2
Hay Pummoltaan Apo Dios hinan Holag Moab
(Isa. 15:1—16:14; 25:10-12; Jer. 48:1-47; Ezek. 25:8-11; Zeph. 2:8-11)
1 Umat hituy hinapit Apo Dios ay ha"in hi aat nan holag Moab an inalinay,
“Gun numbahol goh nan holag Moab
an umat hinan nangngalandah nan tungal din alin nan holag Edom
an do'ol di tawon hi naluh hi natayana ya genhobda ta numbalin hi dapul.
2 At hiyanan ipa'ali' nan mi'gubat an ahitutu'u' ya nan muntalampet
an manghob hinan nun'ihamad di allupna an ad Kerioth
ya an amin hinan holag Moab.
3 Ya ta"on un nan a'ap'apuh di ya nan u'upihyal ya mun'a'atoyda.
Hiyah ne hinapit Apo Dios.”
Hay Inalin Apo Dios hinan Holag Judah
4 Umat goh hituy hinapit Apo Dios ay ha"in hi aat tu'un holag Judah:
“Ta"on un da'yun holag Judah ya gun ayu goh numbahol,
at hiyanan nunheglan moltao' da'yu an dumalat nan nidugah an bungot'u.
Ti nabaliyan ayuh nan mundayaw hi bulul an umat hinan dinayaw din o'ommodyu
ti unyuat goh din'ug nan tudtudu'.
5 At hiyah ne dumalat ya ipa'ali' di apuy ad Jerusalem
ya an amin hinan holag Judah ta moghob.”
Hay Inalin Apo Dios hinan i'Israel
6 Umat goh hituy hinapit Apo Dios ay ha"in hi aat nan i'Israel an inalinay,
“Gun ayu goh numbahol an i'Israel,
at hiyanan nunheglan moltao' da'yu an dumalat nan nidugah an bungot'u.
Ti inihbutyu nan mid baholnan tatagun dumalat nan pamhodyuh pihhu,
ya inihbutyu goh nan nun'awotwot an dumalat di inutangdah hapatus ay da'yu an adida pa'abbayad.
7 At paddungnay pun'igatinyu nan nun'awotwot ti ibahhawyuy nahamad an pamanuhyun dida,
ya bainonyu goh nan ngadan'u ti nan nunhin'aman da'yu
ya munhinukkatdan mangeyelo' hinan himbutyun babai.
8 Ya an amin nan awadan di pun'onnganyun Ha"in ya hidiy olo'anyu
an ilulubungyu nan lubung nan nun'awotwot an namatangdah utangdan da'yu.
Ya hidi goh di umin'inumanyuh nan ma'inum an innalyuh nan immutang ay da'yuh pihhu.
9 Undan adiyu manomnom an tatagud Israel an hidin immayan nan o'ommodyud Canaan
ya inubah'u nan holag Amor an atata'nang ya mun'abi'ah an nipaddungdah nan ayiw an cedar ya oak?
At paddungnay inubah'u nan bungada ya lamutda.
10 Ya ta"on un hidin nanaynan nan o'ommodyud Egypt
ya Ha"in di nangekak ay dida ta impapto"u didah nan mapulun hi napat di tawon
ya un'u mahkay ipaboltan din babluy nan holag Amor ay dida.
11 Ya pento"uy udumnah nan linala'in imbabaluyyu ta diday propeta,
ya nan udumnah nan ungunga ta diday ma'alih Nazirite
Da'yun i'Israel ya inilayun immannung hatu.
12 Mu hay inatyu ya impa'inumanyuh bayah nan Nazirite,
ya pinadananyu nan propeta ta adida ibabbaag di impa'innila' ay dida.
13 At hiyah ne dumalat ya ubaho' da'yu
an umat hi kalesa an napnuh paguy an mama"ih nan dalanda.
14 At ta"on un hanan mabi'ah an lumayaw ya mid ologdan lumayaw,
ya ta"on unda mun'abi'ah mu mami'id di bi'ahda,
ya ta"on un nan tindalu ya mid ologdan mamaliw hi odolda.
15 Ya ta"on goh nan nun'ala'eng an pumana ya humunodda,
ya nan mun'abi'ah nongkay an tumagtag ya mid ologda,
ya ta"on un nan nun'ala'eng an muntakay hinan kabayu ya mi'id goh di ologdan mamaliw hi odolda.
16 At eden a'atana ya ta"on un nan nun'atulid an tindalun mi'gubat
ya pun'iwallangday almasda ta lumayawda.
Hiyah ne hinapit Apo Dios.”