63
Bìac Tabroq Hlài Da Boc Plình Ca 'Bài Diac
1 Cô cabô trùh enh phôq Bôt-ra da Êđôm,
caxùnh eo gòh ngùi,
anì caq ranhòm, cadiang lam rahù,
padren dêh càn caiq, Haq cabô?
“Aih Au, Au ma capoch bàu ta-atoq,
Au i cwìang itai dèch claih!”
2 Hagleq eo Ìh gòh,
eo yôh da Ìh tìah troi eo da mangai len plì nho?
3 “Mòiq Ngai Au raq len plì nho,
ta 'bài jàn ùh i ca mangai leq ŏi ti Au.
Jò nòih, Au khoi jôiq len wì haq,
'nang jò nòih Au jôiq pahech wì haq;
mahem wì haq haprah top ta eo Au,
eo yôh Au dìq top mahem.
4 Taiq manoh Au khoi pajaq hì tabroq hlài,
wa hanam dèch claih da Au khoi trùh.
5 Au ngan mahaq ùh i ca cabô trùh jùp đò;
Au hamàih mahaq ùh i ca cabô trùh wiang ti Au!
Tì Au dèch cla Au,
can nòih Au payòng Au.
6 Ta jò nòih Au khoi jôiq padit đac 'bài jàn;
broq ca wì bù ta can nòih Au,
broq ca mahem wì ta-ùc ta taneh.”
Hmàng Hlài Manoh Loq Xa-ŏch Da Boc Plình Jò Calah Nèh
7 Au jah anoi hlài xam can xa-ŏch wa manoh loq waq da Chuaq,
ma jah 'màng aih dìq dŏng
rìm bìac Chuaq khoi broq am ca bèn,
wa anoi hlài xôq ramŏt càn
Haq khoi broq am ca hnem Is-ra-ên,
tiaq manoh loq xa-ŏch wa can xa-ŏch xam manoh loq waq càn caiq da Haq.
8 Haq khoi doi: “Joq 'nàng wì haq jàn Au,
aih con caiq ùh hìaq 'nùt”;
'màng aih, Au Chuaq Dèch Claih wì.
9 Jò jàn Haq glàm bìac nan xa,
cla Haq hadai 'bìq nan xa,
'Bình plình ŏi jang ngìa Haq dèch wì.
Can loq waq wa manoh loq xa-ŏch Haq khoi dèch rŏt hlài wì.
Haq khoi ca'mình wa wê wì ta 'bài hì calah nèh.
10 Mahaq wì khoi blàq blènh
wa broq ca Yiang Hadròih Haq mango,
taiq 'màng aih, Haq wìa mangai tajraq hlài ca wì,
Haq tajêh ca wì.
11 Jò aih jàn Haq hmàng hlài
ca Môise calah nèh wa bòch:
Ta leq Haq ma 'nong mangai ban
wa calùh trìu tŏc khoi enh diac raxìq?
Ta leq Haq ma am Yiang Hadròih
Haq ŏi ta'ne jàn Haq?
12 Haq ma am dèh tì 'ngah 'ngai
Haq lam pah 'ma Môise;
Haq ma khoi pah diac ŏi jang ngìa wì haq,
đòiq broq 'ngah hiniq Haq hloi;
13 Haq ma 'nong dèh jàn Haq lam cwa diac raxìq jrùq dêh,
'màng ca axêh cadàu ta đùng braih càn, ùh catŏih tacro.
14 'Màng ca calùh ngè aban loh nòi thòng chaq nòi padài,
Yiang da Chuaq khoi broq ca con jàn padài.
Ìh 'nong dèh jàn 'màng aih
đòiq hiniq Ìh jah 'ngah 'ngai.
Ìh Baq Nhèn
15 Xìn Chuaq ngan loh enh plình,
enh nòi hadròih wa 'ngah 'ngai da Ìh, xìn Chuaq blèch ngan.
Manoh dêh nhang wa bìac itai da Ìh ta leq?
Bìac tamèt wa manoh xa-ŏch da Ìh khoi 'bìq tàt đac 'mòh!
16 Joq 'nàng Ìh Baq nhèn,
yŏc ca Ap-ra-ham ùh loq ca nhèn,
Is-ra-ên ùh nhàn nhèn;
Ôi Chuaq, Ìh xôq Baq nhèn,
Hiniq Ìh Chuaq Rŏt Dèch Hlài nhèn adroi enh 'nhòng calah nèh.
17 Ôi Chuaq, gleq ma đòiq nhèn lac hangai ca trong Ìh?
Gleq ma đòiq manoh nhèn cadoq cadang loh ca pi crè ca Ìh?
Taiq nen 'bài hapŏng Ìh wa taiq nen 'bài hadròng hadrech da xôxech Ìh,
xìn Ìh wìh hlài!
18 Jàn hadròih da Ìh jah gùng cô 'nhòq dùnh toq leq;
èh mangai ma tajraq hlài ca nhèn khoi jôiq nunit đac hnem hadròih da Ìh.
19 Khoi dùnh nhèn tìah ca mòiq jàn
ùh i ca Ìh wèq cwìang,
ùh jah creo ca hiniq Ìh.