8
Đamat wa Sa-ma-ri Tacro
1 Chuaq doi ca au: “Yŏc mòiq capiac long ban càn, achìh 'mùt xam long achìh ma loq achìh bàu 'màng cô: Caxìa tiaq trùh cùng hang atùng beq, caxìa tiaq trùh ngè caq beq.”
2 Au 'nong tiaq 'bài mangai ma wiang ngan đang ca lùi lam trùh đòiq wiang ngan, aih Uria, pajàu Boc Plình, Xa-cha-ri, con calô da Jê-bê-rê-kia.
3 Au caq ŏi ti mai au, haq mangai capoch thai Boc Plình; haq ŏi jiang wa xa-ông mòiq toq con calô. Chuaq doi ca au: “Hiniq am ca con nga aih: Ma-he-sa-la-hat-bat.
4 Ma jah 'màng aih, adroi ca jò con nga loq creo: ‘Baq ôi!’ ‘Miq ôi!’ Èh bùa A-si-ri trùh yŏc dìq bìac can padrŏng da Đamat wa cùng hang jah jò tajêh poh da Sa-ma-ri.”
5 Chuaq doi hòm ca au:
6 “Taiq jàn cô khoi khìn đac 'bài diac cròng Silôa hìu èm ai,
mahaq lem bùi ca Rêxin wa con calô da Rê-ma-lia.
7 Taiq nen aih, cô, Chuaq broq ca diac dêh wa bàc trùh ca wì haq,
aih bùa A-si-ri wa dìq ca cwìang rahù da haq;
Diac bình halùih ti 'bài diac cròng,
halùih ca 'bùc diac;
8 Èh mùt ta Juđa jàp jìa chroh dêh,
bình trùh ti ranŏng;
Ôi Em-ma-nu-ên,
haq hlìa panan bàng jàp ca gùng ìh.”
Jàn Xrong Hlài I Manoh Lùi
9 Ôi 'bài jàn, pajùm ti dabau wa hadròt ta manoh beq!
Ôi dìq dŏng 'bài diac haten hangai, halang don tamàng beq!
Padon tabroq tajêh beq, mahaq èh 'bìq haprah hapriang,
padon tabroq tajêh beq, mahaq èh 'bìq haprah hapriang!
10 Adràc dabau hatình trong beq, mahaq ùh jah gêh;
capoch 'noh trong beq, mahaq bàu aih ùh jah cajap,
ma jah 'màng aih Boc Plình ŏi ti nhèn.
11 Ma jah 'màng aih Chuaq doi ca au jò tì I Cwìang Itai Haq bèq ti chac au, hnài au paq lam tiaq trong jàn aih, doi:
12 “Apaq doi, aih bàu pađim.
Pì paq doi tiaq wì haq.
Èh paq crè ca bìac wì haq crè,
wa paq yùq.
13 Padèch Chuaq I Cwìang Itai hadròih beq;
pì toq khòh crè ca Haq
wa yùq ca Haq hêq.
14 Ma jah 'màng aih Haq wìa hnem cùh waiq hadròih,
mahaq ca hnem Is-ra-ên wa hnem Juđa Haq
wìa hmu broq ca mangai catŏih tacro,
aih hlàp wa hlàm bet ca mangai jàn phôq Jê-ru-sa-lem.
15 Bàc ngai ta wì haq jah catŏih jènh;
jah tacro wa hech hoch;
jah hlech hlàm wa 'bìq rùp.”
16 Ìh caxop bàu anoi hlài cô,
wa baxìa ranenh cô ta'ne mangai hŏc tiaq Au beq!
17 Au ngèh gòm Chuaq,
Haq cadoc dèh hadrò ca hnem Jacôp;
au xôq ngèh gòm Haq.
18 Cô, au cô, wa xam 'bài con caiq ma Chuaq khoi am ca au, aih ta Is-ra-ên, enh Chuaq ma wèq dìq ca 'bình plình 'nang ŏi ta wang Siôn.
19 Jò i cabô doi ca pì: “Phai bòch pajàu creo ca mahua mangai cachìt, wa pajàu ngan tì beq!” Aih wì ma bahech wa mamùc mamac. Mahaq au doi ca pì khòh bòch dèh Boc Plình pì 'mòh? Gleq ma bòch mangai cachìt am ca mangai rìh?
20 Phai tiaq Ranenh wa bàu anoi hlài! Tàng jàn ùh capoch tiaq bàu aih, wì haq joq 'nàng ŏi hloi ta clam cluiq.
21 Wì haq jah lam lac ta crŏng taneh, xalep pangot hrah croh ranŏng; jò pangot, wì haq nòih, 'ngoc ngan ha'nhèq hanip dèh bùa wa Boc Plình.
22 Hi khoi cùp ngan ti 'neq, hnoq toq bìac ranàc wa clam clôiq; chìuq jìq xa wa 'bìq hnan đac mùt clam cluiq.