15
1 Iyaw mapakombaba a katbay, ospen naw taywara a kasoli,
ki no matangsit a katbay, basbāli a robroban naw kapakasoli.
2 Iyaw rida no masīrib, mapakbod so kapakatoneng,
ki no dangoy no abos arang, mapamsot so kabon sīrib.
3 Si ĀPO, maboya naw mapariparin do aran dino.
Chichiban na saw marahet kan maganay a tawo.
4 Iyaw mapaychapya a rida, akmay kayo a manoroh so byay,
ki no mangallīlaw a chirin, mangōpay.
5 No abos arang a anak, ipsok naw kapangdisiplīna ni āmang na,
ki iyaw mangikāso so kapangkosto, masīrib.
6 Do bahay no malinteg, āro mabalor a kinabaknang,
ki no tangdan no marahet, pakayapwan no riribok.
7 Siraw bibi dan masīrib, mangiwaras so kapakatoneng,
ki komwan abaw kapangtokto dan abos arang.
8 Iyaw dāton no marahet a tawo, ipsopsok ni ĀPO,
ki no dasal dan malinteg, nawriw chasoyot na.
9 Iyaw kabibyay no marahet, ipsopsok ni ĀPO,
ki chadaw naw tawo a manglakat so kinalinteg.
10 Iyaw makāro a disiplīna, para do komaro do kosto a rarahan.
As no tawo a mangipsok so kapangkosto, ki madiman.
11 Kadiman kan Karārayaw, maitayo aba di ĀPO.
Mangamangay paw aktokto no tawo!
12 No mangoy-oyaw a tawo, chakey nabaw kapangkosto.
Mangay aba do masīrib a tawo a mangdaw so pamagbaga.
13 No pōso a masoyosoyot, maboya do rōpa,
ki kaynyin kapangtokto, mangōpay.
14 Iyaw aktokto no makailāsin, chichwasen naw kapakatoneng,
ki no dangoy no abos arang, manobo so kabon sīrib.
15 Tabo araw dan maidadanes, taywara so kalidyat,
ki no pōso a masoyosoyot, akmay pirmi a machipasken.
16 Maganaganay dēkeyaw a kinabaknang a myan kaanyib di ĀPO
kan āro a kinabaknang a mangyangay so riribok.
17 Maganaganay a mahahanghang do rakarakanen a myan so kadaw
kan mahahanghang do karni a myan so kasoli.
18 No taykalo a komohat, mangrobrob so kapaydidiman,
ki no dya malisto a makasoli, mamenpen so kapagsosopyat.
19 Iyaw ayaman no masadot a tawo, akmay naspetan so nōlok,
ki no rarahan no malinteg a tawo, akmay planāda a kalsāda.
20 No masīrib a anak, pasoyoten naw āmang na,
ki no abos arang, chahanyinyi naw ānang na.
21 Kabon sīrib, ki chasoyot a onotan no kōrang so sīrib,
ki no myan so kapakaāwat, mayam do malinteg a rarahan.
22 Mawsep saw plāno an abo maganay a pamagbaga,
ki an āro mangbagbaga, maipatongpal sanchi.
23 Makachichwas so soyot no mangibahey so tomotop a atbay,
kan āngo a soyot no maganay a katbay do kostwaw a ōras!
24 Iyaw rarahan no masīrib a tawo, komayat do byay
tan domichan a dya gomchin do Yanan Dan Nadiman.
25 Lasahen ni ĀPO iyaw bahay no mapapangas,
ki aywanan na saw pachipandan no tana no bālo.
26 Si ĀPO, ipsopsok na saw kapangtokto no marahet,
ki chahwahok na saw chirin a yapo do madalos a kapangtokto.
27 No maāgom a bomaknang do kōsit, manoroh so riribok do bōkod na a pamilya,
ki no mangipsok a mangrawat so pasoksok, mabyay anchi.
28 No malinteg a tawo, mangtokto sakbay a tombay,
ki no dangoy no marahet, mamsot so marahet a chirin.
29 Si ĀPO, itoltoleng naw akdakdawen dan marahet,
ki adngeyen naw kapaydasal dan malinteg.
30 Iyaw makasoyosoyot a rōpa, paragsaken naw kapangtokto,
kan iyaw maganay a dāmag, mapasalon-at so inawan.
31 No mangadngey so kapangkosto a mapalongo do byay,
ki machiyan anchi dyirad masisīrib.
32 No dya mangikaskāso so disiplīna, chāsi nabaw inawan na,
ki no mangadngey so kapangkosto, maypasīrib.
33 Iyaw no kaanyib di ĀPO, mangnanawo so kinasīrib,
as kan no kapakombaba, manmanma kan kaidāyaw.