la. 41 Alò, moun Israël yo te vire e mesye Benjamin yo te vin sezi avèk laperèz; paske yo te wè ke yon ✡gwo dega te sou yo. 42 Pou sa, yo te vire do devan Israël ✡vè dezè a, men batay la te vin jwenn yo pandan sila ki te sòti nan vil yo te detwi yo nan mitan li. 43 ✡Yo te vin antoure mesye Benjamin yo; yo te pouswiv yo san repo e yo te foule yo anba pye anfas Guibea vè lès la. 44 Konsa, diz-uit-mil òm a Benjamin te tonbe; tout sila yo se te vanyan gèrye. 45 Rès yo te sove ale vè dezè a nan wòch Rimmon. ✡Men yo te kenbe senk-mil nan yo sou chemen e te vin rive sou yo nan Guideom. Yo te touye de-mil nan yo. 46 Konsa, tout Benjamit ki te tonbe nan jou sa yo se te venn-senk-mil òm ki te rale nepe; tout sila yo se te vanyan gèrye. 47 Men sis-san òm te vire kouri vè dezè a nan wòch Rimmon e yo te rete nan wòch Rimmon pandan kat mwa. 48 Mesye Israël yo, alò, te vire retounen kont fis a Benjamin yo pou te frape yo avèk lam nepe, tout vil la avèk bèt yo ak tout sa ke yo te twouve. Anplis, yo te mete dife nan tout vil ke yo te twouve yo.