6
1 Ari paw matarek a makalidliday a kayayan a naboya ko do lōbongaya, kan kapangidadanes so tawotawo.
2 Manoroh Dyos do tawo so kinabaknang, warawara, kan dāyaw tan abo pagkorāngan na do tabo chakey na. Ki ipalōbos aba no Dyos a manānam na sa, basbāli a matarek a tawo mangnānam sira. Abaw sinpaspangan no nya a makalidliday a kaynyin.
3 Maparin a makapōtot mahakay so asa gasot, as kan manayon kabyay na. Ki aran maypāngo kanaro no kabyay na, an dyi na nanānam siraw magaganay saw do kabibyay na, as dya maganay nakaitābon na, bata ko a maganaganay asa alis.
4 Maiyanak a abos sinpaspangan no nya alis, kan komaro do kasarisaryan, as dawriw kaitayowan no ngaran na.
5 Aran polos a dya nakaboya so araw mana dyi na napatakan aran āngo, arwaro paw kapaynahah na kan no tawowaw
6 a aran naybibyay pa so papira rībo a katawen, ki dyi na nanānam siraw magaganay saw do kabibyay na. Asa abawriw angayan no tabo?
7 Tabo a payhohopagan no tawo, ki para do dāngoy na.
Ki aran komwan, polos a dya mapnek kapteng na.
8 Dawa, āngo kaganayan masīrib a tawo do abos arang?
Āngo mahap no pobri
do kapatak na so pariparinen na do salapen kadwan?
9 Maganaganay a chapnek mo myanaw dyimo
kan pakakdekden mwaw mo abo dyimo.
Aran nya, ki abos sinpaspangan.
Bāli, manglakat so salawsaw.
10 Aran āngo a myan, ki naikeddeng danaw ngaran na,
kan an āngo payparinan no tawo, ki naibahey dana.
Makapachisopyat abaw no tawo
do asa a mayīyit kan iya.
11 An arwaro maichirin,
ki dekedekey chakey da batahen,
an komwan, aryoriw kaganayan da do tawo?
12 Ta sino paro makapatak an āngo maganay do tawo do kabyay na ranan kayan manyid kan abos sinpaspangan a kahabas na akmay anyinyiwan? Sino paro makaibahey dya so maparin anchi dya do lōbongaya katayokan nakakaro na?