11
No Kaparin no Masīrib a Tawo
1 Madādam ka do kapanoroh mo,
ta ītonchiw araw a myan maybidi dyimo.
2 Iwaras mo do aran papito mana wawaho,
ta chapatak mwaba an āngo didigra a maparin do tanaya.
3 An napno dana saw demdem so ranom,
ki mapagtos sa so chimoy do tanaya.
An malba no kayo do ammyānan mana do abagātan,
ki dawriw kalban na.
4 Aran sino a mangsipsipot so salawsaw, ki maymoha aba.
Aran sino a manangay so demdem, ki magāpit aba.
5 Akmas dyi mo a kapatak so ayaman no salawsaw,
mana maypāngo a mayparakoh tohatohang do matris no nabogyaw,
komwan dyi mo a kaawātan so kaparin no Dyos
a iyaw Namarin so tābo.
6 Maymoha ka so binyi an mabekas.
As manda do maysarisari, ki ditā mwaba abos chabalay,
ta chapatak mwaba an tomobo no nya mana nawri,
mana mayengay sa maganay.
No Pamagbaga do Magtotobo
7 Makahwahok sēdang,
as kan magānas do mataw makaboya so araw.
8 An mabyay tawo so āro a tawtawen,
ki chasoyot na pakono sa a tabo.
Ki naknakmen na pakono a siraw araw no kasari, ki arwaro.
No tabo a īto a mangay, ki abos sinpaspangan.
9 Masoyot ka a magtotobo do kaadekey mo pa,
kan inolay mo pōso mo a manoroh so kasoyotan mo do araw sa a kaadekey mo.
Onotan mo chakey mwaw kan aran āngo maboya no mata mo.
Ki naknakmen mo a sira tabo nyaya parinen mo,
okomen nanchi imo no Dyos.
10 As dawa, patengen mo kabakel a myan do aktokto mo
kan pawakditen mo kaynyin do inawan mo,
ta iyaw kaadekey kan kapaychakatobo, ki abos sinpaspangan.