12
No Kapaydabdab ni Natan kan Kapagbabāwi ni Dabid
1 Tinoboy ni ĀPO si Natan di Dabid. Do nakangay naw dya, binata na a kāna, “Ari saw dadwa mahahakay do asa a īdi. No asaw, ki mabaknang. As no asaw, ki mapobri.
2 Iyaw mabaknangaw, ki āro saw arban no karniro kan bāka na.
3 Ki iyaw no pobryaw, ki aba polos dyira na malaksid do asaw a orbon a mabinayi a karniro a ginātang na. Dinām na, kan nachipayrakorakoh dyirad pōtot na saw. Naywaman na a pakanen a yapo do pinggan na, paynomen na do bāso naw, kan payponganen na do tachay naw. Akma danaw pinakapōtot na a mabakes.
4 “Do naypisa, myan magbibyahi a nangay do mabaknangaya. Iyaw nya mabaknang, ki chaskeh naw magparti so aran asa dyirad mismo na saw a karniro mana bāka a maisagāna a ipakan do magbibyahyaw a bisīta na. Basbāli a inhap naw orbonaw a karniro a dyira no mapobryaw, kan nawriw inpaisagāna na para do tawowaw a nangay dya.”
5 Taywaraw nakapakasoli ni Dabid do tawowaw, kan binata na di Natan a kāna, “Akmas kasigorādo no kasibibyay ni ĀPO, iyaw tawowaw a namarin sya, ki machita a madiman!
6 Machita bayādan naw orbonaw so maypipat maynamot ta pinarinaw komwan a abos kāsi.”
7 Binata ni Natan di Dabid a kāna, “Na, imwaw tawowaya! Iyaw nyaw bata ni ĀPO a Dyos no Israel: ‘Pinidi koymo a mayparin a āri no Israel, kan insalākan koymo do tanoro ni Saulo.
8 Intoroh ko dyimo pagāryan ni Saulo a āmo mo kan iyaw no baket saw no āmo mwaw do kakamay mo. Pinagāri ko pa imo do Israel kan Joda. As an dēkey paw nyaya, manoroh akpa so arwaro dyimo.
9 Āngo ta tod mwa dyābat bilin ni ĀPO do nakapamarin mo so marahet do kapanyideb na? Inpadiman mo si Oryas a Heteo do ispāda, as nakahap mo si baket na a dyinira mo. On, inpadiman mo iya do paggogobatan dyirad Ammonita saw.
10 Dawa sichangori, polos a dya machisyay ispādaw do bahay mo, maynamot ta tod mo yaken a dyābat, kan inhap mo si baket ni Oryas a Heteo a dyinira mo.’
11 “Nyaw bata ni ĀPO: ‘Yapo do bōkod mo a pamilya, mamahtot akonchi so didigra dyimo. Mismo monchi a chichiban a hapen ko saw babbaket mwaw a itoroh do matarek a iyaw masngenaw dyimo, as kan oknoden na sanchiw babbaket mwaw a aran māraw pa.
12 Pinarin mo a sililimed, ki parinen konchiw nya an māraw do salapen no tabo Israel.’ ”
13 Do dāwri, binata ni Dabid di Natan a kāna, “Allah, naygatos ako so maikontra di ĀPO.”
Inatbay ni Natan a kāna, “Si ĀPO, ki pinakawan naranaw gatos mo. Madiman kaba.
14 Ki aran komwan, maynamot do dyaya a pinarin mo a taywara a kabon anyib mo di ĀPO, madiman anchiw no maiyanak a yapo dyimo a adekey.”
15 Do nakasabat naranaw ni Natan, pinaganyit ni ĀPO iyaw anakaw ni baket ni Oryas a inyanak na a pōtot ni Dabid.
16 Nachikakaāsi si Dabid do Dyos a maynamot do adekeyaw. Nagayonar, kan kāda mahep, ki nangay do kwarto naw a maysasakeb do rātag a maychararakan.
17 Siraw panglakayenaw a kapamilyaan na, ki nachitalin sa dya, kan pinādas da a paybangonen a yapo do ratagaw. Ki chinaskeh na, kan nachihahang aba dyira.
18 Do chapapito naw a araw, nadiman iyaw adekeyaw. Chinamo da a ibahey di Dabid a nadiman danaw adekeyaw, ta iniktokto da a kon da, “Do kayan paw a sibibyay no adekeyaw, naychirin kami dya, kan inkaskāso naba yamen. Maypāngo paro a ibahey namen dya a nadiman danaw adekeyaw? Āngwan paynyinan naw inawan na.”
19 Ki nadlaw ni Dabid a maysin-aarasāas sa, kan napatakan na a nadiman danaw adekeyaw. Dawa, inyahes na dyira a kāna, “Nadiman danawriw adekeyaw?”
“On mo āpo. Nadiman dana,” kon da.
20 Do dāwri, naybangon a naytēnek si Dabid a yapo do ratagaw. Do katayoka naw a nariyos, napangay so bangbanglo, kan kominhang, nangay a somindep do bahayaw ni ĀPO a magdaydāyaw dya. Somarono, somnabat do mismwaw a bahay na a palasyo. Do nakapangdaw naw so kanen na, indasaran da kan kominan.
21 Inyahes dan panglakayenaw dya a kon da, “Āngo ta komwan parinen mo? Do kayan paw a sibibyay no adekeyaw, nagayonar kan tomnayis ka. Ki sichangori a nadiman danaw adekeyaw, naybangon ka kan komninan ka.”
22 Inatbay na a kāna, “Do kayan paw a sibibyay no adekeyaw, nagayonar kan tomnanyis ako. Iniktokto ko a kon ko, ‘Sino makapatak an ipaboya paro ni ĀPO kāsi na dyaken, kan palobōsan na a mabyay adekeyaw?’
23 Ki sichangori a nadiman dana, aryoriw sīrbi pa no kapagayonar ko? Mapaybidi ko pawri? Mangay akonchi dya. Ki iya, makapaybidi paba dyaken.”
24 Do dāwri, inahwahok ni Dabid si baket na a si Batseba. Nangay a nachoknod dya. Sinpangan na, naymanganak so mahakay, kan pinangaranan na so Solomon. As chinadaw ni ĀPO iya,
25 kan inpaibahey na di Natan a propīta a pangaranan na iya so Jedidiyah.
No Kasākop ni Dabid so Syodad a Rabba
(1 Kron. 20:1-3)
26 Ranan a napariparin nya, tinongtong ni Joab machigobat do Rabba a sintro dan Ammonita, kan sinākop na.
27 Nanoboy si Joab so mangay a mangibahey di Dabid a ipaibahey na dyira a kon da, “Ginobat ko sa do Rabba, kan sinākop ko panghapan daw so ranom.
28 Changori, akpehen mo saw kadwanaw a bōyot ta, ta lakoben mo syodadaya, kan sakōpen mo. Ta an dyi mwa parinen, as yaken makahap sya, ayket maipangaran anchi dyaken.”
29 Dawa, chinpeh ni Dabid tābo a bōyot na a nangay do Rabba. Ginobat na kan sinākop na.
30 Inhap naw koronaw do ohwaw no āri da. No karahmet no koronaw, ki tatdo a poho kan apat a kakīlo a balitok, kan naikolimas mapateg a bato. Iyaw nya, ki napangay do oho ni Dabid. Sinamsam na paw āro a yapo do syodadaw.
31 Pinahtot na saw omyanaw daw, kan pinaytarabāko na sa a inkapilītan do ragādi, pasek saw a pīko kan pasek saw a wasay do pamarinan saw so ladrilyo. Komwan pinarin ni Dabid do tabo idiidi dan Ammonita. Sinpangan na, somnabat si Dabid kan tābo bōyot na do Jerosalem.