31
Siraw Panyinyirin ni Āri Lemwel
1 Siraw nyaw panyinyirin ni Āri Lemwel. Nya, ki naispiritwan a minsāhi na a inanawo ni ānang na dya:
2 O anak ko, o anak ko a inyanak ko,
O anak ko a atbay no dasal ko,
3 patawsen mwabaw ayit mo dyirad mababakes
mana inawan mo dyirad mangrārayawaw siras ar-āri.
4 “Mo Lemwel, para aba dyirad ar-āriw nyaya:
On, para aba dyirad ar-āri iyaw sobra a kaynom so palek,
kan para aba dyirad magtotoray iyaw kalakam so arak,
5 ta āngwan minom sa kan mawayakan daw linteg,
as tādyan danchiw kalintegan dan mapopobri saw.
6 Iyaw arak, para dyirad kadidimān daranaw,
as iyaw palek, para dyirad taywara maliday.
7 Nonolay mo sa minom tan mawayakan daw kapobri da,
kan tan manakem da paba iyaw kapakakāsi da.
8 “Maychirin ka a pinakadangoy dan dya makaikalintegan so inawan da.
On, ikalintegan mo sa tabo abo danaw so namnāma.
9 Maychirin ka, kan mangokom ka sililinteg.
Ikalintegan mo saw mapobri kan siraw makachitaw.”
No Kaidāyaw no Maikari a Kabahay a Mabakes
10 Sino makachichwas so maikari a kabahay a mabakes?
An machichwasan, mapatpateg ngamin kan mangīna alāhas.
11 Taywara matalek ni lakay na,
kan abonchiw pagkorāngan na maynamot dya.
12 Maganay kaparin na di lakay na, kan paynyinan naba
do tabo araw do kabyay na.
13 Hapen naw boboh no karniro kan tamek a lino,
as kan chadaw na tarabākohen.
14 Iya, ki akma siras lomoganaw do gapor a maglaklāko
a manabat so mākan a yapo do mateng.
15 Parbāngon pa, ki maybangon dana
a mangisagāna so kanen pamilya na,
as kaitoroh nas binglay dan tobotoboyen naw a mababakes.
16 Iktokto na maganay gatāngen naw a bengkag, as kabayād na sya.
Yapo do nachichwasan naw, maymohamoha so kayo no ōbas.
17 Sisasagāna a maytarabāko do bahay.
Mayit kan magaget a mangipatongpal sya.
18 Maboya na a gomanansya do nigosyo naw,
as maychararakan a dya mangosep so soho na.
19 Iya, ki mamospos so bolabola yapo do boboh no karniro,
kan mamarin so tela para do ayowayob.
20 Maydedpa a mangrawat siras mapobri,
kan ilonat naw tanoro na manoroh dyirad makachita.
21 Do chimpon karokmeh, chabakel nabaw pamilya na,
ta ari danaw pinarin na matokpoh a laylay da.
22 Mamarin siras ap-ap no katri na.
As iyaw laylay na, ki mapīno a tela kan obi so kīta.
23 Mabigbigbig si lakay na do rowanganaw no idi,
do kapachidisna na dyirad panglakayenaw do dawri a tana.
24 Mamarin so laylay sa a yapo do tamek a lino kan ilāko na sa,
as iyaw pakayapwan dan barīkis a ilaklāko dan nigosyanti.
25 Mailaylay dyaw kayit kan dāyaw a yapo do tawotawo,
kan mamyeng a abos kamwamwan do masakbayan.
26 Yapo do dangoy na, maychirin so nainsīriban,
kan makadadaw a kapangnanawo, myan do rida na.
27 Aywanan na a maganay kayiyan no pamilya na,
kan aba polos sadot na.
28 Maytēnek saw anak naw, kan idaydāyaw da,
as kan aran si lakay na, padāyawan na pa a kāna,
29 “Āro saw mababakes a namarin so maikari,
ki imo, inabak mo sa tabo!”
30 No katatawo a makaay-āyo, makaallīlaw. No kapintas, manayon aba,
ki iyaw mabakes a mamo di ĀPO, ki maikari a maidāyaw.
31 Itoroh mo dyaw dāyaw a maikari do kagaget a pinarin na.
Sira pakono tarabāko naw, pakaidayāwan na do rowanganaw no idi.