136
Pathen kah Kumhal Lungnah
1 A sitlohnah tah kumhal due ham a then dongah
BOEIPA te uem uh.
2 A sitlohnah kumhal duela a om dongah
pathen rhoek kah Pathen te uem uh.
3 A sitlohnah kumhal duela a om dongah
boei rhoek kah Boeipa te uem uh.
4 A sitlohnah kumhal duela a cak dongah
anih bueng loh khobaerhambae tanglue khaw a saii.
5 A sitlohnah kumhal duela a cak dongah
a lungcuei neh vaan khaw a saii.
6 A sitlohnah kumhal duela a cak dongah
tui soah diklai khaw a nulh.
7 A sitlohnah kumhal duela a cak dongah
khosae tanglue khaw a saii.
8 A sitlohnah kumhal duela a cak dongah
khothaih kah khohung la khomik a khueh.
9 A sitlohnah kumhal duela a cak dongah
khoyin kah khohung la hla neh aisi a khueh.
10 A sitlohnah kumhal duela a cak dongah
Egypt khuikah a caming rhoek te a ngawn.
11 A sitlohnah kumhal duela a cak dongah
Israel khaw amih lakli lamloh a doek.
12 A sitlohnah kumhal duela a cak dongah
tlungluen kut neh a bantha te a thueng.
13 A sitlohnah kumhal duela a cak dongah
Carhaek Tuili te maehpoel la a tuiphih.
14 A sitlohnah kumhal duela a cak dongah
Israel khaw a laklung ah a kat puei.
15 A sitlohnah kumhal duela a cak dongah
Pharaoh neh a thadueng tah Carhaek tuili la a khoek.
16 A sitlohnah kumhal duela a cak dongah
a pilnam te khosoek longah a caeh puei.
17 A sitlohnah kumhal duela a cak dongah
manghai tanglue rhoek khaw a ngawn.
18 A sitlohnah kumhal duela a cak dongah
manghai aka khuet rhoek pataeng a ngawn.
19 A sitlohnah kumhal duela a cak dongah
Amori manghai Sihon khaw a ngawn.
20 A sitlohnah kumhal duela a cak dongah
Bashan manghai Oga khaw a ngawn.
21 A sitlohnah kumhal duela a cak dongah
amih khohmuen pataeng rho la a phaeng.
22 A sitlohnah kumhal duela a cak dongah
a sal Israel te rho a phaeng.
23 A sitlohnah kumhal duela a cak dongah
mamih mathoe vaengah khaw mamih ham a poek.
24 A sitlohnah kumhal duela a cak dongah
mamih kah rhal kut lamloh mamih m'bawt.
25 A sitlohnah kumhal duela a cak dongah
pumsa boeih te buh a paek.
26 A sitlohnah kumhal duela a cak dongah
vaan kah Pathen te uem uh.