7
Godʼs Peopo Get Mark Fo Show God Know Dem
1 Afta dat, jalike one dream, I wen see four angel guys standing by da four corners a da earth. Dey was holding back da four winds so dey no can blow on top da land o da sea o on any tree.
2 Den I wen see one nodda angel guy coming up from da east. He get one ting fo make one mark on top peopo, from da God dat stay alive. Wit one loud voice he call to da four angel guys dat get da power fo mess up da land an da sea.
3 He tell dem, “Eh! No mess up da land o da sea o da trees! Wait till afta we put da mark from our God on top da forehead a da peopo dat work fo him dat stay alive!”
4 Den I wen hear how plenny peopo get Godʼs mark on top dea forehead. Was 144,000 peopo from inside all da Israel ohana:
5 From da Judah ohana, 12,000 get Godʼs mark.
From da Reuben ohana, 12,000 get Godʼs mark.
From da Gad ohana, 12,000 get Godʼs mark.
6 From da Asher ohana, 12,000 get Godʼs mark.
From da Naftali ohana, 12,000 get Godʼs mark.
From da Manassah ohana, 12,000 get Godʼs mark.
7 From da Simeon ohana, 12,000 get Godʼs mark.
From da Levi ohana, 12,000 get Godʼs mark.
From da Issachar ohana, 12,000 get Godʼs mark.
8 From da Zebulun ohana, 12,000 get Godʼs mark.
From da Joseph ohana, 12,000 get Godʼs mark.
From da Benjamin ohana, 12,000 get Godʼs mark.
Choke Peopo From All Diffren Place
9 Afta dat, jalike one dream, I wen look, an dea in front me had uku plenny peopo! Dey so plenny dat no can count um. Dey come from all da countries, all da ohanas, all da diffren peopos, an all da language all ova da world. Dey stay standing in front Godʼs throne, an in front da Baby Sheep Guy. Dey was wearing white kine clotheses, an dey stay holding branches from da palm tree inside dea hand.
10 Wit one loud voice dey wen tell,
“Our God an da Baby Sheep Guy,
Dey sit on top da throne.
An dey da One dat take us outa da bad kine stuff we stay in.”
11 All da angel guys stay standing aroun Godʼs throne, an aroun da older leada guys, an aroun da four tings dat stay alive. Dey all go down wit dea face on top da groun in front Godʼs throne, an dey give God love an respeck.
12 Dey tell,
“Dis fo shua!
God, we talk good bout you,
You awesome!
You real smart!
Mahalo plenny!
We get plenny respeck fo you!
You get all da power!
You mo strong den anybody!
You stay lidat foeva an eva!
Dass fo shua!”
13 Den one a da older leadas wen aks me, “Eh! Who da guys wit da white clotheses? An wea dey wen come from?”
14 I tell him, “Mista, I donno. But you know!”
He say, “Dis all da peopo dat wen come out from da big trouble. Da Baby Sheep Guy, he wen make um clean inside, cuz he wen bleed an mahke fo dem. Dass jalike peopo wash dea clotheses clean, an make um come white.
15 Dass why dey stay in front Godʼs throne,
An work fo him all day an all nite inside his temple.
God da One dat stay sit on top his throne,
An he goin take care dem,
Cuz he stay dea wit dem.
16 Dey no goin eva come hungry o thirsty again!
Dey no goin eva get burn from da real hot sun no moa!
17 Cuz da Baby Sheep Guy
Dat sit in da middle a da throne,
He goin take care dem
Jalike one sheep farma dat take care his sheeps.
He goin take dem by da puka
Fo da water dat make peopo get life fo real kine.
An God goin wipe away all dea tears from dea eyes.”