49
Nan Paddungnay Hilaw di Tatagu
1 Da'yun tatagun wah nan adadagwin babluy hinan gagwan di baybay
ya donglonyu tun hapito' an hi Isaiah.
Ti hidin agguy'u ni' nitungawan ya pinilia' ay Apo Dios hi baalna,
ya nginadnana' ay Hiyah din nitungawa'.
2 Ya numbalinona nan hapito' an malpun Hiyah umat hinan matadom an hinalung,
ya binaliwana' an dumalat di abalinana.
Ya numbalinona' hi umat hinan matadom an himan di pana.
3 Ya inalinan ha"in di,
“He"a, Israel, di baal'u
ta he"ay mangipattig hinan anabagbagtu' hinan tatagu.”
4 Ya tembal'un inali' di,
“Mu timmamutamua',
ya mid di nunhulbiana,
at mid hulbin an amin di nanablaya'.
Mu iyokod'u kaymu ay He"a ta He"ay okod an mangidat hi lagbu'.”
5 Ti hidin agguy'u ni' nalmuwan ya pento'a' ay Apo Dios hi baalna
ta ha"in mangipangpanguluh nan i'ibban holag Jacob an mungngadan goh hi Israel
ta way atondan mumbangngad an mangun'unud ay Hiya.
Ti Hiyay nalpuwan di a'e'gona' ya bi'ah'u.
6 Ya inalina goh di,
“He"a ya awniat ibangngadmu nan i'ibbam an holag Jacob
an mungngadan goh hi Israel ya nan ma'angang ay da'yu.
Mu bo'on hene ya anggay di atom ti hay aptan ahan hi ipa'at'un he"a,
ya pumbalino' he"ah paddungnay hilaw di Hentil ta ipa'innilam ay dida
an amin hitun luta an abalina' an mangibaliw ay dida.”
7 Inalin goh Apo Dios an nan Baliw ya me'gonan an dayawon tu'un holag Israel
an nan pihupihulon ya abohlan di tataguh abablubabluy ya tagalan nan mumpumpapto' di,
“Hi awniat tigon nan a'ali ya nan a'ap'apuy pungwagah'un he"a,
ya munhippidah pange'gondan he"a
ti Ha"in an me'gonan an Dios an dayawonyun holag Israel di namto' ay he"a,
ya ipa'annung'u nan inali'.”
Hay Nipaphodan ad Israel
8 Inalin goh Apo Dios hinan tatagunay,
“Hitun adatngan di gutud hi pamadanga' ay da'yu
ya abuluto' di luwaluyu ta baliwa' da'yu,
ya ipapto"u da'yu.
Ya dumalat ayu ya mipa'annung din inali'
an ipaphodan an amin di tatagu an nan pamaliwa' ay dida.
At hiyanan mahapul an mibangngad an mipaphod din nun'apa"in babluy ad Israel,
at mabalin mahkay an mumbangngad ayuh di.
9 At alyonyuh nan paddungnay nibalud hinan munhehellong di,
Mumpangabuhu' ayu mahkay an paddungnay nibalud
hinan way munhehellong ta way atonyun malibli.”
Ya inalin goh Apo Dios di,
“At mipaddung ayuh nan kalnilun do'ol di ah'upanah ononah nan dalanona
ya hinan dudunduntug ti mumbalindah pahtu.
10 At adida mahkay mahinhinaangan unu ma'uwaw,
ya adida goh elan di nidugah an potang ya mun'ohab hinan mapulun.
Ti dumalat hinan ongol an homo"u ya iyuy'u didah awadan di danum.
11 Ya mangammaa' hi kalatah nan aduntuduntug
ta way dalanon nan tatagu'.
12 Ti mun'alpudah nan adadagwin babluy
ti hay udum ya malpudah appit hi iggid hi un hagangon di buhu'an di algaw,
ya hay udum ya malpudah appit hi a'unugan di algaw,
ya nan udum ya malpudad Aswan hi appit hi agwan hi un hagangon di buhu'an di algaw.”
13 At ha"in an hi Isaiah ya alyo' ay da'yun wad abuniyan ya da'yun wah tun luta ta it'u'yuy amlongyu,
ya ta"on un da'yun wah nan aduntuduntug ya mungkanta ayu goh!
Ti hi Apo Dios ya ipa'amlongna nan tataguna,
ya hom'ona nan munlungdaya!
14 Mu inalin nan tatagud Jerusalem di,
“Ingnganuy ditu'un Apo Dios ti inaliwan ditu'u!”
15 Ya inalin Apo Dios di,
“Undan mabalin an aliwan di inay ung'ungnga an intungawna ta adina igohgohan?
Mu ta"on hi un waday inah mangat hi umat hina
mu Ha"in ya adi ahan mabalin hi un'u aliwan da'yu!
16 Ti tigonyu adya an intudo"uy ngadanyuh tun palad'u,
ya ta"on un din napa"in allup di babluyyu ya adi ma'aliwan.
17 At ten magadyuh di pumbangngadan nan imbabaluyyu,
ya nan namaligat ay da'yu ya mun'akakdah tu.
18 At muntiggatiggaw ayu adyah nan nunlene'woh
ta amangonyun na'uydan amin nan imbabaluyyu!
Ti Ha"in an matattagun Dios ya ten alyo' di,
Danen imbabaluyyu ya nabalulda ahan ay da'yun
umatdah nan balitu' an igina'un di babain mungkasal ta maphod di tigawna!
19 Manu ti nun'apa"i ya nun'atawan nan babluyyu,
mu udum hi algaw ya adi umanay hi ihinan nan i'ibbayun mumpanga'anamut.
Ya nan buhulyun namaligat ay da'yu ya mun'akakda.
20 Ya nan numpanga'anamut an nitungaw hinan babluy an niyayanda
ya alyondah udum di algaw di,
It'ittang tun babluy tu'u,
at mahapul tu'uy ong'ongngol an pumbabluyan tu'u!
21 Ya unyu mahkay alyon hi nomnomyuy,
Hay numpangimbaluy ay daten tatagun inyalidah tu?
Ti na'amindan nun'atoy din imbabaluymi,
ya nan udum ya nun'iyuydah udum an babluy,
at un ami tuttulun na'angang!
Ya anaad ta wah tuday ung'ungungnga,
ya hay nangipapto' ay dida,
ya hay nun'alpuwanda?
22 Mu Ha"in an na'abbagbagtun Dios ya alyo' goh di,
Undan adiyu tigon an alyo' hinan Hentil hi udum an babluy an adi mangunud ay Ha"in
ta pun'iyalida nan imbabaluyyuh tun babluyyu?
23 Ya nan a'ali ya nan a'ahawaday mumpangipato' ay da'yu ta munhulbidan da'yu,
at okoddan amin hi mahapulyu.
Ya munhippidah hinagangyu ta mumpa'ampadan da'yu,
at hiyah ne panginnilaanyun Ha"in hi Apo Dios.
At nan mumpabadang ay Ha"in ya mabadangan.”
24 Mu inalin nan tataguy,
“Ya nan gina'un hinamham nan titindaluh nangabakandah gubat
ya adi mabalin an maploh!
Ya umat goh hinan impibalud di mata'tan ahan an ap'apu
an mi'id di mabalin hi mamaliw ay hiya!”
25 Mu umat hituy alyo' an Dios:
“Ta"on hi un nan imbalud di mabungot ahan an tindalu ya abalina' an ipa'anamut,
ya ta"on hi un nan gina'un inabak di mun'abungot an a'ap'apuh gubat ya mabangngad.
Ti Ha"in di mananggah nan mangubat ay da'yu ta baliwa' nan imbabaluyyu!
26 Ya nan buhulyun mangipaligligat ay da'yu ya diday pumpapattayo',
ya nun'ipa'an'un diday lamohda.
At hiya mahkay di panginnilaan nan tatagun amin hitun luta
an Ha"in nan Dios an Baliwyu ya managun da'yu
ti Ha"in nan nidugah di abalinanan Dios ad Israel.”