12
Hay Nunlilian Jeremiah ay Apo Dios
1 Ya himmapita' ay Apo Dios ya inali' di,
“He"a, Apu, ya an amin nan inlili' ay He"a ya nahamad di inatmu.
Ya ad ugwan ya pohdo' an innilaon nan adi' ma'awatan
ti anaad ta nan adi maphod di ato'atona ya diday umadangyan,
ya nan agguy nepto' di pangatna ya diday gun pumhod?
2 Paddungnay intanommu dida ta limmamutda,
ya immongolda, ya bimmungabungada.
Ya He"ay idaydayawdan ulgu'ulgudon,
mu hay immannung ya un hapitda ya anggay.
3 He"a, Apo Dios, ya inilam an amin di aat'u an ta"on un nan wah nomnom'u.
At ibataanmu ni' daten mi'buhul ay ha"in ya numpatoymu dida
ta umatdah nan kalnilun me'nong hi mapalti!
4 Anakkayah di anappuhin nan tatagun numbalin hi namaganan tun luta,
ya na'lengday nitanom,
ya ta"on un nan hamuti ya animal ya nun'a'atoyda.
Ya alyonda goh udot di,
Ta"omman, at adi tigon Apo Dios di gun tu'u aton!”
Hay Nambal Apo Dios ay Jeremiah
5 Ya himmapit hi Apo Dios ay hiyan inalinay,
“Gulat ta mablay'an mi'yapput hinan tatagu
at inyal'allana mah un nan kabayuy pi'yapputam?
Ya gulat ta mihubag'ah nan nundotal an luta
at inyal'allana mah hi un hay inalahan an neheggon hinan Wangwang an Jordan?
6 Ten alyo' ay he"a an ta"on un nan i'ibbam an linala'in da'yun pamilya ya pohdon da'an pa"ion,
at adi'a mundenol ay dida an ta"on un maphod di hapitondan he"a!”
7 Ya inalin goh Apo Dios di,
“Nan holag Israel ya diday pento"uh tatagu' hi paddungnay odon'u,
mu ad ugwan ya din'ug'u mahkay dida ta indat'u didah nan buhulda.
8 Ti didan imbilang'uh odon'u ya numbalindah umat hi layon hinan inalahan an paddungnay humeeheel ay Ha"in,
at hiyanan nidugah di bohol'un dida.
9 Ti umatdah nan gayang an umipahigan Ha"in,
ya nen lini'ub di pumatoy an gayang dida.
At pa'alionyu nan a'animal hi inalahan ta middumdan mumpangan ay dida.
10 At mun'apa"i mahkay nan paddungnay galden'un natamman hi greyp ti pun'igatinda nan intanom'u,
at din ma"aphod an babluy ya mumbalin mahkay hi mapulun.
11 At minganuy an matawan ti mi'id di mangipapto',
12 ya nan titindalun umalin mama"in ten babluy ya diday pamatoy Apo Dios hinan tatagu.
13 At nan tatagu' ya muntanomdah wheat,
mu gapuh bungot'u ya hay hubit di bot'onda.
At na"ablaydan timmamutamu,
mu mi'id di hulbina.”
14 Ya inalin goh Apo Dios di, “Heten babluy ya indat'uh nan tatagu' an holag Israel. Mu la'tot ya pa"ion nan mi'buhul an heneggonda ta polhonda. At elanyuat ti paddungnay bu'nuto' didah nan babluyda, ya imbaliw'u nan tatagu' an holag Israel. Ya umat goh hinay ato' hinan holag Judah an paddungnay bu'nuto' dida.
15 Mu hom'o' goh damdama dida an heneggonda ta pumbangngado' didah nan numbabluyanda.
16 Mu ta"on un diday nangituduh nan tatagu' hi atondan mundayaw ay Ba'al mu gulat ta abulutondan Ha"in ya anggay di immannung an Dios ta mumpatududah atondan mundayaw ay Ha"in ya pumbalino' goh didah tatagu' ta maphod di itaguanda.
17 Mu gulat ta adia' unudon ya paddungnay bu'nuto' didan amin hinan babluyda ta ma'ubahda. Ha"in an hi Apo Dios di nanapit ete.”