5
Da Paper An Godʼs Baby Sheep Guy
(Da Start 49:9; Isaiah 11:1,10)
1 Den, jalike one dream, I wen see da One dat stay sitting on top da throne, dass God. He get jalike one roll up paper in his right hand dat had writing on top two side, front side an back side. Befo time dey roll um up an close um wit seven wax kine seal on top.
2 Den I see one angel messenja guy dat get plenny power. He tell wit one loud voice, “Eh! Who get da right fo broke da wax kine seal an open da paper?”
3 But no mo nobody inside da sky, on top da earth, o unda da earth get da right fo open da paper an look inside um.
4 So den, I stay cry real hard cuz dey neva find nobody dat get da right fo open da paper an look inside.
5 But one older leada guy wen tell me, “Eh, brah! No need cry! Look! Christ, Godʼs Spesho Guy! Jalike da Bible wen say, he jalike one Lion! He da King dat come from Judah ohana! He da Main One dat come from King David. He wen win ova da bad kine stuff, so he get da right fo broke da seven wax kine seal, an open da paper!
6 Den, jalike one dream, I wen look, an had da Baby Sheep Guy. Look like dey wen kill him awready. He standing on top da throne, in da middle. All aroun him had da four tings dat stay alive, an da older leada guys. He get seven horn an seven eye. Da horns an da eyes, dass da seven spirits from God dat he send all ova da world.
7 Da Baby Sheep Guy wen come an take da paper from da right hand a da One dat stay sitting on top da throne.
8 Afta he take um, da four tings dat stay alive, an da twenty-four older leadas, dey wen go down in front da Baby Sheep Guy. Dey all get someting jalike guitar an gold kine bowl wit incense inside. Da incense, dass jalike all da tings da peopo dat stay spesho fo God wen aks him fo do.
9 Den dey sing one new song, dat say:
“You da One dat get da right
Fo take da paper, broke da wax kine seal, an open um.
Cuz dey wen kill you jalike one sacrifice,
An you wen bleed an mahke,
Fo pay da price fo bring peopo back to God,
From every ohana, an language, an peopo, an country.
10 You wen make um come Godʼs own peopo,
Fo come prieses an work fo our God, cuz he dea King,
An fo come king an queen guys wit God,
An dey goin lead all da peopo inside da world.
11 Den jalike one dream, I wen look an I hear uku million angel guys singing. Dey wen come togedda in one circle aroun da throne, an aroun da tings dat stay alive, an da older leada guys.
12 Dey sing wit one loud voice:
“Dey wen kill Godʼs Baby Sheep Guy
Jalike one sacrifice.
So he get da right fo get all kine power,
An rich kine stuffs,
An get plenny smarts,
An fo be real strong!
He get da right fo everybody give respeck to him,
An tell how awesome he stay,
An tell him he good heart cuz he give us everyting!”
13 Den I wen hear everyting dat stay alive inside da sky, an on top da earth, an unda da earth, an inside da sea -- everyting inside da whole world, an dey was singing lidis:
“God, da One dat stay sitting on top da throne,
An Godʼs Baby Sheep Guy,
We tell um dey good heart cuz dey do plenny good tings,
An give um plenny respeck,
An tell how awesome dey stay,
An dat dey get all da power,
Foeva an eva!”
14 Den da four tings dat stay alive wen say, “Dass right!” An da older leada guys wen go down an give God an da Baby Sheep Guy love an respeck.