11
1 Ipsopsok ni ĀPO dyi saya kosto a pagkīlwan,
ki chasoyot naw kosto saw a pagtimbangan.
2 An mangay pangas, īto kasnek,
ki no kapakombaba, myan kinasīrib.
3 Iyaw kasingpet dan malinteg, pawnoten na sa,
ki no dya mapodno, marārayaw sa do kinakōsit da.
4 No kinabaknang, abaw sīrbi na do arawaw a kapangokom,
ki no kinalinteg, mangisalākan yapo do kadiman.
5 No kinalinteg no abos pakapilāwan, mapawnot do malinteg a kabibyay,
ki no marahet, makaspi do bōkod na a karahet.
6 No kinalinteg dan malinteg, mangisalākan sira,
ki no maranggas saw a tawo, matiliw sa do kalakam da.
7 An madiman marahet, tod a machipandaw namnāma naw,
as tabo a hahawen na do kayit na, mayparin a abos sinpaspangan.
8 No malinteg a tawo, maisalākan do riribok,
basbāli a mangay riribok do marahet a tawo.
9 Maynamot do kaparaherahet no dya madyosan, mangrārayaw siras karoba na,
ki maynamot do kapakatoneng, maisalākan sanchiw malinteg.
10 Do kaasinso dan malinteg, maragsak tawotawo do syodad.
An madiman saw marahet, mangngēngengey tawotawo do soyot da.
11 Maynamot do bindisyon no malinteg, maidāyaw syodad,
ki maynamot do chirin dan marahet, marārayaw syodad.
12 No mangoyaw so karoba na, kōrang so sīrib,
ki no manakaāwat, igpet naw rida na.
13 No maparaherahet, mangipakatoneng so palimed,
ki no mapagtalkan, maytayotayo.
14 Do kabon nainsirīban a kapangidaōlo, marārayaw asa nasyon,
ki myan ballīgi do kāro no mamagbaga.
15 No mangisigorādo a magbāyad so ōtang no istranghiro, maglak-am so pakaynyinan,
ki no maskeh a machiabrasa a machion do ōtang, abanchiw kaparoparwan na.
16 No masingpet a mabakes, mangrawat so dāyaw,
ki siraw maranggas a mahakay, kinabaknang lang mahap da.
17 No māsisyen, mangrawat so kaganayan a para do bōkod na inawan,
ki no maranggas, mangyangay so kaynyin do mismo na karakohan.
18 No marahet a tawo, makatangdan so allīlaw,
ki no maymoha so kinalinteg, magāpit so oyod a gon-gona.
19 No tawo a nāw na do malinteg a kabibyay, mabyay anchi,
ki no manglakat so marahet a kabibyay, madiman anchi.
20 Si ĀPO, ipsopsok na saw tawo a madyīdo do kapangtokto,
ki chadaw na saw maybibyay a abo so pakapilāwan.
21 Siranchiw marahet, sigorādo a mahabas sabanchi a madōsa,
ki siraw malinteg, makadichan sanchi.
22 Akmas balitok a singsing a napangay do dadabok no bago,
komwan mapintas a mabakes a abos kosto a kapangeddeng.
23 No chakey dan malinteg, nawri lang pagtongpalan naw maganay,
ki no hahawen dan marahet, kasoli lang no Dyos.
24 No madādam a tawo, arwaro paw mahap na,
ki no masinyat, basbāli a pomobri.
25 No madādam a tawo, omasinso anchi,
as no manoroh so ranom, makaywaw anchi.
26 Abayen no tawotawo iyaw mangonokon so irek tan maglāko so matohos a prisyo,
ki mabindisyonan iyaw tawo a makey a maglāko so irek do chimpo a machita.
27 No magaget a maychichwas so maganay, makadongso so kapangahwahok,
ki no karahet, mangay do tawo a maychichwas sya.
28 No magtalek do kinabaknang na, masday anchi,
ki no malinteg, mabyay anchi a akmay bohong a magla.
29 No mangyangay so riribok do pamilya na, salawsaw lang tawīden na,
as no abos arang, mayparin anchi a adīpen no masirīb a tawo.
30 No asi no malinteg, akmay kayo a manoroh so byay,
as no mapawnot so tawotawo tan madyira daw byay a abos pandan, ki masīrib.
31 An magon-gonaan malinteg do tanaya,
mangamangay pa madōsa iyaw marahet kan maygaygatos.