3
Ndu a-gba ndu Ízurẹlu ekebe
1 Unu ngabẹkwa nchị; nụa iphe Ojejoje kfuru l'okfu ẹhu unubẹ ndu Ízurẹlu; mbụ l'okfu ẹhu ikfu ono, o shi l'alị Íjiputu dufuta ono:
2 “Ọ bụ unu nwẹnkinyi unu;
bẹ ya fọtaru l'iphe bụ ikfu, nọ lẹ mgboko
gbaa mgburumgburu.
Ọo ya meru iphe ya a-nụ
unu aphụ k'ẹjo iphe unu eme l'ọ ha.”
3 Ụmadzu ẹbo;
?ẹphe ayịje ayịyi;
m'ọ -bụdu l'ẹphe kwetaru
l'ẹphe a-nọdu ayị?
4 Agụ; ?oodeje ekiri
l'ẹ b'o gude iphe oo-ri?
Nwa agụ;
?ọobaje hanyịhanyi l'ọka iya;
m'o -nwedu iphe o guderu?
5 Nwẹnu; ?ọ nmajẹ l'ọnya l'alị;
m'o -nwedu ọnya,
a gbaru doberu iya?
Ọnya, a gbaru agbagba l'alị;
?oosweje; m'o -nwedu iphe kpọ-sweru iya nụ?
6 Ụpyoku ọgu -dalahaa lẹ mkpụkpu;
ndu bu iya nụ;
?ẹphe ta awatajẹdu ọnma kpakpakpa tọo?
Ọ-la-l'iyi -byakfuta mkpụkpu;
?tọ bụdu Ojejoje b'o shi l'ẹka tọo?
7 Ire-lanụ bụ lẹ
Ọkaribe-Kakọta-Nụ
ta dụdu iphe oomeje
l'ẹ b'o me tẹ ndu ozi iya maru;
mbụ ndu nkfuchiru iya.
8 Agụ -wata ode ekiri;
?bụ onye a-sụ lẹ ya ta atsụdu egvu.
Ọkaribe-Kakọta-Nụ -kfua okfu;
?bụ onye ha kẹ b'e ezi iphe o ziru?
9 Raa ya arara l'iphe bụ ụlo,
a kpụru;
yo shihu ike lẹ Ashudọdu;
yẹle ọphu a kpụru;
yo shihu ike lẹ Íjiputu;
sụ ẹphe:
“Unu je edzua l'ugvu ugvu alị Samériya;
unu aphụ utsu, ada iya nụ;
phụ ẹhu, aakpa ndu ẹke ono!”
10 “Nchileke sụru l'ẹphe
ta madu ẹge eemeje iphe dụ mma;
mbụ ndu ono, bụ iphe
a kwaru l'ọkwata;
mẹ iphe a naru lẹ nfụ
bụ iphe jiru ụlo ẹphe,
a kpụshiru ike.”
11 Ọo ya; bẹ Nnajiufu, bụ Nchileke sụru:
“Lẹ ndu ọhogu a-tụkwa alị ono vulavula;
kwatsushia iphe bụ ẹke unu ka oshihu ike;
kwaa ọkwata l'iphe bụ ụlo,
unu kpụshiru ike.”
12 Ojejoje sụru:
“L'ọ kwa ẹge ono onye eche
atụru jeru ọnafuta atụru iya l'ọnu agụ ono;
bụ iphe ọoduje ike nafụta nwẹnkinyi
bụ nwoshi ọkpa anụ ọbu ẹbo;
m'ọ bụ nwibiribe nchị iya;
bu nwẹge aa-dzọfuta-be ndu Ízurẹlu;
mbụ ndu ono, bu lẹ Samériya;
nọdutsua l'igbirimọnu
oshi-azẹe ẹphe;
yẹle ndu ono, bu lẹ Damasụkosu;
nọdugbaa lẹ ngwọlahu ẹtemu ẹphe ono.
13 “Unu nụkwaa iphe-a; je agbaa ndu ọnu-ụlo Jékọpu ekebe.” Ono iphe Nnajiufu, bụ Nchileke ekfu ndono; mbụ Ojejoje, bụ Ọkaribe-Kakọta-Ike.
14 “Mbọku, ya a-nụ ndu
Ízurẹlu aphụ kẹ emeswe ono,
ẹphe mesweshiru iya ono;
bẹ ya e-mebyishikota
iphe bụ ẹnya-ngwẹja,
nọkota lẹ Bẹ́telu.
Iphe bụ mpo ẹnya-ngwẹja ono;
bẹ ee-gbukoshi; yọ daa.
15 Ụlo-winta ẹphe;
bẹ ya e-mebyishi;
mebyishia obu-nggamgbo ẹphe.
Ya e-mebyishi ụlo,
e gude eze-enyi memashia;
mee iphe bụ eze ụlo ẹphe; t'o kpube ifu l'alị.”
Ono iphe Ojejoje ekfu ndono.