14
Hosíya arọ ndu Ízurẹlu
1 Unubẹ ndu Ízurẹlu; unu lakfuta Ojejoje, bụ Nchileke unu! Ọ kwa iphe dụ ẹji, unu eme meru iphe unu daru!
2 Unu gude okfu-ọnu unu gude lakfuta Ojejoje. Unu bya asụ iya: “T'ọ gụaru ayi nvụ l'ẹjo iphe, ayi l'ọ ha. T'o gudenu kẹ l'ọ bụ onye emeje eze-iphe-ọma nata ayi; ẹge ayi e-gudekwanu okfu-ọnu ayi gwaa ya!
3 Ndu Asiriya ta adzọ-ghekwa ayi. Ayi te ekeheru íkè egheru ịnya-ọgu ọdo. Ayi te egudehe ọnu ayi sụ agwa l'ọo ya bụ Nchileke ayi; mbụ agwa, bụ ayịbedua gude ẹka ayi mee ya. Ọ bụ nggu Nnajiufu bụ onye aphụjeru onye a tọru nwogbee imiko.”
Ụkwa ndzụ ọphungu l'ẹhu Ízurẹlu
4 Ojejoje sụru:
“Ya e-me; ẹphe abụ-buhu ndu agharaba.
Ya abya atụshihu ọkpoma; yeru ẹphe obu;
kẹ l'ẹphe ta adụhedu mu ashị.
5 Ya a-dụru ndu Ízurẹlu;
l'ọ bụ iji l'adaru ẹphe.
Yọ ja pulapula l'ọ bụ okfukfulike.
Ọ́gbaragba iya abamia
abami l'ime alị l'ọ bụ
oshi sida Lébanọnu.
6 Ụnwu iya ndu ọphu dụ
nongini-nongini a-jakashị;
malahaa mma l'ọ bụ oshi olivu.
Mkpọ iya a-dụ l'ọ bụ
mkpọ oshi sida Lébanọnu.
7 Madzụ a-bya bya
adọlahaaru lẹ mkpuli iya ọdo.
Ọo-nọdu aja pulapula l'ọ bụ akpe;
mbụ ọo-kfụ kpuru
yẹgelengu l'ọ bụ vayịnu.
Ụdu iya atụko ẹkemeke
ngaa l'ọ bụ mkpọ mẹe,
shi Lébanọnu.
8 ?Bụ ngụnu ọdo;
bẹ ndu Ífuremu; ẹphe lẹ nte ji;
l'ẹke ọ kwa yẹbe Ojejoje
azajẹ ẹphe oku; l'eleta ẹphe ẹnya.
Ọ kwa yẹbedua bụ
oshi payịnu ono,
ẹkwo iya jiru ejiji ono.
L'unu amịa nebyi;
kwa yẹbedua b'o shi l'ẹka.”
Mkpọ-chi ishi iya
9 ?Bụ onye bụ onye, maru iphe? T'ọ mụtakwa iphe l'iphe-a! ?Bụ onye bụ onye iphe edoje ẹnya ọhuma? T'o dokotakwa iya ẹnya! L'ụzo kẹ Ojejoje dụkotakwa nhamụnha. Yọ bụru ndu doberu ẹka ndoo eshi iya. Obenu lẹ ndu kwefuru íkè; bẹ ụkfu adụje; m'ẹphe je iya eshishi.