28
1 No marahet a tawo, mayyayo a aran abo manglakat sya,
ki siraw malinteg, matotored sa a akmay lion.
2 Do kapagribīldi dan tawo do asa nasyon, paysosodiban daw toray,
ki no magtoray a myan so kapakaāwat kan kapakatoneng,
manayon talna kan ornos.
3 No magtoray a mangidadanes siras mapobri,
ki akmay mawyas a chimoy a mangyoyog so mohamoha.
4 Siraw machisyay do linteg, padayāwan daw marahet,
ki siraw monotaw do linteg, kalāban da sa.
5 Siraw marahet, maawātan daba iyaw kinalinteg,
ki siraw maychichwasaw di ĀPO, maawātan da komplito.
6 Maganaganay mapobri a maybibyay a masingpet
kan mabaknang a maybibyay a madyīdo.
7 No magtongpal do linteg, ki makaāwat a anak,
ki no machibarkāda dyirad masasaraw, pakasnesnekan āmang na.
8 Iyaw kinabaknang a napāro do sobra a ganasya,
ki mangay anchi do tawowaw a māsisyen so mapobri.
9 An itoltoleng no aran sino iyaw linteg,
aran iyaw dasal na, ipsopsok no Dyos.
10 No mapāwaw siras malinteg do marahet,
masday anchi do bōkod na aridos,
ki siraw abos pakapilāwan, myan sanchiw tāwid da a maganay.
11 No mabaknang, iktokto na a masīrib do kapakaboya na,
ki no mapobri a myan so kapakaāwat, mapatakan na iyaw oyod.
12 Do kapagballīgi dan malinteg, taywara chasoyot no tawotawo,
ki an sodiben dan marahet kapagtoray, tomayo saw tawotawo.
13 No mangtalob so gatogatos na, ki maasinso aba,
ki no magpodno kan mangkaro sira, rawaten nanchiw kāsi.
14 Magāsat tawo a kanāyon a myan kaanyib na di ĀPO,
ki no tawo a paypatwahen naw aktokto na, masday do didigra.
15 Akmay ngomerngernger a lion mana manglakat a oso,
komwan kaparin no marahet a magtoray dyirad mapobri.
16 No magtoray a kōrang so kapakaāwat, maranggas a mangidadanes,
ki no mangipsok so kinabaknang yapo do kōsit, pahayen nanchiw byay na.
17 No maybiybinākel do nakapangdiman na,
malakalakatan anchi mandad kadiman na.
Abo pakono somidong sya.
18 No maybibyay a abos pakapilāwan, maisalākan anchi,
ki no maybibyay a madyīdo, nyiknyīnan anchi a masday.
19 No magaget a maymohamoha do tana na, āronchiw kanen na,
ki no mangrōnot so ōras na, nāw nanchi a mapobri.
20 No mapagtalkan a tawo, āronchiw bindisyon na,
ki no malisto a bomaknang, makaliklik aba a dya madōsa.
21 Maganay abaw kapangitatārek,
ki do akmay dedeng a makan, makaparin tawo so madi.
22 No koripot a tawo, chakey naw malisto a bomaknang,
kan chapatak naba a adasen anchi no kinapobri.
23 No maydabdab so asa tawo do madi a pinarin na, rakorakoh anchiw kapagyāman na dya
kan iyaw tawowaw a mangpasablog sya a aran dya kosto.
24 No manakaw do āmang mana ānang na,
as batahen na a “Gatosori?”
ki rārayay no mangrārayawaw.
25 No maāgom, paklaklalen naw kapaydidiman,
ki no magtalek di ĀPO, maasinso anchi.
26 No magtalek do bōkod na kapangtokto, ki abos arang,
ki no maybibyay a monot do kinasīrib, ki maisalākan anchi.
27 No manoroh do mapobri, abonchiw pagkorāngan na,
ki iyaw akmaw bolsek dyira, rawaten nanchiw āro a abay.
28 An sodiben dan marahet kapagtoray, tomayo saw tawotawo,
ki anchan mabo saw marahet, maypāro saw malinteg a tawotawo.