19
Hay inhumang Job
1 Hinumang Job an kananay
2 “Itikod yu ken kumalikali teden pummam-a yuy punholholtapak.
3 Panadngolanak ke dakayu. Adi kayu pay anhan bumain ke naen at-atton yu.
4 Takon hin kananat waday ad-adih inat ku ya problemak hidiye, bokon dakayu.
5 Pangali yu on kudukdul kayu mu ha-on. Ya kon kanan yu on hantun ligat kun holholtapok di kitib-anan makulug an nakaliwwatak?
6 Kon adiyu tibon an hi Apu Dios di nangat ketuwe? Kayak kinnah bitu!
7 Mundiklamuwak, mu maid di manangud an mangngol ke ha-on. Ya mumpabaddangak, mu maid di mamaddang ke ha-on, takon di oha.
8 Kayak inaladan ta maid di dalanok.
9 Mina-id nan am-in di kinadangyan ku ya dinadag nay dayaw ku.
10 Paddungnay binanik-iyak. Ya mina-id nay namnamak.
11 Namahig di boh-ol Apu Dios ke ha-on, ta hidiye nan namahig di pangat nan kayak buhul ke hiya.
12 Paddungna boy impaalinay titindalunan mangubat ke ha-on ot likkubonak ta dopaponak.
13-14 Impumbalinay tutulang ku ya gagayyum kun humingit ke ha-on, takon nadan nanginilan ha-on ya kayak mo ugge inila.
15 Hanada ke bon bibisitak ya muttatyuk ya kayak mo ugge inila.
16 Mungkaliyak ke bo nadah muttatyuk ya adiyak mo udot hangudon ke dida.
17 Hana ke bon inayak ya adiyak hangudon te munhamuyak. Takon nadan iibak ya adida mih-up ke ha-on.
18 Pun-ibaagak bo udot hi u-unga ya tattataw-anak ten tinibowak.
19 Inwalongak nadah nahamad an gagayyum ku takon nadan impakappinhod ku.
20 Numbalinak an nakakkuug an hay adol ku ya abunay gunit ot mablatan ya innang an mateyak.
21 Homkonak ke anhan an gagayyum ku te deyan in-athituwak ke Apu Dios.
22 Deya bo tuwalin indatanak ke hiyah namahig an ligat ya pun-udman yu. Kon kulangon yu tun holholtapok?
23 Hana ot anhan ta waday munnomnom hantuh kanalyok ta itudok dah liblu
24 weno ikul-it dah batut munnanong ta nangamung hidi.
25 Mu inilak an malpuh langit di ahi umalin mangitakdog ke ha-on.
26 Ya siguladuwak an takon di mateyak ta mabuluk di adol ku ya ahik tibon metlaing hi Apu Dios.
27 Om, siguladun tibok mismuh Apu Dios ya umabtuwak an manibon hiya.
28 Mu ad uwani ya numanomnom kayun gagayyum kuh ipabahul yun ha-on ya pahakiton yuy nomnom ku te kanan yuy bahul ku tun ma-ma-at ke ha-on.
29 Mu nomnomon yun ahi madatngan di algon makastigu kayu kenaen punnomnom yu ta panginilaan yun waday munhumalyan am-in hi tagu.”