8
1 Sino machiyengay do masirīb a tawo?
Sino makapatak so kailawlawag no aran āngo?
No kinasīrib, ki pasoyoten naw rōpa no tawo,
as ponasen naw karopanget na.
No Kapagtongpal do Āri
2 Batahen ko a tongpalen mo bilin no āri, ta nagsapata ka do salapen no Dyos.
3 Taykalo kaba komaro do salapen no āri. Tēnekan mwabaw madi so panggep, ta parinen no āri aran āngo a chakey na.
4 Maynamot ta matoray kapaychirin no āri, sino makaitored a mangkārit sya a kāna, “Āngo parinen mo?’’
5 Aran sino a magtongpal so bilin na, abaw pakaan-anwan na.
As no masīrib, ki chapatak naw kosto a ōras kan pamosposan.
6 Ta myan kosto a ōras kan pamosposan do tabo
a aran taywara danaw kariribok no tawo.
7 Maynamot ta abaw makapatak so masakbayan,
sino paro makaibahey do tawo so īto a maparin?
8 Abaw tawo a myan so panakabalin a mangpenpen so salawsaw,
as kan abaw myan so panakabalin do araw a kadiman na.
Akmas kabo no mangliklik a magsanod do chimpon gobat,
komwan karahet a dyi na aryan siraw mamarin so marahet.
9 Naboya ko tabo saw nyaya do kaamīris ko so tabo a mapariparin do lōbong. Myan ōras a kapangitoray no tawo so kadwan, ki pakaynyinan no mismo inawan na.
10 Sinpangan na, naboya ko pa saw marahetaw a naitanem. Nasanyib sa somindep kan minohtot do masantwanaw a yanan, kan naidāyaw sa do syodad a namarinan da so marahet. Aran nya, ki abos sinpaspangan.
11 Maynamot ta dya malisto kaikeddeng no dōsa no marahet a kaparin, mapno pōso dan tawotawo a mangipangta so marahet.
12 Aran mamarin no maygaygatos a tawo so ginasot a karahet kan manaro byay na, alit na chapatak ko a maganaganay manganyib saw so Dyos, ta siaanyib sa do salapen na.
13 Ki maganay aba do marahet a tawo, as kan maypanaro abaw byay na a akmas anyinyiwan, ta abaw kāmo na do Dyos.
14 Myan paw asa abos sinpaspangan do tanaya. Siraw malintegaw a tawo, ki lak-amen daw maiparbeng do marahetaw. As siraw marahetaw a tawo, ki lak-amen daw pinakadyira da no malinteg saw. Aran nya, ki abos sinpaspangan.
15 Dawa, no maibahey ko, ki kanānam so byay, ta abaw maganaganay do tawo do lōbongaya an dya koman, minom, kan magragsak. Tan komwan, masoyosoyot a maytarabāko do tabo araw na a maybibyay do byay a intoroh no Dyos do lōbongaya.
16 Do kanāw ko a kapaychichwas so kinasīrib kan kapanyideb ko siras kaparin no tawo do tanaya, makapakaycheh akwaba do aran māraw kan mahep.
17 Sinpangan na, naboya ko tabo pinarin no Dyos. Abaw makatokod so mapariparin do lōbongaya. Aran paynanngetan no tawo tabo maparin na a maychichwas so kapakātoneng, machichwasan naba. Aran batahen no masīrib a tawo a chapatak na, alit na, matokod naba iktokto.