5
No Katawag no Israel a Magbabāwi
1 Adngeyen nyo, inyo a tawotawo do Israel, iyaw pagdongdong-aw kwaya a maynamot dyinyo:
2 “Nabahatog danaw birhin a Israel,
kan nakapaybangon paba!
Naharaharag dana a nainonolay do tana,
kan arabaw mangbangon sya.”
3 Bata ni Āpo a DYOS a kāna, “Iyaw syodad do Israel a manoboy so asa rībo a soldādo a machigobat, ki asa gasot anchi lang makapaybidi. Iyaw asa idi a manoboy so asa gasot a soldādo a machigobat, ki asa poho anchi lang makapaybidi.”
4 Iyaw nyaw bata ni ĀPO dyirad tawotawo do Israel a kāna, “Maybidi kamo dyaken kan mabyay kamo.
5 May kamo aba do Betel a magdaydāyaw siras didyosen, kan mangay kamo aba dyirad bolto saw do Gilgal, mana romapit kamo aba do Beerseba. Ta siraw tawotawo do Gilgal, ki masigorādo a maakaw sanchi, as siraw tawotawo do Betel, ki apabanchiw sinpaspangan da.”
6 Maybidi kamo di ĀPO kan mabyay kamo, ta āngwan dalaposen na saw kapotōtan ni Jose a akmay apoy a mangabo siras myan do Betel, kan aba polos makasboy sya.
7 Kapakāsi nyo pa, ta dyinīdo nyo kosto a kapangokom a nayparin a makpad, as kan inpoha nyo kinalinteg a akmay basora.
8 Si ĀPO, namarswa siras bitohen saya,
siraw mayngaranaw so Pleyades kan Orion.
Iyaw mapaybadiw so sari a mayparin a sēdang,
kan mapaybadiw so māraw a mahep.
Iyaw manghap so ranom do tāw,
as padohen na a akmas chimoy do tana.
ĀPO iyaw ngaran na.
9 Apaggilap, karārayaw nas mabīleg saw
kan kōta da saw.
10 Ipsok nyo mangitēnek so kosto do pangokoman, kan idadanes nyo iyaw mangibaheyaw so oyod.
11 Linasalasagan nyo mapopobri saw, kan tinakawan nyo sa so trīgo. Dawa, aran mapatnek kamo so bahay nyo a bato a mapipintas, polos a dyi kamonchi a makapagyan daw. Aran marāber saw kaobāsan a inmoha nyo, polos anchi a dyi nyo a maynom palek da.
12 Chapatak ko an maypāngo kataywara no kasōkir nyo kan maypāngo karahmet dan gatos nyo. Lidyalidyaten nyo tawo saw a malinteg do kapangdaw nyo so pasoksok, as kan pinenpen nyo kinalinteg dyirad mapopobri saw do pangokoman.
13 Dawa, iyaw tawo a masīrib, ki maganaganay dana an dya maylilyak, maynamot ta mararahet dana saw nyaya araw.
14 Nāw nyo chichwasen maganay a dya iyaw marahet tan mabyay kamo. Do dāwri, myan anchi si ĀPO Dyos a Manakabalin do Tābo dyinyo a akmas inbahey nyowaw a maynamot dya.
15 Ipsok nyo marahet, kan chadaw nyo maganay. Pagāryen nyo kinalinteg do pangokoman. Āngonchan si ĀPO a Manakabalin do Tābo, maāsot kāsi na do tawotawo no nya nasyon dyirad nakalāsat saw a sibibyay pa.
16 Dawa, nyaw bata ni ĀPO a Manakabalin do Tābo a kāna, “Myan anchiw kapagdongdong-aw do kāda plasa, kan myan saw magarimbāngaw do oltimo a liday da do tabo a kalkalsāda do syodadaya. Matawagan sanchiw homakahakaw a machitanyitanyis kan siraw matangtangdanan saw a magdongdong-aw.
17 Myan anchiw kapagdongdong-aw do tabo kaobāsan, ta mangay akonchi a midibidi a mangdōsa dyinyo.” Nyaw bata ni ĀPO.
18 Kapakāsi nyo pa a mangahahay so araw a kangay ni ĀPO! Āngo paro maganay a maitoroh na no nawri a araw? Iyanchiw nawri, ki araw no sari a dya sēdang.
19 Akma anchis tawowaw a payyayowan naw lion, ki myan sawen mabayat na matarek a maranggas a animal. Mana akmas tawowaw a somnabat, do nakapanareng naw so tanoro naw do dyindyinaw, sinbat no boday!
20 Iyaw arawaw a kangay ni ĀPO, ki sari lang a abaw soho. Araw anchiw nawri a makalidliday, kan aba polos sēdang.
21 Bata ni ĀPO a kāna, “Ipsok ko saw sinsinan saw a pista nyo, kan maibtoran ko sabaw kapaychichipeh nyo.
22 Aran yangay nyo saw dāton saw a masosohan kan dāton saw a irek, rawaten ko sabanchi. Aran siranchiw napataba nyo saw a binyay a dāton a pachikapya, ikaskāso kwabanchi.
23 Aryan nyo naw pakalikalyak nyo saya kanta nyo! Chakey kwaba adngeyen toktokar no arpa nyo!
24 Basbāli pakono a pagāryen nyo kinalinteg a akmas kawyog naw no ranom do oksong, kan kalinteg a akmas rakohaw a oksong a dya polos a mayachan.
25 “Inyo a tawotawo do Israel, taywaran nangyangay kamo so dāton saw a masosohan dyaken kan siraw dāton saw a mapaychachapya do apat a poho a katawen do kayan nyo do let-ang?
26 Ki sichangori, maykatkat kamo siras dadwa saw a didyosen a pinarin nyo a para dyinyo a mismo a sa Sakkot a āri no didyosen nyo, kan Kaywan a iyaw bitohenaw a didyosen nyo.
27 Dawa, payamen koynyo a sibabahod a akawen do labes no Damasko a syodad.” Nyaw bata ni ĀPO, iyaw Dyos a Manakabalin do Tābo.