3
Malakai 3:1-5
Kowata yäpmäk-yäpmäk kadäni keräp täyak
1 Yawe Kehäromi mähemi näkä ŋode yäyat;
Näkŋo kädet täwitta yäŋahäwani ämana kubä intäjukun api tewa kwek yäk. Kuŋirän pit kubägän Ekäni unita wäyäkŋek täkaŋ uwä iniken kudupi yotken api kwek. Bureni, topmäk-topmäk kubägän unitäŋo yäŋahäwani äma, unita gäripi pähap nadäk täkaŋ unitä bureni api ahäwek yäk.
2 Upäŋkaŋ äbayäŋ täyak kadäni uken netätä kehärom taŋpäŋ unitäŋo man epän täga api irepmirek? Ba netätä täpäneŋpäŋ iŋamiken täga api irek? Nämo, kädäp komi, gol kenta siliwa ijiwani udewanitä-yäŋ api äbek. Ba sop kehäromi nikek, tek garok bäräŋeŋ yäwat kirewani udewanitä api äbek.
3 Uwä Anutu täŋo bämop äma yäpmäŋ danikta kädäp komi nikektä siliwa gol ijiŋpewä jiraŋ inigän kuk täkaŋ udegän api yäpmäŋ daniwek. Yäpmäŋ daniŋpäŋ äma siwoŋigän itpäŋ bänep siwoŋi terak Yawe näka ärawa api täŋ namineŋ.
4 Ude täŋirä Juda ba Jerusalem naniktä ärawa täŋ namiŋirä käwa api tägawek, bian täk täŋpani ude.
5 Täŋpäŋ Yawe Kehäromi mähemitä ŋode yäkgän täyat; In yäpmäŋ danikta api ärewet yäk. Äreŋpäŋ äma näka nämo umuntaŋpäŋ äma yärat-yärat täk täkaŋ, ba kubokäret täk täkaŋ, ba man käbeyäken jopman yäk täkaŋ, ba epän ämaniye gwäki säkgämän nämo yämik täkaŋ, ba webe kajat ba iroŋi kodäŋani täŋyäkŋarani täk täkaŋ, ba äma äbanita waki täŋ yämik täkaŋ u kudup bäräŋeŋ api yäpmäŋ daniwet yäk.