47
Hay Impa'innilan Apo Dios hi Ma'at ad Philistia
(Isa. 14:28-32; Ezek. 25:15-17; Joel 3:4-8; Zeph. 2:4-7; Zech. 9:5-7)
1 Hidin agguy nangubatan nan alid Egypt hinan babluy ad Gaza ya hiyah te hinapit Apo Dios ay ha"in hi ma'at hinan iPhilistia.
2 An inalinay,
“Do'ol ahan di ma'amung an buhul an malpuh appit hi iggid hi un hagangon di buhu'an di algaw
an paddungnay nundatong an danum,
at punhe'nobna nan babluyda ta pumpa"inan amin di wah di.
Ya an amin nan tataguh nan abablubabluy ad Philistia ya ahikikiladah
3 unda donglon di gumanitu an kabayun di buhul ya nan kumanaludukud an pilid di kalesa.
At nidugah di tuma'tan nan mina'ilog an mangluy di ngamaydan mamadang hinan imbabaluyda.
4 Ti Ha"in an Dios ya nadatngan di pumpamataya' hi an amin an iPhilistia
an pangiyokodan nan iTyre ya iSidon hi bumadang ay dida.
At pumpatoy'u nongkay an amin nan iPhilistia an ta"on un nan na'angang an nalpud Crete hidin penghana.
5 At an amin nan tatagud Gaza ya ad Ashkelon
ya mumpumpamulmuldah pangipattigandah punlungdayaanda.
At uya'anah pangipattiganyuh numanomnomanyu an hugatonyuy odolyun da'yun na'angang an iPhilistia!
6 Ya kumiladan alyonday,
Undan anuud di pangidinngam, Apo Dios, hinan pumpamatayam ay da'mi?
7 Mu adi mabalin ti Ha"in an hi Apo Dios di nangimandal an mumpamatoy
hinan tatagun numbabluy ad Ashkelon
ya an amin nan numpunhituh nan pingit di baybay.”